Htû̌sò̌htò̌ 105 - Kawyaw New Testament

Cǒmaradû̌ ma̤hǎplǎ a kòyò tokhlǒ

¹ Hî̌bwǐhî̌sîrî Cǒmara tûjû̌pwa̤, kwicabahtò̌ kû̌ ami̤. Dǐ sî̌ganǎ̤ padô̌ khlilèphû̌ tokhlǒ kû̌ a ma̤ hto ta̤ hǒnu.

² Sǎwǐhtò̌mò̌ yǎ, sǎwǐ htû̌sò̌htò̌mò̌ yǎ. Shôbǐǐlṳ̌ bǎbòmò̌ kòyò kû̌ lǒ̤bò a ma̤ ta̤cô̌klǐcô̌sènu.

³ Htû̌sò̌htò̌ mò̌ ami̤plò̌shǐ. No sǎlě̤sǎlò̤ mò̌ kòyò dǒ a kè̌lǎ Cǒmara tûjû̌pwa̤nu.

⁴ Kè̌lǎ mò̌ Cǒmara tûjû̌pwa̤, kwihtò̌ mò̌ ata̤khû̌ta̤ǎ. Pṳ̂̌plǎplǎ hèphǔ dǒ alô̤mô̤̌.

⁵ Gènè̤̌htò̌bǎ ta̤cô̌klǐcô̌sè, ta̤ ǒò̌ kiti̤kaa, ta̤cî̌htò̌tôcî̌htò̌bǎ dǒ a ma̤htonu.

⁶ Sî mî̌ Cǒmaradû̌ apwa̤ma̤ta̤phû̌ amè̤̌kû̌ PhaAbraha aphû̌ali̤ hǒ. Sî mî̌ Phayakò akhlialè dǒ Cǒmara rû̌htò̌ tokhlǒ hǒhǒ.

⁷ A mî̌ Cǒmara tûjû̌pwa̤, amè̤̌ pa Cǒmaradû̌ hǒ. A cî̌htò̌cǒ cî̌htò̌tô bò hǎkhû̌běkhû̌.

⁸ A gènè̤nṳ̌ ata̤olò̤ pṳ̂̌tôplǎ. Ayô̤̌ dǒ a olò̤ hto tokhlǒnu, kòyò tôhtu hto tôhtu, htu dǒ arî̌kû a shôpe̤ pè̤̌ tô̤̌.

⁹ A cǒ kû̌ ayô̤̌ dǒ a olò̤ hto kû̌ PhaAbraha, a wṳ̂̌dòlò̤ hto kû̌ Pha Isè̌nu.

¹⁰ A bè̌měbè̌gle ta̤sû̌ta̤tòwò kû̌ Phayakò. A olò̤ měgle ayô̤̌ kû̌ PhaIsôrěla tûjû̌pwa̤.

¹¹ A hî̌ kû̌, “He ǐ na Khanagǎ pô̤̌ na û̌cata̤bǐ.”

¹² Bǎ a hî̌ ayô̤̌ pô̤̌o akhanu, asî ô̌tîkî̌phû̌ nô̤̌ pe pwǎ. Asî htû shǐpwǎ̤shǐmè̤ dǒ Khana̤gǎkû pî̌tî̌phû̌nô̤̌ pwǎ.

¹³ Asî cû̌ tôgǎ hto tôgǎ, tôkû hto tôkû.

¹⁴ A no ma̤jî̌ma̤jû̌ asî kû̌ kòyò tôpwa̤ tô̤̌. Dǒ asî ayanu, a dǐsè̌rè̌ǐ khwǐ tokhlǒ dǒ a glè̌ tugutakaǐ asî.

¹⁵ A hî̌ kû̌, “Ma̤bǎma̤sha tǎ̤ kòyò dǒ he rû̌htò̌ a nutokhlǒ mǎ̤. “Ma̤shama̤htò tǎ̤ hepiwi̤pèsè nutokhlǒ mǎ̤.”

¹⁶ Cǒmara tûjû̌pwa̤ no ô̌htûhtò̌ gǎwǐ̤gǎkodû̌ dǒ Khana̤gǎkû. A ma̤pî̌ma̤kè kèbò sǒsǎwû̌phô bǔmṳ̌ sîtokhlǒ.

¹⁷ A sûcû̌wǐ bǎ kòyò tôpwa̤ dǒ asî alô̤mô̤̌. Kòyò shaǎcû̌kè Khûyûtǎ dǒ Ijǐgǎ pô̤̌ jû̌ tôpwa̤.

¹⁸ Kòyò comě htòbò akhò̌lôpô̤̌ kû̌ sǒpli̤ tě̤htò̌. Kòyò tûplû̌nṳ̌ tě̤htò̌pli̤ dǒ agô̌bôlô̤.

¹⁹ Cǒmara tûjû̌pwa̤ hî̌nǎ ayô̤̌ tokhlǒ lǒhtò̌behtò̌ khôtô̤̌nu, a ma̤kè̌kè̌ pe Khûyûtǎ ata̤bè̌ sǎphlǒ.

²⁰ Ijî̌gǎkhwǐ plûhǎhtò̌ kè Khûyûtǎ. Pwa̤pǒǐ kòyò tokhlǒ nutôpwa̤ plûhǎhtò̌ kè lû̌û.

²¹ Khwǐ no htû lû̌û kû̌ pwa̤pǒǐ ahôhta. A no pǒǐ lû̌û kû̌ khwǐ atě̤ta̤ lǒ̤bò.

²² Khûyûtǎ nè̌klè̌nè̌klò bò̌ khwǐ apwa̤ma̤ta̤phû̌ tokhlǒ pô̤̌ ata̤sǎyṳ ô̌nu. A sû̌ǐtòwòǐlò̤ pwa̤htû ikǒlǒkò̌dû̌ dǒ a dǐsî̌yajè̌ khwǐ nutôpwa̤ tokhlǒnu.

²³ Htodě PhaIsôrěla hètǒ̤ bǎ Ijǐgǎ. A hè htû gû̌mṳ̂̌ shǐtèmè̤ bǎ Hama khlilèphû̌ ô̌ ǐ gǎkû.

²⁴ Cǒmara tûjû̌pwa̤ no phû̌ô̌wô̤̌ li̤ô̌plṳ̂ a kòyò. A no cǔshokhò̌sho khlo asî kû̌ pwa̤sǎkhě asînu.

²⁵ A no htû̌lè̌tèplè̌ khô̌kè Ijǐ khlilèphû̌ asǎphlǒ. A no sǎkhěkkhû̌khwè Ijǐ khlilèphû̌ tokhlǒ kû̌ Cǒmara apwa̤ma̤ta̤phû̌ tokhlǒ.

²⁶ A sûhè apwa̤ma̤ta̤phû̌ KhûMûshě kû̌ Pha Arṳ̂ dǒ a rû̌htò̌ nusò̌ginǐ̤.

²⁷ KhûMûshě kû̌ Pha Arṳ̂ dǐlṳ̌ bǎ Cǒmara ata̤ma̤ǒò̌ sû̌khǔsû̌sò̌ dǒ Ijî̌khlilèphû̌ akla. A dǔlṳ̌ pô̤̌ ta̤ma̤cô̌klî̌cô̌sè dǒ Hama khlilèphû̌ agǎkû.

²⁸ Cǒmara no khǐlò̤bò tôgǎ lǎ̤bò. Bǎbǎkǎlè Ijî̌ khlilèphû̌ ma̤takǎshǔ ayô̤̌ dǒ a hî̌bǎhtò̌ nutô̤̌.

²⁹ Cǒmara no htûhtò̌kèbò asî shilô̤̌mǒ̤dû̌ kû̌ sǐ, dě tò̤̌phû̌ sikè lǒ̤bò.

³⁰ Dî̌phû̌ tokhlǒ ô̌be tîpî̌ lǒ̤bò dǒ asîgǎkû pṳ̂̌ tôkû. A cû̌tǒ̤ ô̌tǒ̤ bò dǒ khwǐcaphǎ hôhtakû.

³¹ Bǎ Cǒmara hî̌bǎlò̤ ayô̤̌ akhanu, phǔsî̌phû̌ kû̌ kadǎ tokhlǒ a wî̤cû̌ ô̌bebò asîgǎ tôgǎ.

³² Gǎ tô ju dǒ asîgǎ tôgǎbò bǎbǎkǎlè Cǒmara no julò̤ siwǐ̤jî̌, anolò̤ shî̌lî̌ dǒ asî gǎkû.

³³ A ma̤pî̌ kèbò Ijî̌phû̌ sîpî̌mṳ̌ kû̌ dǔshimṳ̌. A ma̤lòkhǔpo̤ ma̤lagǎ kèbò sǒmṳ̌ dǒ asîgǎkû.

³⁴ A hî̌lò̤ ayô̤̌ dě dèpǒ̤ tokhlǒ hèlò̤ lǒ̤bò. Dèpǒ̤ tokhlǒ mî̌ dô̌bòpè̤̌ pe tô̤̌.

³⁵ Asî lò̤ǎ bò sǒdosǒlǎ sulè̌sula ô̌ dǒ gǎkû. A lò̤ǎbò ta̤sǎta̤phô dǒ asî lǔǐǎǐ dǒ awe̤kûnu.

³⁶ Htodě Cǒmara ma̤sikèbò Ijǐ khlilèphû̌ aphû̌wè̤̌pwǎ̤. Phû̌wè̤̌pwǎ̤ mî̌ asî ta̤khû̌ta̤ǎ dǒ awǐlǒ tôcǒ.

³⁷ A kaǎhtò̌gekè Isôrělaphû̌ tokhlǒ, asî tô̤̌geǐ lô̌khô ruhta. Dǒ asî khlilè aklanu, ata̤khû̌shiǎjǎ ô̌ tôpwa̤ tô̤̌.

³⁸ Ijǐ khlilèphû̌ sîtokhlǒ ǐsha jî̌jû̌ Isôrělaphû̌ tokhlǒ alǎ̤ akhû̌akhî, bǎ asî hǎhtò̌ge akhanu, Ijǐ khlilèphû̌ tokhlǒ sǎlě̤sǎlò̤ lǒ̤bò.

³⁹ Cǒmara hǔbǐ tugǔtakabǐ asî kû̌ poǒlṳ̌. Lṳmṳ̌khǐ dě a shělîlò̤ bǎ asî kû̌ mî̌.

⁴⁰ Asî kwihtò̌ ta̤yî̌ dě a ǐlò̤ bǎ asî htû̌pwǐ. A ǐlò̤ bǎ asî kû̌ khòmû ô̌ dǒ mǒkhû̌ hèlò̤, asî ǎkǒôbe lǒ̤bò.

⁴¹ Cǒmara ma̤phò̌ bǎ asî lǒ̤ dě shi shěhtò̌. A lô̤̌꤮ cû̌ dǒ gǎshashigǎkhû̌ asô̌sô̌kû̌ shilô̤̌.

⁴² Pô̤̌nudě Cǒmara sî̌yatǒ̤ ata̤olò̤ dǒ aplò̌ashǐ dǒ a olò̤ hto kû̌ apwa̤ma̤ta̤phû̌ PhaAbrahanu dě a ma̤ bǎ asî pô̤̌nu.

⁴³ Pô̤̌nudě a kaǎge a kòyò dǒ Ijǐgǎkû kû̌ ta̤sǎlě̤sǎlò̤. A kaǎge a kòyò dǒ arû̌htò̌ǐ kû̌ ta̤sǎwǐ sǎlě̤sǎlò̤.

⁴⁴ Kòyò khlilèphû̌ shǔshawa̤ hǎkhû̌ hǔkla tokhlǒnu, a ǐbò kû̌ asî. Kòyò hǔkla dǒ kòyò jî̌pwǐ̤ma̤ǐ tokhlǒnu, a htûkè asî ta.

⁴⁵ Pô̤̌khô asî gǔ ganǎ̤de Cǒmara ata̤hî̌lò̤ yô̤̌sǎ dě asî jûǎbò ata̤sû̌ta̤tòwò ayanu, a ma̤ ta̤ nutokhlǒ pwǎ. Htû̌sò̌htò̌ Cǒmara tûjû̌pwa̤.