Htû̌sò̌htò̌ 116 - Kawyaw New Testament

Ta̤sî̌ya bwǐsîrî ata̤kwicabahtò̌

¹ Cǒmara tûjû̌pwa̤ ganǎ̤de he ta̤kwicaba kû̌ he ta̤kwisǎyṳhtò̌ akhû̌akhî, he mô̤nṳ̌ yǎ.

² A dò̌wô̌ anò̌ku dǒ he ô̌ akhû̌akhî, he kè̌ ô̌htûpwa̤ pe mî̌, he glè̌ kwicabahtò̌ nò yǎ.

³ Ta̤si ô̌te̤we̤ he asô̌sô̌kû̌ kòyò dò sumṳnu. He ô̌phǔti̤nǐ̤ kû̌ lṳ̌gǎnǎdo nuhǒ. He kè̌shǐtṳ̌bǎ kû̌ ta̤pò̤̌ta̤shadû̌, ta̤sǎplǎ̤sǎyṳ.

⁴ Bǎnukha, he kwisǎyṳhtò̌ Cǒmara tûjû̌pwa̤ kû̌, “Ǒ Cǒmara tûjû̌pwa̤, khòsǎdô ma̤hǎplǎ he.”

⁵ Cǒmara tûjû̌pwa̤ mî̌ a ma̤bwǐma̤sîrî kòyò, a ma̤tôma̤bǎ. Pa Cǒmaradû̌ mî̌ a gwèbǎǐ mî̌ca kòyò.

⁶ Cǒmara tûjû̌pwa̤ tugutakaǐ kòyò dǒ a shôdô ta̤ma̤jè̌ nutokhlǒ. Bǎ he kè̌shǐtṳ̌bǎ kû̌ ta̤pò̤̌ta̤sha adû̌môti̤ akhanu, a ma̤hǎplǎbǎ he.

⁷ Cǒmara tûjû̌pwa̤ ma̤wô̌mî̌ca dǒ heya akhû̌akhî, “Ô̌kǔ mò̌,” he hî̌ǐ tûû̌ henǎ̤ pô̤̌nu.

⁸ Na ma̤hǎplǎge he dǒ ta̤sita̤hǎmǎ akû. He mǐ̤sǎshi lò̤tě̤ nò pe tô̤̌, he htò̌tukhu nô̌ pe tô̤̌.

⁹ He glè̌ ô̌htûpwa̤ dǒ Cǒmara tûjû̌pwa̤ ata̤kè̌pǒ̤ǐ alǎ̤, bǎ kòyò hǎkhû̌phû̌ ô̌ ǐ hǎkhû̌ nupě.

¹⁰ “Ǒ Cǒmara tûjû̌pwa̤, he kè̌shǐtṳ̌bǎ mî̌ca kû̌ ta̤jî̌ta̤jû̌ hǒ,” he hî̌ pô̤̌nu bǎbǎ, he yṳ̌ǎ pe pwǎ na.

¹¹ He sǎgònò̤̌ dě he hî̌ kû̌, “Kòyò lǒ̤bò mî̌ kòyò lòhǎlòhô pwǎ.”

¹² Lǒ̤bò ta̤ dǒ Cǒmara tûjû̌pwa̤ ma̤bwǐma̤sîsî he tokhlǒnu, he cû̌ plěge jòsô̌ lû̌û hětè?

¹³ He hèlṳtòhtò̌ sîpî̌shisǐyô̤̌nu kû̌ Cǒmara tûjû̌pwa̤ pě. A ma̤hǎplǎge he akhû̌akhî, he htû̌sò̌htò̌ Cǒmara tûjû̌pwa̤ ami̤.

¹⁴ He ma̤lǒma̤be ǐtûû̌ he ta̤olò̤ heyô̤̌ kû̌ Cǒmara tûjû̌pwa̤ nutokhlǒ dǒ akòyò lǒ̤bò alô̤mô̤̌ pě.

¹⁵ Bǎ Cǒmara tûjû̌pwa̤ a kòyò dǒ acǒ kû̌ ayô̤̌ tokhlǒ si akhanu, a lě̤dû̌pwî̤dû̌ jî̌jî̌ aya.

¹⁶ Ǒ Cǒmara tûjû̌pwa̤, he mî̌ na pwa̤ma̤ta̤phû̌ tôpwa̤. He mî̌ na pwa̤ma̤ta̤phû̌ sô̌sô̌ hemǒ̤nu. Na ma̤hǎplǎge he dǒ ta̤sita̤hǎmǎ akû.

¹⁷ He glè̌ ma̤si lṳtòhtò̌ ta̤phû̌ta̤wè̤ kû̌ ta̤hî̌bwǐsîrî ata̤lṳta̤tò kû̌ na pě. He glè̌ htû̌sò̌htò̌ Cǒmara tûjû̌pwa̤ ami̤.

¹⁸ He ma̤lǒma̤be he ta̤olò̤ heyô̤̌ kû̌ Cǒmara tûjû̌pwa̤ nutokhlǒ dǒ akòyò lǒ̤bò alô̤mô̤̌ pě.

¹⁹ Ǒ Wî̤̌yarǔshôlephû̌ sî, he glè̌ ma̤lǒbe he ta̤olò̤ he yô̤̌nu dǒ Cǒmara tûjû̌pwa̤ ata̤lṳ̌htò̌hô ô̌ wî̤̌ kǎmakû nupě. Htû̌sò̌htò̌ Cǒmara tûjû̌pwa̤.