Htû̌sò̌htò̌ 102 - Kawyaw New Testament

Ta̤kwicabahtò̌ bǎ kè̌shǐtṳ̌bǎ kû̌ ta̤pò̤̌ta̤sha akha

Pwa̤khòbǎ ta̤jî̌ta̤jû̌ dǒ akhû̌shiǎjǎ yû̌lò̤ nutôpwa̤ ata̤kwicaba kû̌ a ta̤hǎwô dǒ Cǒmara tûjû̌pwa̤ alô̤mô̤̌.

¹ Ǒ Cǒmara tûjû̌pwa̤, ganǎ̤de mò̌ he ta̤kwicaba na. Dò̌ mò̌ na nò̌ku dǒ he kwisǎyṳhtò̌ na ta̤ma̤jè̌.

² Bǎ he kè̌shǐtṳ̌bǎ kû̌ ta̤pò̤̌ta̤sha akhanu, ô̌û̌ô̌sè̌ tǎ̤ helǎ̤ mǎ̤. Bǎ he yî̤̌kǒhtò̌ na akhanu, ganǎ̤de mò̌ he kwi nanu dě, kǒshěshu he.

³ He lṳmṳ̌ni̤ lṳmṳ̌sa tokhlǒnu, a hǎmǎ kèbò asô̌sô̌kû̌ mî̌khǔ, he khwǐ nî̌ alò̤tě̤pro̤kè asô̌sô̌kû̌ mî̌klû̌ lò̤tě̤pro̤nu.

⁴ Ajî̌jû̌ tûlû̌shû̌lě he sǎphlǒ asô̌sô̌kû̌ mi̤mṳ̌ nôkhwekènu. He sǎǎsǎô pe tô̤̌.

⁵ He ta̤kiǐkoo shû̌ tûlû̌ shû̌lě akhû̌akhî, a ô̌kè pwǎtǒ̤ he khwǐ kû̌ he bě nô̤̌pwǎ.

⁶ He sô̌sô̌kû̌ htû̌bǔdû̌ ô̌ dǒ gǎshashigǎkhû̌. He sô̌sô̌kû̌ htû̌bǔphû̌ ô̌ dǒ gǎpî̌gǎlṳ̂̌ bǎ kòyò ô̌pe tôpwa̤ tô̤̌ akûnu.

⁷ He hǎmôô̌ bǎbǎkǎlè hǎmôô̌nṳ̌ tô̤̌. He sô̌sô̌kè pwǎ kû̌ htû̌patǐ dǒ a ô̌ tò̤̌ tûû̌ dǒ hǐgukhû̌ tôbǎ.

⁸ Pwa̤sǎkhě he tokhlǒ hî̌phǔmò̤̌ he tônǐ̤mṳ̌hǎ. Pwa̤ dǒ a pî̤jî̌ǐsho he tokhlǒ, bǎ a ǐsho kòyò akhanu, a kaǎgǔ lô̌khô hemi̤ dě a ǐsho lô̌khô he.

⁹ He bǎ ǎ kûphǎ pô̤̌ he dî lǎ̤ǎnu. He bǎ ô sada pwǎ shi kû̌ he mǐ̤sǎshi.

¹⁰ Dǒ na sǎphlǒdû̌ tûlû̌ shû̌lě he akhû̌akhî, na johtò̌ he dě na wîcû̌yî̤kè he hǒ.

¹¹ He lṳmṳ̌ni̤ lṳmṳ̌sa tokhlǒnu a glè̌ cû̌tûlû̌ phwèkè asô̌sô̌kû̌ lṳmṳ̌nṳ̌ ayô̤ǔ hǎmǎkè dǒ akhǐklanu. Henôhekhwekè asô̌sô̌kû̌ mi̤mṳ̌.

¹² Bǎbǎkǎlè ǒ Cǒmara tûjû̌pwa̤, na mî̌ khwǐ, na pǒnǐ̤ ta̤ tûjû̌pwa̤. Kòyò tôhtu hto tôhtu gǔ gènè̤bǎ na.

¹³ Na gǔ ihtǒ hèlò̤ dě gwèbǎǐ tûû̌ wî̤̌sǐû. Shěkhǎtǒ̤ hǒ dǒ na tô gwèbǎǐ lû̌û akhû̌akhî, shěkǎtô dǒ na tô hèlò̤.

¹⁴ Kòyò ma̤pî̌kè lû̌û bǎbǎkǎlè napwa̤ma̤ta̤phû̌ tokhlǒ mô̤ǐ pe pwǎ wî̤̌ nutôwî̤̌. Kòyò ma̤tě̤prǎtě̤pro kèbò wî̤̌ nutôwî̤̌ bǎbǎkǎlè pa gwèbǎǐ pe lû̌û.

¹⁵ Khlilèphû̌ tokhlǒ gǔ ǐshabò Cǒmara tûjû̌pwa̤ ami̤. Lǒ̤bò khwǐdû̌ ô̌ dǒ hǎkhû̌ hǒtokhlǒ gǔ bè̌dubè̌nǎ̤bò nasîrîdû̌sîrîhtû pě.

¹⁶ Cǒmara tûjû̌pwa̤ gǔ ma̤htò̌ sô̌ wî̤̌sǐû. A gǔ ô̌lṳ̌htò̌tû̌ kû̌ asîrîdû̌sîrîhtû.

¹⁷ A gǔ ganǎ̤de bǎ kòyòshôdôhǐ shôdôphò tokhlǒ ata̤kwicaba. A htè̌shěshu asî ta̤kwicaba tô̤̌.

¹⁸ Lǒ̤bò ta̤ dǒ Cǒmara tûjû̌pwa̤ gǔ ma̤ bǎ pa tokhlǒnu bǎ wě̤mǎnǎbò lû̌û dǒ kòyò htǔ nô̌kò tôhtu aya. Htodě kòyò dǒ a ô̌phijǎlò̤ khôtô̤̌ tokhlǒ gǔ htû̌sò̌htò̌ Cǒmara tûjû̌pwa̤.

¹⁹ Cǒmara tûjû̌pwa̤ ô̌ dǒ agûlǎ̤ aplò̌shǐ htò̌yô̤̌nu tôkû dě a kè̌lò̤. A ô̌ dǒ mǒkhû̌, a kè̌lò̤ hǎkhû̌.

²⁰ A ganǎ̤de kòtě̤ dǒ apô̤kû tokhlǒ ata̤kîî̌koo. A ma̤hǎplǎkè kòyò dǒ kòyò glè̌ cî̌htò̌si lû̌nu.

²¹ Bǎ khlilèphû̌ tokhlǒ hèô̌tǒ̤ ô̌plǒ lû̌û akha pěnu, kòyò gǔ shôbǐǐlṳ̌ Cǒmara tûjû̌pwa̤ ami̤ dǒ Sǐû khôlôkhû̌. Kòyò htû̌sò̌htò̌ lû̌ dǒ Wî̤̌yarǔshôlekû pě.

²² Shigǎ tokhlǒ ma̤ lô̌khô Cǒmara tûjû̌pwa̤ ata̤ma̤ pěpě.

²³ He nějǎ pepwǎ bǎbǎkǎlè, Cǒmara tûjû̌pwa̤ phî̌cû̌kè hekhû̌heǎ. A ma̤ phǔtǔkè helṳmṳ̌ni̤ lṳmṳ̌sa.

²⁴ He hî̌ kû̌, “Ǒ꤮ he Cǒmaradû̌, na ô̌htûpwa̤ tûjû̌pwa̤, bǎ he mǒ̤pwǎ̤ khôtô̤̌ akhanu, phî̌ge tǎ̤ he ta̤ô̌htûpwa̤ mǎ̤.

²⁵ “Bǎ꤮ tôcǒ꤮ ô̌htûhtò̌ tǒ̤khôtô̤̌ akhanu, na bô̌lò̤ tû̌ hǎkhû̌. “Na tèlò̤ tû̌ mǒlǎ̤ tokhlǒ kû̌ nacǔde.

²⁶ “Ta̤ nutokhlǒ gǔ pî̌kèbò bǎbǎkǎlè na ô̌sala gutṳ̌ tûjû̌pwa̤. “A gǔ hǎyè̤̌hǎmǔkè pô̤̌ jeayò̤̌ hǐyò̤̌ ayò̤̌. “Na gǔ htû̌lè̌tèplè̌kè khô̌kèbò asî pô̤̌ jejû nupe, asî hǎmǎkèbò pě.

²⁷ “Bǎbǎkǎlè na gǔ dò̌ nasǎphlǒ gûlǎ̤lǎ̤ pwǎ pě. “Na lṳmṳ̌ni̤nu, a hǎbòjò tô̤̌.

²⁸ “Napwa̤ma̤ta̤phû̌ amè̤̌ panu aphû̌ gǔ ô̌htûpwa̤ dǒ nata̤takabǐ alǎ̤. “Asî akhlialè ô̌htûpwa̤ ô̌tûdûbǐkè dǒ nalô̤mô̤̌ pě.”