Htû̌sò̌htò̌ 109 - Kawyaw New Testament

Kwihtò̌ ta̤ma̤jè̌ dǒ Cǒmara tûjû̌pwa̤ a ô̌

Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya.

¹ Ǒ Cǒmaradû̌, he htû̌sò̌htò̌ ǐtû̌ na. Jî̌koo tǎ̤mǎ̤ nî̌.

² Kòyòphû̌mò̤̌, kòyòcôklè lòhôǎ kòyò tokhlǒnu, a hî̌ takǎ bò he. Asî dô̌ lòhǎlòhò bò heyô̤.

³ Asî ô̌te̤we̤, hî̌bǎ sǎkhěkhû̌khwè bò he. He ma̤sǔma̤plě asî tôcǒ tô̤̌ bǎbǎkǎlè asî hèshě bò he.

⁴ He mô̤ǐ asî bǎbǎkǎlè asî bè̌ta̤sǔ pe lô̌khô he. He caba gutṳ̌ bǎpe dǒ asîya pwǎ.

⁵ He ma̤wô̌pwǎ asî bǎbǎkǎlè asî ma̤phǔmò̤̌ còcè̌ he. He mô̤ǐ asî bǎbǎkǎlè asî sǎkhěkhû̌khwè lô̌khô he.

⁶ Rû̌htò̌ kòyòphû̌mò̤̌ tôpwa̤ dě no shěshǔma̤khǔkè kû̌ lû̌nu. No ihtǒô̌ pwa̤gèwè̤̌ lû̌û ta̤sǔ dǒ lû̌kòshǐ tôpwa̤nu.

⁷ Bǎ kòyò ma̤kè̌kè̌ lû̌û akhanu, kòyò gǔ dò̌ lû̌ ta̤sǔ pě nî̌. Ata̤kwicabanu, no htûhtò̌ kè lû̌û pô̤̌ ta̤sǔ nunî̌.

⁸ A lṳmṳ̌ni̤ lṳmṳ̌sa gǔ phǔkè tûû̌ pe nî̌. Kòyò gǔ nomǎ̤ agûlǎ̤ tôpwa̤pwa̤ pě nî̌.

⁹ A phû̌ tokhlǒ gǔ shôdôphǎkè tûû̌ pě nî̌. Ama gǔ ô̌khwè̌kè tû̌pě nî̌.

¹⁰ Aphû̌ tokhlǒ gǔ htûkè bò pwa̤kwiǎta̤ pě nî̌꤮. Asî ô̌ dǒ ahǐphòyò̤̌kû dě bǎ hǎhtò̌cû̌ kè̌lǎtû̌ alǎ̤ǎlǎ̤ô pě nî̌꤮.

¹¹ Kòyò dǒ ashû̌běcǎ ô̌ kòyò nutokhlǒ gǔ phî̌ge bò lû̌tě̤ta̤ pě nî̌꤮. Shilǎ̤gǎkhlophû̌ tokhlǒ gǔ phǐsugwǐkè bò lû̌tě̤ta̤ dǒ a ǎwè̤ ǐtû̌ nutokhlǒ pě nî̌.

¹² No ô̌ tǎ̤ kòyò dǒ a ma̤mô̤ma̤wô̌ lû̌û tôpwa̤ tǎ̤mǎ̤. No ô̌ tǎ̤ kòyò dǒ a gwèbǎǐ lû̌phû̌ dǒ a shôdôpha nutokhlǒ tôpwa̤ tǎ̤mǎ̤mǎ̤.

¹³ Akhlialè tokhlǒ gǔ tṳ̌kè tû̌ pě nî̌. Kòyò dǒ nô̌kò tôhtu pe tokhlǒ gǔ shôpe̤ bòkètû̌ lû̌mi̤ pě nî̌.

¹⁴ Cǒmara tûjû̌pwa̤ gǔ tǒ̤mǎǐ tûû̌ aphiaphu sîtokhlǒ ata̤sǔta̤phû̌mò̤̌ nî̌꤮. Plûkè bǎ tǎ̤ amǒ̤ ta̤sǔ nutǎ̤mǎ̤ nî̌꤮.

^15-16 A ma̤mô̤ma̤wô̌ kû̌ kòyò tô̤̌, a ma̤jî̌ma̤jû̌, ma̤sima̤mǎ̤ kòyò dǒ kòyò pè̤̌ǎpè̤̌ô lû̌û, kòyò dǒ a shôdô pwa̤ma̤jè̌ kû̌ kòyòsǎphlǒpî̌ nutokhlǒ akhû̌akhî, Cǒmara tûjû̌pwa̤ gǔ tô̤̌mǎǐ tû̌ asî ta̤ma̤sǔnu pṳ̂̌ tôplǎ nî̌. Bǎ hǎkhû̌nu no gènè̤htò̌tǒ̤ pe tǎ̤ kòyò kû̌ ami̤nu tǎ̤mǎ̤.

¹⁷ A sǎyṳ ǐsho còcè̌ kòyò akhû̌akhî, no lò̤bǎ gesô̌tû̌ lû̌ kû̌ ta̤ǐsho nî̌. A sǎyṳ ǐshowî̤ kû̌ kòyò tôkhò̌ tô̤̌ akhû̌akhî, no nǐ̤bǎ tǎ̤ a ta̤hôwe̤hôwô̌ tîkî̌ tǎ̤mǎ̤.

¹⁸ No bôte̤we̤bǐ a kû̌ ta̤ǐsho pô̤̌ a sô̌ jenu. No lò̤jûnṳ̌tû̌ ta̤ǐsho sô̌sô̌kû̌ je cô̌nu acô̌nṳ̌kè dǒ aběyî̌kûnu. No lò̤nṳ̌tû̌ ta̤ǐsho sô̌sô̌kû̌ htǒshi lò̤nṳ̌ dǒ khwǐgîkûnu.

¹⁹ Ta̤ǐshonu ô̌te̤we̤bǐ bò lû̌û pô̤̌ a sô̌te̤we̤ bǐbò je nu. Ta̤ǐshonu te̤we̤bǐ bò lû̌ pô̤̌ kòyò è̌te̤we̤bǐ sǎto̤ pṳ̂̌ni̤ni̤nu.

²⁰ Cǒmara tûjû̌pwa̤ gǔ ma̤ geshî̌shǔ gesô̌tû̌ kòyò dǒ a bè̌ta̤sǔ he, a hî̌ phû̌mò̤̌shî̌htô he nunî̌.

²¹ Ǒ Cǒmara tûjû̌pwa̤, he Běcǎdû̌, dǒ lǎ̤bè̌dubè̌nǎ̤ǐ nami̤wî̤mi̤wô̌ nuaya, ma̤jè̌ mò̌ he. Nata̤mô̤ dǒ ahǎbòjò tô̤̌nu awô̌꤮ jî̌le akhû̌akhî, ma̤hǎplǎkèmò̌ he.

²² Kòyò pè̤̌ǎpè̤̌ô he, he shôdô pwa̤ma̤jè̌. Asha꤮ jî̌le hesǎphlǒ.

²³ He glè̌ hǎmǎ phwèkè asô̌sô̌kû̌ heyô̤ǔ lǎ̤hǎmǎkè bǎ lṳmṳ̌lò̤tě̤ akha. He sô̌sô̌kû̌ dèpǒ̤ dǒ gili̤sǎ sǎcû̌hǎmǎkè lû̌û nu.

²⁴ He dǔǎ shǎ akhû̌akhî, he khò̌delǎ̤ jǎbò hǒ. A ô̌kè pwǎ tǒ̤꤮ hekhwǐ kû̌ hebě pwǎ.

²⁵ Pwa̤sǎkhě he tokhlǒ kè̌shǐ he bǎtè tôkû bǎbǎ, a pî̤jî̌ǐsho bò he. A nǒlò̤ lô̌khô a ikǒ dě a sǎyî̤̌ bò he.

²⁶ Ǒ Cǒmara tûjû̌pwa̤, he Cǒmaradû̌, ma̤jè̌mò̌ he. Nata̤mô̤ nî̌ ahǎbòjò tô̤̌ akhû̌akhî, ma̤hǎplǎ he.

²⁷ Ǒ Cǒmara tûjû̌pwa̤, no sî̌ganǎ̤ tě̤tě̤mè̤̌mè̤̌ asî kû̌ na ma̤ ta̤ lǒ̤bò, na ma̤htûhtò̌bò kû̌ nanǎ̤.

²⁸ Asî dě a ǐsho he, na dě na ǐshowî̤ he. Bǎ asî hèshě he akhanu, no lò̤jû̌kè bò asî, bǎbǎkǎlè no sǎlě̤sǎlò̤ pû na pwa̤ma̤ta̤phû̌ amè̤̌kû̌ he nî̌.

²⁹ Pwa̤sǎkhě he tokhlǒ shòwò̤̌ mǐ̤sǎphû̌mò̤̌ bò nî̌. No kûsô̌htò̌bò asî ta̤shòwò̤̌ pô̤̌ kòyò kûsô̌htò̌bǐ anǎ̤ kû̌ jehǐyò̤̌nu.

³⁰ He hî̌bwǐsîrî mè̤̌caca Cǒmara tûjû̌pwa̤. He htû̌sò̌htò̌ a dǒ kòyòsaprṳ̂ akla.

³¹ Cǒmara tûjû̌pwa̤ tugutakaǐ tě̤tṳshǔ, ma̤hǎplǎge kòyò dǒ a shôdô pwa̤ma̤jè̌ dě kòyò cî̌htò̌si yǎnu.