Htû̌sò̌htò̌ 112 - Kawyaw New Testament

Kòyòcǒkòyòtè̤ ata̤ǐshowî̤ tokhlǒ

¹ Htû̌sò̌htò̌ Cǒmara tûjû̌pwa̤. Kòyò dǒ a ǐsha bè̌dubè̌nǎ̤ Cǒmara tûjû̌pwa̤ dě a sǎphlǒô̌ jûlě̤phǐ ta̤mǎlò̤nu a nǐ̤bǎ ta̤ǐshowî̤.

² Bǎ hǎkhû̌nu, aphû̌ali̤ bwǐdû̌sîrîhtû pě. Kòyòcǒkòyòtè̤ akhlialè nǐ̤bǎ ta̤ǐshowî̤ pě.

³ Ta̤lě̤dû̌pwî̤htû, ta̤dû̌yò̤̌htò̌sa sîtokhlǒ ô̌ dǒ ahǐdǒkû. Ata̤cǒta̤tè̤ ô̌měô̌gle tûjû̌pwa̤ pě.

⁴ Asî ma̤bwǐma̤sîsî kòyò, gwèbǎǐ kòyò, acǒatè̤ akhû̌akhî, asô̌sô̌kû̌ ta̤lî tômè dǒ a lîkakhalṳ̌ bǎ kòyò sǎphlǒwô̌.

⁵ Kòyò dǒ a sǎleǐ ata tô̤̌, a dǐlô̤̌dǐbǒpè̤̌ kòyò, a kè̌lǎcǒtè̤ ruhtanu, a ǎbǎôbǎ pě.

⁶ Kòyò sǎphlǒwô̌nu, a lò̤jû̌ tôkhò̌ tô̤̌. Kòyò shôpe̤jò lû̌û tôkhò̌ tô̤̌tô̤̌.

⁷ A ganǎ̤de ta̤we̤ta̤kè dǒ awô̌tô̤̌ tokhlǒ bǎbǎ a ǐsha tô̤̌. A yṳ̌ǎ kè̌shuǐ Cǒmara tûjû̌pwa̤ akhû̌akhî, a sǎphlǒshû̌ sǎphlǒsho mî̌ca.

⁸ A sǎphlǒshû̌ sǎphlǒsho mî̌ca dě a ǐsha tôcǒtô̤̌. Dǒ anô̌kò gutṳ̌ pě dě, a kè̌shǐ Cǒmara ma̤pî̌kè a pwa̤sǎkhě nutokhlǒ pě.

⁹ Pwa̤cǒpwa̤tè̤ tôpwa̤ sǎphlǒshû̌ ma̤jè̌ kòyò hǎwě̤shèwè̤. Ata̤cǒta̤tè̤ nî̌ a ô̌měô̌gle tûjû̌pwa̤. A nǐ̤bǎ ta̤bwǐdû̌sîrîhtû, kòyò bè̌dubè̌nǎ̤ a pě.

¹⁰ Kòyòkhu phû̌mò̤̌ kè̌shǐ ata̤ma̤ dě a sǎphlǒ gû̌gè̌ mî̌ca pě. Asî sǎphlǒdû̌ gwěbò khû̌khi dě a hǎmǎkèbò pě. Ata̤sǎyṳ tokhlǒnu, a nǐ̤bǎ pe tôcǒ tô̤̌.