Htû̌sò̌htò̌ 118 - Kawyaw New Testament

Ta̤hî̌bwǐhî̌sîrî ata̤kwicaba dǒ ta̤ma̤pè̤̌ aya

¹ Cǒmara tûjû̌pwa̤ wô̌ mî̌ca, hî̌bwǐhî̌sîrîhtò̌ lô̌khô yǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

² No hî̌mò̌ Isôrě̤lakhlilèphû̌ sîtokhlǒ kû̌, “Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.”

³ No hî̌mò̌ PhaArû akhlialè amî̌ pwa̤shû̌gǎ tokhlǒ kû̌, “Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.”

⁴ No hî̌mò̌ kòyò dǒ a ǐsha bè̌dubè̌nǎ̤ Cǒmara tûjû̌pwa̤ nutokhlǒ kû̌, “Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.”

⁵ He kè̌shî̌tṳ̌bǎ kû̌ ta̤pò̤̌ta̤sha dě he kwisǎyṳhtò̌ Cǒmara tûjû̌pwa̤. A ganǎ̤de he ta̤kwihtò̌, a ma̤hǎplǎbǎ he.

⁶ Cǒmara tûjû̌pwa̤ mî̌ pwa̤ dǒ a ma̤jè̌ he. Kòyò ma̤ he pwî̌tètè̌ bǎbǎ, he ǐsha tô̤̌.

⁷ Cǒmara tûjû̌pwa̤ ô̌cu dǒ he tôkhô dě a ma̤jè̌ he akhû̌akhî, a no kè̌shǐ he kû̌ pwa̤sǎkhě he tokhlǒ lò̤jû̌kè.

⁸ Nǎla̤ǐ Cǒmara tûjû̌pwa̤nu, awô̌lǒ bò kû̌ nǎla̤ǐ kòyòhǎkhû̌phû̌.

⁹ Nǎla̤ǐ Cǒmara tûjû̌pwa̤nu awô̌lǒ bò kû̌ nǎla̤ǐ pwa̤htû ikǒlǒkò pě.

¹⁰ Lǒ̤bò khlilèphû̌ tokhlǒ ô̌te̤we̤bò he bǎbǎkǎlè Cǒmara tûjû̌pwa̤ ma̤jè̌ he akhû̌akhî, he ma̤pè̤̌ kèbò asî.

¹¹ Asî ô̌te̤we̤ he, a ô̌ te̤we̤bò he bǎbǎkǎlè Cǒmara tûjû̌pwa̤ ma̤jè̌ he akhû̌akhî, he ma̤pè̤̌ kèbò asî.

¹² Asî ô̌te̤we̤ bò he asô̌sô̌kû̌ wè̌ jotewe̤bǐ abǔnu. Bǎbǎkǎlè asî siphwèkè asô̌sô̌kû̌ mî̌ u jôjǔnu. Cǒmara tûjû̌pwa̤ ma̤jè̌ he akhû̌akhî, he ma̤pè̤̌ kèbò asî.

¹³ Pwa̤sǎkhě he tokhlǒ jî̌pwǐ̤ shěshǔ he dě he glè̌ lò̤jû̌ tûlû̌kè bǎbǎkǎlè Cǒmara tûjû̌pwa̤ ma̤jè̌ he.

¹⁴ Cǒmara tûjû̌pwa̤ mî̌ hekhû̌heǎ, pwa̤tukutakaǐ he. A mî̌ pwa̤ dǒ a ma̤hǎplǎge he.

¹⁵ Kòyòcǒkòyòtè̤ ma̤pè̤̌ pwa̤sǎkhě asînu akhû̌akhî, ganǎ̤demò̌. Asî kaǎgǔsǎwǐ lô̌khô dǒ ahǐphû̌kû kû̌, “Cǒmara tûjû̌pwa̤ mî̌ apô̤phǎshû̌sho mî̌ca.

¹⁶ “A ma̤jè̌ pa kû̌ ata̤pô̤ta̤phǎ akhû̌akhî, pa ma̤pè̤̌ ta̤. “Cǒmara tûjû̌pwa̤ mî̌ apô̤phǎshû̌sho mî̌ca.”

¹⁷ He si bǎkhôtô̤̌, he ô̌htûpwa̤ pe pwǎ. He gǔ pwe̤ǐlṳ̌ bǎ ta̤ dǒ Cǒmara tûjû̌pwa̤ ma̤ htonu.

¹⁸ Cǒmara tûjû̌pwa̤ sû̌ǐwô̌ge shû̌shû̌ he bǎbǎkǎlè a nosibǎ he khôtô̤̌.

¹⁹ Bǔmô bǎ he ta̤lṳhtò̌hô atakhadû̌nu. He gǔ nṳ̌ hî̌bwǐhî̌sîrîhtò̌ Cǒmara tûjû̌pwa̤.

²⁰ Takhanumî̌ Cǒmara tûjû̌pwa̤ atakhakû. Tǒ̤ kòyòcǒkòyòtè̤ tokhlǒ bǎ nṳ̌bò bǒo.

²¹ Ǒ Cǒmara tûjû̌pwa̤, na ganǎ̤de he ta̤kwicaba, na ma̤hǎplǎkè he akhû̌akhî, he hî̌bwǐhî̌sîrîhtò̌ na.

²² Lǒ̤ dǒ kòyò ma̤htò̌ hǐ dě kòyò wîkè lû̌ nutômènu, a htûhtò̌ lǒ̤ dǒ alṳ̂dû̌lǒ dě a tûhtû̌mě bò hǐtômèbò.

²³ Hǒonumî̌ Cǒmara tûjû̌pwa̤ ma̤ta̤ pwǎ. Ama̤ta̤ numî̌ a cô̌klǐcô̌sè mî̌ca.

²⁴ Lṳmṳ̌ni̤ khò̌tini̤ mî̌ lṳmṳ̌ni̤ dǒ Cǒmara tûjû̌pwa̤ bè̌lò̤nǎ hǒ. Sǎlě̤sǎlò̤ sû̌mô̤sò̌mô̤ wô̤̌wô̤̌ lû̌.

²⁵ Ǒ Cǒmara tûjû̌pwa̤, ma̤hǎplǎgemò̌ pa. Ǒ Cǒmara tûjû̌pwa̤, ǐ pa ta̤ma̤pè̤̌.

²⁶ Kòyò dǒ a hè kû̌ Cǒmara tûjû̌pwa̤ ami̤ tôpwa̤nu, Cǒmara tûjû̌pwa̤ ǐshôwî̤ pû a nî̌. Pa ô̌ dǒ Cǒmara tûjû̌pwa̤ ahǐkû dě pa ǐshowî̤ sî lǒ̤bò.

²⁷ Cǒmara tûjû̌pwa̤ mî̌ pa Cǒmaradû̌, a ma̤mô̤ma̤wô̌ pa. Cǐhè ta̤phû̌ta̤li̤ lǎ̤lṳtòhtò̌ nudě comě lû̌û kû̌ sǒpli̤ bǎ ta̤lṳhtò̌wǎ̤ ano̤lô̤.

²⁸ Na mî̌ he Cǒmaradû̌, he gǔ hî̌bwǐhî̌sîrîhtò̌ na. Na mî̌ he Cǒmaradû̌, he gǔ htû̌sò̌htò̌ na.

²⁹ Cǒmara tûjû̌pwa̤ wô̌ mî̌ca, hî̌bwǐhî̌sîrîhtò̌ lô̌khô yǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.