Htû̌sò̌htò̌ 107 - Kawyaw New Testament

Lî̤htû̌sû̌htò̌ yè̤̌bǎ tôbǎ Cǒmara tûjû̌pwa̤ ata̤mô̤ dǒ ahǎbòjò tô̤̌

¹ No hî̌bò kòyò kû̌, Cǒmara tûjû̌pwa̤ wô̌ mî̌ca, hî̌bwǐhî̌sîrîhtò̌ lô̌khô yǎ. Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤.

² Kòyò dǒ Cǒmara tûjû̌pwa̤ ma̤hǎplǎge yǎ nutokhlǒ, kòyò dǒ a rû̌htò̌ge lû̌û dǒ pwa̤sǎkhě asî tokhlǒ cǔdekû nutokhlǒ bǎbǎ,

³ Kòyò dǒ a kaǎgeplǒ bò dǒ gǎshǔshawa̤ gǎkhlo dǒ lṳmṳ̌htò̌ tôkhô, lṳmṳ̌nṳ̌ tôkhô, gǎcûmû kû̌ gǎcôcî̌ tôkhô nutokhlǒ bǎbǎ, hî̌bwǐhî̌sîrîhtò̌ lô̌khô lû̌û.

⁴ Kòyò tokhlǒkhlǒ lètewe̤ tônô̤ ashěkhǎ bǎ gǎshashigǎkhû̌. Asî kè̌shǐ klè̌ lǎ̤cû̌ dǒ asî lǎ̤ô̌ǐ wî̤̌ nutôwî̤̌ tô̤̌.

⁵ Asî sǎǎsǎô mî̌ca shǎǎshǎô, a glè̌si tè̤tè̤̌hǒ.

⁶ Asî ô̌ dǒ ta̤pò̤̌ta̤sha akû dě a kwisǎyṳhtò̌ Cǒmara tûjû̌pwa̤. A ma̤hǎplǎ asî dǒ ta̤khòjî̌khòjû̌ akû.

⁷ Pô̤̌khô asî glè̌ cû̌tǒ̤ dǒ asî lǎ̤ô̌ǐ wî̤̌ nutôwî̤̌ ayanu, a sûcû̌ asî dǒ klè̌tôklè̌bǎ nutôbô.

⁸ Cǒmara tûjû̌pwa̤ mô̤nṳ̌ kòyò hǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤nṳ̌ bǎ kòyò ta̤cô̌klǐcô̌sènu akhû̌akhî, no hî̌bwǐhî̌sîrîhtò̌ mò̌ asî.

⁹ A dǐ ôkǒôbe kòyò dǒ a sǎwǐ̤sǎô shinu. A dǐ ǎkǒôbe kòyò dǒ a sǎwǐ̤sǎô shǎǎshǎônu.

¹⁰ Kòyò tokhlǒkhlǒ ô̌ lô̌khô bǎ gûlǎ̤ bǎ akhǐsiwi̤ jî̌jî̌ akû. Asî lò̤tě̤bò dǒ apô̤kû, kòyò comě asî kû̌ sǒpli̤ tě̤htò̌.

¹¹ Asî ma̤takǎshǔ Cǒmaradû̌ hî̌bǎlò̤ ata̤hî̌bǎnu, a jûlě̤phǐyô̤̌ Cǒmara dǒ adû̌ahtûgutṳ̌ nutôpwa̤ ata̤sû̌ǐtòwòǐ tô̤̌ akhû̌akhî, asî khòbǎ lô̌khô pô̤̌nu.

¹² Pô̤̌khô asî glè̌ yò̤lǎ̤ lô̌khô anǎ̤nu, Cǒmara nophǐnoma̤ asî ta̤ma̤ dǒ ajî̌ajû̌ nu. Asî kè̌shǐtṳ̌bǎbò kû̌ ta̤pò̤̌ta̤sha dě pwa̤ ma̤jè̌ asî ô̌ tôpwa̤ tô̤̌.

¹³ Ashuphushèwè̤ mî̌ca asî dě a kwisǎyṳhtò̌ Cǒmara tûjû̌pwa̤. A ma̤hǎplǎkè asî dǒ ta̤khòjî̌khòjû̌ akû.

¹⁴ A kaǎ hǎhtò̌ asî dǒ gûlǎ̤ akhǐsiwi̤ jî̌jî̌ nutôkû akû. A ma̤htò̌tṳ̌kè bǎ bò asî sǒpli̤ tě̤htò̌.

¹⁵ Cǒmara tûjû̌pwa̤ mô̤nṳ̌ kòyò hǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤nṳ̌ bǎ kòyò ta̤cô̌klǐcô̌sènu akhû̌akhî, no hî̌bwǐhî̌sîrîhtò̌ mò̌ asî.

¹⁶ A ma̤pò̌bò apô̤ takhadû̌ tokhlǒ dǒ kòyò ma̤ lû̌û kû̌ tilibò. A ma̤lagǎkè bò tě̤htò̌bô dǒ kòyò wṳ̂̌tě̤tṳ̌nu.

¹⁷ Kòyò ǒò̌phuhtò ikǒpwǐ̤, ma̤tò̤̌ ta̤. Asî ma̤sǔma̤plě pô̤̌nukhû̌khî, ashǐasha lǒ̤bò.

¹⁸ Asî ma̤yǒ̤ bò shǎǎshǎô pṳ̂̌tôcǒ. Asî glè̌si tètè̤̌ bò hǒ.

¹⁹ Asî ô̌ dǒ ta̤pò̤̌ta̤sha akû dě a kwisǎyṳhtò̌ Cǒmara tûjû̌pwa̤. A ma̤hǎplǎge asî dǒ ta̤sǎphlǒgû̌gè̌ akû.

²⁰ A hî̌lò̤ ayô̤̌ dě a ma̤hǎmǎ bǎ asî ta̤shǐ. A ma̤hǎplǎ asî dǒ ta̤si akû.

²¹ Cǒmara tûjû̌pwa̤ mô̤nṳ̌ kòyò hǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤nṳ̌ bǎ kòyò ta̤cô̌klǐcô̌sènu akhû̌akhî, no hî̌bwǐhî̌sîrîhtò̌ mò̌ asî.

²² No lṳtòhtò̌ asî ta̤hî̌bwǐsîrî ata̤lṳta̤tònu. No sǎlě̤sǎlò̤ sǎwǐ hî̌lṳ̌ asî kû̌ ta̤ dǒ a ma̤hto bǎ asînu.

²³ Kòyò tokhlǒkhlǒ cû̌ge kû̌ sǒkhlidû̌ dǒ shidû̌te̤we̤kû, asî ma̤kuma̤khǎ ta̤ bǎnu.

²⁴ Asî kè̌shǐ Cǒmara tûjû̌pwa̤ ata̤phǐta̤ma̤. Asî kè̌shǐ ata̤ma̤ cô̌klǐcô̌sè dǒ shidû̌shite̤we̤ yô̤̌ akû.

²⁵ A hî̌lò̤pwǎ ayô̤̌ dě gili̤sǎ plǎwi̤, shi pěpǒdû̌ hè.

²⁶ Asî sǒkhlidû̌ lě̤lṳ lûhtò̌ dǒ gili̤sǎkla, lûlò̤ dǒ shipěpǒ plǎ akû. Asî ǐsha gònò̤̌gòglè lǒ̤bò.

²⁷ Asî cû̌ lûhtôlûlò̤ sô̌sô̌kû̌ pwa̤ômṳshi. Asî lǎ̤klô sî̌ya khlòjò sǒkhlidû̌ awe̤akènu, a tṳ̌dèbò pwǎ.

²⁸ Asî ô̌ dǒ ta̤pò̤̌ta̤sha akû dě a kwisǎyṳhtò̌ Cǒmara tûjû̌pwa̤. A ma̤hǎplǎkè asî dǒ ta̤jî̌ta̤jû̌ akû.

²⁹ A no ô̌kǔkèbò gili̤sǎdû̌ dě shipěpǒ ô̌kǔkèbò

³⁰ Shipěpǒdû̌ ô̌kǔ kèbò akhû̌akhî, asî sǎlě̤sǎlò̤. Cǒmara sûcû̌tǒ̤ asî dǒ asî lǎ̤cû̌bè̌ô̌kǔ sǒkhlidû̌ gûlǎ̤ nutôkû.

³¹ Cǒmara tûjû̌pwa̤ mô̤ǐ kòyòhǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤ bǎ kòyò ta̤cô̌klǐcô̌sè akhû̌akhî, no hî̌bwǐhî̌sîrîhtò̌ mò̌ asî.

³² No bè̌dubè̌nǎ̤mò̌ asî kû̌ Cǒmara tûjû̌pwa̤ dǒ kòyòsaprû akla. No htû̌sò̌htò̌ mò̌ asî kû̌ Cǒmara dǒ khlilèphû̌ aikǒlǒkò tokhlǒ ta̤ô̌htuhî̌bǎplǒ akû.

³³ Cǒmara no htûhtò̌ shilô̤̌mǒ̤ tokhlǒ kû̌ gǎshashigǎ. A no htûhtò̌ shipo̤hǎhtò̌ gûlǎ̤ tokhlǒ kû̌ hǎkhû̌khwedǎtrè̌.

³⁴ Kòyò dǒ a ô̌ bǎnutokhlǒ ma̤ ta̤phû̌mò̤̌shǐhtô akhû̌akhî, a no htûhtò̌ kèbò hǎkhû̌wî̤hǎkhû̌wô̌khû̌ nukû̌ hǎkhû̌cakwǎ.

³⁵ A no htûhtò̌ gǎshashigǎ kû̌ shikoǒ. A no htûhtò̌ hǎkhû̌khwedǎtrè̌ kû̌ shipǒ̤hǎhtò̌.

³⁶ A no ô̌ kòyòô̌tiwǐ̤ bǎ gûlǎ̤ nutôkû. Asî ma̤htò̌ ǐtûû̌ lô̌khô awî̤̌phû̌.

³⁷ Asî ma̤ǎ lô̌khô hǔklalǎ̤, a shǒǐ ǐtû̌ lô̌khô sîpî̌mṳ̌. Asî nǐ̤bǎge dû̌wî̤ mî̌ca sîpî̌sǎ.

³⁸ Cǒmara ǐshowî̤ asî akhû̌akhî, asî hǐphû̌phòphû̌ ô̌wô̤̌ô̌dû̌htò̌. A no tûyû̌ kalò̤lò̤ nǒ asîta̤phû̌ta̤li̤ tô̤̌.

³⁹ Asî kòyò ô̌pî̌tî̌ yû̌ kalò̤ akhanu kòyò pè̤̌ǎpè̤̌ô asî ma̤jî̌ma̤jû̌ asî dě sǎpla̤nǎ̤bǎbò.

⁴⁰ Cǒmara ma̤sòwò̤kè lǒ̤bò pwa̤pǒta̤ nutokhlǒ. A no lètewe̤ bòshěkhǎ tṳ̌dèkè asî bǎ gǎshashigǎkhû̌nu.

⁴¹ Bǎbǎkǎlè a bè̌htò̌yô̤̌ kòyò shôdô pwa̤ma̤jè̌ dǒ ta̤ma̤jî̌ma̤jû̌ akû. A no ô̌wô̤̌ô̌plû htò̌ asîhǐphû̌phòphû̌ asô̌sô̌cǎkû̌ sû̌phû̌sî.

⁴² Kòyòcǒkòyòtè̤ kè̌shǐ dě a sǎlě̤sǎlò̤ Lǒ̤bò kòyòphû̌mò̤̌ nudě a ô̌ sǔtukǔ꤮ kèbò.

⁴³ No gènè̤tě̤mè̤̌bò ta̤ nutokhlǒ kû̌ kòyò dǒ ata̤sî̌ta̤jò̌ ô̌nu. No sî̌ganǎ̤ tě̤tôbò asî kû̌ Cǒmara tûjû̌pwa̤ ata̤mô̤ dǒ ahǎbòjò tô̤̌ nunî̌.