Htû̌sò̌htò̌ 111 - Kawyaw New Testament

Htû̌sò̌htò̌ Cǒmara tûjû̌pwa̤ ata̤ma̤wô̌

¹ Htû̌sò̌htò̌ Cǒmara tûjû̌pwa̤. Bǎ kòyòcǒkòyòtè̤ kû̌ kòyòsaprṳ̂ cubucaba wô̤̌wô̤̌ lû̌û akhanu, he hî̌bwǐhî̌sîrîhtò̌ Cǒmara tûjû̌pwa̤ kû̌ he sǎphlǒ lǒ̤bò.

² Cǒmara tûjû̌pwa̤ ma̤ ta̤nu acô̌klî̌cô̌sè mî̌ca. Kòyò dǒ asǎphlǒô̌ ta̤ma̤ cô̌klǐcô̌sè tokhlǒnu, a kè̌shǐsî̌ya lô̌khô.

³ Ata̤ma̤ tokhlǒnu, a lǒbe kû̌ ta̤sîrîdû̌sîrîhtû, ta̤pô̤ta̤phǎ. Ata̤cǒta̤tè̤ tokhlǒnu agutṳ̌ pe tô̤̌.

⁴ A no to̤ǐ kòyò kû̌ ata̤ma̤cô̌klǐcô̌sè. Cǒmara tûjû̌pwa̤ mî̌ a ma̤bwǐma̤sîsî, gwèbǎǐ kòyò.

⁵ A dǐǎdǐô kòyò dǒ a ǐsha bè̌dubè̌nǎ̤ lû̌û nu. A to̤ǐ ata̤olò̤ pṳ̂̌tôplǎ.

⁶ Dǒ a ǐ kè khlilèphû̌ shǔshawa̤ tokhlǒ hǎkhû̌ kû̌ a kòyò akhû̌akhî, a dǔlṳ̌ a kòyò sîtokhlǒ kû̌ ata̤ma̤ dǒ asîrîpô̤phǎ dû̌ mî̌ca nuhǒ.

⁷ Lǒ̤bò a ma̤ ta̤ tokhlǒnu acǒatè̤, atôabǎ. Lǒ̤bò ata̤mǎlò̤ tokhlǒnu a gwǎ yṳ̌ǎnǎla̤ǐ mî̌ca.

⁸ Ta̤mǎlò̤ nutokhlǒ mî̌ a ô̌měô̌gle tûjû̌pwa̤. Cǒmara ǐlò̤ ata̤mǎlò̤ dǒ acǒatè̤, atôabǎ lǒ̤bònu.

⁹ Cǒmara ma̤hǎplǎbǎ a kòyò. A olò̤ ata̤olò̤ tûjû̌pwa̤. A mî̌ Cǒmara dǒ aplò̌ashǐ, Cǒmara dǒ kòyò ǐsha bè̌dubè̌nǎ̤ ami̤ nutôpwa̤.

¹⁰ Ta̤ǐsha bè̌dubè̌nǎ̤ Cǒmara tûjû̌pwa̤ mî̌ ta̤sî̌ta̤jò̌ akòshî̌kòtṳ̌. Lǒ̤bò kòyò dǒ a jûlě̤phǐ ta̤mǎlò̤ tokhlǒnu, a nǐ̤bǎ ta̤sî̌yaplôphǎ. Kòyò htû̌sò̌htò̌ pû yǎ tûjû̌pwa̤.