Htû̌sò̌htò̌ 104 - Kawyaw New Testament

Htû̌sò̌htò̌ǐ Cǒmara pwa̤bô̌lò̤ta̤

¹ He htû̌sò̌htò̌ Cǒmara tûjû̌pwa̤ kû̌ he sǎphlǒ tômèbò. Ǒ Cǒmara tûjû̌pwa̤, he Cǒmaradû̌, na mî̌ adû̌ahtû. Na kûsô̌htò̌ǐ ta̤bwǐdû̌sîrîhtû, ta̤lîta̤kakha.

² Na kûsô̌htò̌ǐhǒ ta̤lî pô̤̌ kòyò kûsô̌htò̌ jejû. Na hǔbǐhtò̌ mǒlǎ̤ pô̤̌ kòyò hǔbǐ hugò̌.

³ Na ma̤htò̌ǐ nahǐ dǒ poǒlṳ̌khû̌. Na noǐ poǒlṳ̌ pô̤̌ na tîsî̌lô̤. Na dò̌cû̌ǐ gili̤sǎ adî̌gî.

⁴ Na no htûhtò̌ gili̤sǎ pô̤̌ na tanaphû̌nu. Na no htûhtò̌ mî̌gè̌plô̤̌ pô̤̌ na pwa̤ma̤ta̤phû̌nu.

⁵ Na ma̤htò̌ hǎkhû̌ akòshî̌kòtṳ̌ dě a kuyṳ̌jò pè̤̌jò tô̤̌.

⁶ Na hǔbǐ hǎkhû̌ kû̌ shidû̌shite̤we̤ pô̤̌ kòyò hǔbǐ kû̌ jejû. Shi tokhlǒ dû̌htò̌ jò dǒ khôlô tokhlǒ akhi.

⁷ Na sǎhtǎdû̌da dě shi dû̌cû̌ tephekèbò hǒ. A ganǎ̤de na shî̌lî̌ dě a tṳplṳ̌tewě̤ hǎhtò̌cû̌ phwèkèbò hǒ.

⁸ Na no htûhtò̌dû̌htò̌ bòkè khôlô, na no lò̤yô̤̌kè lô̤̌. A htûhtò̌ bòkè pô̤̌ na sǎyṳ no htûhtò̌ asî dǒ agûlǎ̤ kû̌ agûlǎ̤nu.

⁹ Pô̤̌khô shi glè̌ dû̌bǐjò hǎkhû̌ tô̤̌nu, na ma̤mǎnǎ tě̤tṳ̌kè hto asîgǎhtu.

¹⁰ Na no lô̤̌cû̌bò shilô̤̌phû̌ dǒ lô̤̌te̤yô̤̌ akû. Shi lô̤̌cû̌ lô̌khô dǒ khôlôplǎ.

¹¹ Shilô̤̌ nutokhlǒ ǐ lǒ̤bò ta̤phû̌ta̤li̤ shilǎ̤ô. Mî̌ò̌lǎmi̤ sîtokhlǒ ôkǒôbe bò shi.

¹² Htû̌patǐ wi̤ dǒ mǒlǎ̤ ma̤ǐ api̤ bǎ shilô̤̌htu. A pwe̤htò̌ dǒ sǒdû̌khi.

¹³ Na ô̌ dǒ na hǐ mǒkhû̌, na no julò̤ gǎ dǒ khôlô sîtokhlǒ akhû̌. Hǎkhû̌nu a lǒbebò kû̌ na ta̤hôwe̤hôwô̌.

¹⁴ Na no dô̌htò̌ mi̤mṳ̌ dǒ ta̤phû̌ta̤wè̤ aya. Na no phǎhtò̌ sǒdogotǒ̤ dǒ kòyò hǎkhû̌phû̌ lǎ̤ǎ aya. Asî shǒǐ sǎhtò̌phôhtò̌ ǐjòpô̤̌ sǒsusǒsǎ bǎ hǎkhû̌.

¹⁵ Asî nǐ̤bǎ sîpî̌shisǐyô̤̌ dǒ a ma̤mô̤ kòyò hǎkhû̌phû̌ sǎphlǒ, htǒshi dǒ a ma̤ sǎyǎ̤ asî, kû̌ shǎǎshǎô dǒ a ǐ asî ta̤khû̌ta̤ǎ.

¹⁶ Cǒmara tûjû̌pwa̤ bô̌htò̌ sǒmṳ̌dû̌tònò dǒ Lebanû khôlôkhû̌, a nǐ̤bǎ lǒlǒbebe gǎjushi.

¹⁷ Htû̌patǐ tokhlǒ ma̤ǐ api̤ dǒ sǒmṳ̌ nutokhlǒ alô̤. Htû̌shiphalo̤dû̌ tokhlǒ ma̤ǐ alǎ̤ô̌ gûlǎ̤ dǒ sǒmṳ̌dû̌tònò akla.

¹⁸ Khôlôdû̌khôlôhtû mî̌ pè̤̌mi̤ lǎ̤ô̌tûdû. Lǒ̤dû̌lǒ̤htû mî̌ yṳ̌dodû̌ lǎ̤ô̌û̌.

¹⁹ Na bô̌lò̤nṳ̌bǎ la dǒ lǎ̤ma̤mǎnǎǐ gǎgû̌gǎju ashěakhǎ. Lṳmṳ̌nu a tôbǎ lò̤tě̤ bǎkhò̌tènu, a sî̌ganǎ̤ ǐtûû̌.

²⁰ Na bô̌lò̤ ta̤khǐ, a htûhtò̌ lṳmṳ̌khǐ. Lǒ̤bò ta̤phû̌ta̤wè̤̌ dǒ mi̤kla hǎhtò̌cû̌gǎ bǎnukha.

²¹ Khî tôlô cû̌lèpṳ̂̌ǎ ashǎ, agǒgaya̤ lô̌khô. A kè̌lǎ ashǎ lǎ̤ǎ dǒ Cǒmaradû̌ ǐ asînu.

²² Bǎ lṳ̌mṳ̌lîbû hè akhanu, asî getîkhî, a gehǎmôô̌ sô̌ dǒ akû.

²³ Kòyò hǎkhû̌phû̌ hǎhtò̌cû̌ ǎwè̤, a ǎwè̤ tǒ̤dǒ lṳmṳ̌lò̤tě̤.

²⁴ Ǒ Cǒmara tûjû̌pwa̤, na ma̤ ta̤ tokhlǒnu a ô̌wô̤̌ le. Na bô̌lò̤ ta̤ nutokhlǒ kû̌ ta̤sî̌ta̤jò̌ lǒ̤bò. Hǎkhû̌nu a ô̌ be bò kû̌ na ta̤bô̌ta̤tè.

²⁵ Shidû̌te̤we̤ numî̌ adû̌alè̤̌. Ta̤bô̌ adû̌dû̌ apî̌tî̌tî̌ dǒ a gòyò̤̌cû̌ dǒ shikû tokhlǒnu dô̌bòpè̤̌ pejò tô̤̌, a ô̌bò lô̌khô bǎnu.

²⁶ Sǒkhlidû̌ tokhlǒ cû̌le̤cû̌ge bǎnu. Tò̤̌phû̌ pǎdû̌ lawi̤ta dǒ na bô̌lò̤ lû̌ûnu a lǎ̤pě̤ lò̤wě̤lò̤sô mô̤ bǎnu.

²⁷ Pô̤̌khô na gǔ ǐ bò ta̤phû̌ta̤wè̤ nutokhlǒ ashǎǎshǎô ashěakhǎ kû̌ ashěakhǎ ayanudě, asî kè̌shuǐhtò̌ dǒ naô̌.

²⁸ Bǎ na ǐlò̤ asî shǎǎshǎô akhanu, asî nǐ̤bǎbò. Bǎ na yṳ̂̌lò̤ asî shǎǎshǎô akhanu, asî sǎphlǒmô̤bò.

²⁹ Bǎ na kè̌khô̌kè akhanu, asî ǐsha gònò̤̌gòglè lǒ̤bò. Bǎ na phî̌hǎhtò̌kè asî ta̤htûpwa̤ akhanu, asî sikè, a htûhtò̌bò sô̌ hǎkumṳ̌.

³⁰ Bǎ na sûhè bǎ asî na ta̤htûpwa̤ akhanu, na bô̌sa tèplè̌khô̌ asî. Na ma̤sawô̌ tîkhîsô̌ hǎkhû̌.

³¹ Cǒmara tûjû̌pwa̤ asîrîdû̌sîrîhtû ô̌ hènè pû tûjû̌pwa̤ talakhǎ nî̌. Cǒmara tûjû̌pwa̤ sǎlě̤sǎlò̤ pû kû̌ ata̤phǐta̤ma̤ nunî̌.

³² Na kè̌lò̤ hǎkhû̌ dě a guyṳ̌. Na tô̌bǎ pwǎ khôlô dě mî̌khǔ khǔhtò̌.

³³ He gǔ sǎwǐhtò̌ Cǒmara tûjû̌pwa̤ tǒ̤dǒ he si. Bǎ he ô̌htûpwa̤ pe akhanu, he gǔ sǎwǐ htû̌sò̌htò̌ǐ he Cǒmaradû̌.

³⁴ Pwa̤ dǒ a ma̤mô̤ he sǎphlǒ mî̌ a ô̌ tǒ̤pwǎ na nô̤̌pwǎ. He ta̤hî̌bǎ tokhlǒ glè̌ tôbǎ pû Cǒmara tûjû̌pwa̤ asǎphlǒ nî̌.

³⁵ Ta̤sǔta̤plěphû̌ glè̌ pî̌kè bò dǒ hǎkhû̌ nunî̌. Kòyòphû̌mò̤̌ glè̌ hǎmǎkè bò pû tûjû̌pwa̤ nî̌. He htû̌sò̌htò̌ Cǒmara tûjû̌pwa̤ kû̌ he sǎphlǒ tômèbò. Htû̌sò̌htò̌ Cǒmara tûjû̌pwa̤.