Htû̌sò̌htò̌ 103 - Kawyaw New Testament

Cǒmaradû̌ ata̤mô̤

Khwǐdawi̤ ata̤sǎwǐ htû̌sò̌htò̌.

¹ He htû̌sò̌htò̌ Cǒmara tûjû̌pwa̤. He htû̌sò̌htò̌ ami̤ aplò̌shǐnu kû̌ hesǎphlǒtômèbò.

² He htû̌sò̌htò̌ Cǒmara tûjû̌pwa̤ kû̌ hesǎphlǒtômèbò. Lǒ̤꤮ bò ta̤wô̌ dǒ a ma̤ htobǎ he tokhlǒnu, he shôpe̤ pè̤̌ tô̤̌.

³ A plûkèbò heta̤sǔta̤phû̌mò̤̌ lǒ̤꤮ bò. A ma̤hǎmǎ kèbò heta̤shǐsha pṳ̂̌꤮ tôcǒ.

⁴ A ma̤hǎplǎge he dǒ ta̤si akû. A ta̤mô̤ dǒ ahǎbòjò tô̤̌ kû̌ ata̤gwèbǎǐ glû̌bǐ hǒ heikǒ sô̌sô̌kû̌ khû̌glǒ nuhǒ.

⁵ A bè̌mô̤ hesǎphlǒ kû̌ ta̤twèta̤wô̌. He phû̌sǎ shû̌shokhò̌sho sô̌ge kû̌ lě̤bǎdû̌.

⁶ Cǒmara tûjû̌pwa̤ cî̌htò̌cǒ cî̌htò̌tè̤, cî̌htò̌tô cî̌htò̌bǎ nǐ̤ lǒ̤꤮ bò kòyò dǒ kòyò ma̤jî̌ma̤jû̌ lû̌ nutokhlǒ.

⁷ A ta̤yè̤ô̌nǎ sî tokhlǒ, a dǔlṳ̌ sî̌ganǎ̤ kû̌ KhûMûshě. Ata̤phǐta̤ma̤ sîtokhlǒ, a dǔlṳ̌ sî̌ganǎ̤ kû̌ Isarela khlilèphû̌.

⁸ Cǒmara tûjû̌pwa̤ mî̌ a gwèbǎǐ kòyò, a ma̤bwǐma̤sîrî kòyò. A sǎphlǒhtû, a lǒbe kû̌ ta̤mô̤ dǒ ahǎbòjò tô̤̌.

⁹ A bè̌ tû̌ kòyò ta̤sǔ tô̤̌, a sǎphlǒdû̌ tû̌ nǒ kòyò tô̤̌.

¹⁰ Pô̤̌ ta̤sǔta̤plě ô̌ dě pa tô khòbǎ ǐbò̌nu, a no khòbǎ pa tô̤̌. Pô̤̌ pa ma̤sǔ ta̤nu, pa tô khòbǎ bǎbǎkǎlè a ma̤ geshî̌shǔ pa tô̤̌.

¹¹ Pô̤̌ mǒkhû̌ ô̌htò̌yî̤khlo kû̌ hǎkhû̌nu, Cǒmara ata̤mô̤ dǒ ahǎbòjò tô̤̌nu, adû̌ahtûlǒ mî̌ca dǒ kòyò ǐsha bè̌dubè̌nǎ̤ lû̌ nutokhlǒ aya.

¹² Cǒmara wî tepheyî̤kè bòkè pata̤sǔ tokhlǒ asô̌sô̌kû̌ lṳmṳ̌htò̌ kû̌ lṳmṳ̌lò̤ ô̌tepheyî kè̌khî lû̌ûnu.

¹³ Pô̤̌ pha gwèbǎǐ aphû̌ tokhlǒnu, Cǒmara tûjû̌pwa̤ gwèbǎǐ pwa̤ dǒ a ǐsha dě bè̌dubè̌nǎ̤ lû̌ nutokhlǒ.

¹⁴ Panǎ̤glǒnu kòyò bô̌ lû̌û hî̌tènu, a sî̌ganǎ̤ lǒ̤bò. Pa mî̌ hǎkumṳ̌ pwǎnu a shôpe̤ tô̤̌.

¹⁵ Kòyòhǎkhû̌phû̌ alṳmṳ̌ni̤ lṳmṳ̌sanu, a phǔ sô̌sô̌pwǎkû̌ mi̤mṳ̌. Pa sô̌sô̌pwǎkû̌ ta̤phô dǒ a phôhtò̌ dǒ ya̤dakhû̌ nutokhlǒ pwǎ.

¹⁶ Bǎ gili̤sǎ hèhtû̌bǎ asî akhanu, aphô tokhlǒ lûhǎmǎ kèbò, a gûlǎ̤ ô̌kè pe tô̤̌.

¹⁷ Pwa̤ dǒ a ǐsha dě bè̌dubè̌nǎ̤ Cǒmara tûjû̌pwa̤ tokhlǒ aya dě, ata̤mô̤ dǒ ahǎbòjò tô̤̌nu a ô̌měô̌gle tûjû̌pwa̤ talakhǎ. Ata̤cǒta̤tè̤ tokhlǒnu a ô̌měô̌gle sělětû̌ tǒ̤ dǒ aphû̌ali̤ alûala̤ sîtokhlǒ tôhtu hto tôhtu.

¹⁸ Htokhôtô̤̌ a ô̌měô̌gle bǎpô̤̌ pwa̤ dǒ acǒ kû̌ Cǒmara ata̤olò̤ nutokhlǒ kû̌ pwa̤ dǒ a ganǎ̤de jûǎ lû̌ ta̤sû̌ta̤tòwò nutokhlǒ aya.

¹⁹ Cǒmara tûjû̌pwa̤ bè̌ô̌nǎ agògǒhtò̌yô̤̌lǒ dǒ mǒkhû̌. A htû khwǐ bǎnu dě a pǒǐ lǒ̤bò ta̤ pṳ̂̌꤮ tôcǒ.

²⁰ Ǒ꤮ mǒkhû̌tanaphû̌ dǒ akhû̌aǎ shû̌sho, a ganǎ̤de lû̌ ta̤sû̌ta̤tòwò, a jûǎ lû̌yô̤̌ sî, htû̌sò̌htò̌mò̌ lô̌khô Cǒmara tûjû̌pwa̤.

²¹ Lǒ̤꤮ bò mǒkhû̌tanaphû̌ akli saprûdû̌ dǒ a ma̤ tô Cǒmara asǎphlǒ lǒ̤bò sî꤮, htû̌sò̌htò̌ lô̌khômò̌ Cǒmara tûjû̌pwa̤.

²² Lǒ̤꤮ bò a bô̌lò̤ǐ tokhlǒ kû̌ bò a pǒǐ gûlǎ̤ pṳ̂̌꤮ tôkû sî꤮, htû̌sò̌htò̌ lô̌khômò̌ Cǒmara tûjû̌pwa̤. He htû̌sò̌htò̌ Cǒmara tûjû̌pwa̤ kû̌ hesǎphlǒtômèbò.