Htû̌sò̌htò̌ 10 - Kawyaw New Testament

Ta̤kwicaba dǒ lǎ̤ma̤pè̤̌kè pwa̤ma̤jěma̤jû̌ kòyò aya

¹ Ǒ Cǒmara tûjû̌pwa̤, na cû̌ô̌ tepheyî̤kè ma̤titè? Bǎ pa bǎpò̤̌bǎshajî̌ akhanu, na cû̌ ô̌û̌ nanǎ̤ ma̤titè?

² Kòyòjî̌jû̌ phî̌htò̌yô̤̌ anǎ̤sî nî̌ apè̤̌ǎpè̤̌ô pwa̤shèphû̌shèwè̤phû̌. No pṳ̂̌bǎ sô̌tû̌ asî ta̤dò dǒ a glè̌dò kòyò nu.

³ Asî hî̌bǎ htò̌mǒhtò̌phô lô̌khô dǒ a sǎyṳ ma̤ phû̌mò̌ kòyò ashǔshawa̤. Kòyò dǒ ǎkǒôbe tûû̌ aya tokhlǒnu a ǐshoǐbě dě awîkè Cǒmara tûjû̌pwa̤.

⁴ Dǒ asî bè̌dû̌bè̌htò̌lǒ lô̌khô anǎ̤ akhû̌akhî, asî kè̌lǎǐ pe Cǒmaradû̌ tô̤̌. Asî gènè̤htò̌nṳ̌ pe Cǒmaradû̌ tôcǒ tô̤̌.

⁵ Asî sǎyṳ titètè̌nu a nǐ̤bǎ pṳ̂̌tôplǎ. Asî gènè̤htò̌bò̌ Cǒmaradû̌ ata̤cî̌htò̌ aklè̌aklò tô̤̌. A hî̌tûkhû̌takǎ bò pwa̤sǎkhě asî nutokhlǒ.

⁶ “Pa lǎ̤lò̤jû̌ nî̌ a ô̌ nô̌ tôkhò̌ tô̤̌. “Pṳ̂̌plǎplǎ pa sǎlě̤ pě. Ta̤jî̌ta̤jû̌ nî̌ a hèbǎ jò pe pa tôkhò̌ tô̤̌,” a gènè̤ ǐ lô̌khô anǎ̤ pô̤̌nu.

⁷ Asî ta̤hî̌bǎhî̌shu alǒbebò kû̌ ta̤ǐshoǐbě, ta̤lòhô, ta̤hî̌tôkhôsò̌ ǐsha kòyò. Akhû̌phě lǒbebò kû̌ ta̤hî̌bǎ sǎphlǒdû̌, hî̌bǎ phû̌mò̌shî̌htô kòyò.

⁸ Asî cû̌ ô̌yṳ̂̌phǔ dǒ dohtu, ô̌pǒ̤ ma̤si kòyò dǒ ata̤sǔ ô̌tô̤̌nu. Pṳ̂̌plǎplǎ asî kè̌lǎ ma̤si kòyò dǒ a shôdô pwa̤ma̤jè̌.

⁹ Asî cû̌ô̌ kè̌jôû̌ lô̌khô dǒ jôjǔkû sô̌sô̌kû̌ khî ô̌pǒ̤ ta̤mi̤ nu. A ô̌pǒ̤ bôshǔ kòyò dǒ a shôdô pwa̤ma̤jè̌nu aklè̌. A pṳ̂̌nǐ̤ kòyò dǒ a shôdô pwa̤ma̤jè̌nu kû̌ ata̤dò, a cî̌cûgrû̌ cû̌ tepheyî̤kè asî.

¹⁰ Asî ma̤jî̌ma̤jû̌ ma̤numa̤cěkè kòyò dǒ hǎkhû̌. Kòyò shôdô pwa̤ma̤jè̌ nutokhlǒ lò̤tě̤nṳ̌kè dǒ kòyò cǔshokhò̌sho acǔdekû.

¹¹ Kòyòphǔmò̤̌ nutokhlǒ a gènè̤ǐ lô̌khô anǎ̤ kû̌, “Cǒmara shôpenǎkè pa hǒ. “A kè̌khô̌kè dě a kè̌shǐ pe pa tô̤̌.”

¹² Ǒ Cǒmara tûjû̌pwa̤, ihtǒmò̌, plèmò̌ kòyòphû̌mò̤̌ nutokhlǒ. Shôpe̤nǎkè tǎ̤ kòyò dǒ a khòjî̌khòjû̌nu tǎ̤mǎ̤.

¹³ Kòyòphû̌mò̤̌ cû̌hî̌bǎ takǎ na gètè̤̌ numî̌ ma̤titè? “Cǒmara plè nô̌ pa tôkhò̌ tô̤̌,” a cû̌hî̌tǒ̤ pô̤̌nu ma̤titè?

¹⁴ Na kè̌shǐ sî̌ganǎ̤ tě̤tě̤mè̤̌mè̤̌ htobò ta̤pò̤̌ta̤sha, ta̤khò̌jî̌jû̌. Na gènè̤ tě̤tě̤mè̤̌mè̤̌ ô̌tîwî̌tòwò dǒ na gǔ ma̤jè̌ kòyò. Pwa̤bǎpò̤̌bǎsha ǐlò̤ anǎ̤ dǒ na cudekû. Na mî̌ pwa̤tugǔtakaǐ phû̌ dǒ a shôdô mǒ̤phanu.

¹⁵ Delò̤gǎkè bòmò̌ kòjî̌kòjû̌, kòyòkhu phû̌mò̤̌ acǔgô̌. Cǐhtò̌ bòmò̌ ta̤sǔta̤plě dǒ asî ma̤ nutokhlǒ tǒ̤htû̌ asî ma̤ bò̌ pe tôcǒ tô̤̌ nu.

¹⁶ Cǒmara tûjû̌pwa̤ mî̌ khwǐ dǒ a pǒ ta̤ tûjû̌pwa̤ talakhǎ. A gǔ wṳ̂̌hǎhtò̌bò shigǎphû̌ tokhlǒ dǒ ashigǎkû.

¹⁷ Ǒ Cǒmara tûjû̌pwa̤ na sî̌yahto kòyò dǒ a khòbǎ ta̤pò̤̌ta̤sha nutokhlǒ ata̤sǎyṳsǎbǎ hǒ. Na ǐkhû̌ǐǎ dǐshû̌dǐsho asî sǎphlǒ, na ganǎ̤de asî ta̤kwisǎyṳ hǒ.

¹⁸ Pô̤̌khô hǎkhû̌phû̌ dǒ a sijò nutokhlǒ gǔ ma̤ gònò̤̌gòglè ǐsha phû̌ dǒ shôdô mǒ̤pha kû̌ pwa̤ dǒ kòyò pè̤̌ǎpè̤̌ô lû̌û tô̤̌ ayanu, na takabǐ tûû̌ pû asî.