Htû̌sò̌htò̌ 1 - Kawyaw New Testament

Lî̤htû̌sò̌htò̌ awǐlǒ tôbǎ ( Htû̌sò̌htò̌ 1-41 ) Kòyòcǒkòyòtè̤ kû̌ kòyò sǎphlǒphû̌mò̤̌ tokhlǒ aklè̌

¹ Kòyò dǒ a nǐ̤bǎ ta̤ǐshowî̤ tokhlǒmî̌ kòyò dǒ a gû̌kû̌ pwa̤phû̌mò̤̌shǐhtô ata̤yṳ̂̌klè̌yṳ̂̌klò tô̤̌. A ihtǒ ô̌plǒ kû̌ kòyò ta̤sǔô̌ nutokhlǒ dǒ asî klè̌kû tô̤̌. A hǎnòò̌ plǒ dǒ pwa̤hî̌phû̌mò̤̌ Cǒmara a ta̤cǐplǒô̌htu akû tô̤̌tô̤̌.

² A sǎlě̤sǎlò̤ dǒ Cǒmara tûjû̌pwa̤ ta̤sû̌ta̤tòwò akû. A gènè̤ tě̤tě̤mè̤̌mè̤̌ Cǒmara tûjû̌pwa̤ ta̤sû̌ta̤tòwò pṳ̂̌ni̤pṳ̂̌sa.

³ Kòyò pô̤̌nutokhlǒ mî̌ a sô̌sô̌kû̌ kòyò shǒǐ sǒmṳ̌ dǒ shilô̤̌htu, asǎ tôshětôkhǎ. Alǎ lò̤su kû̌ kòyò tôkhò̌꤮ tô̤̌. A ma̤ titètè̌ mî̌ a ǎbǎôbǎ.

⁴ Kòyò dǒ aphû̌mò̤̌shǐhtô tokhlǒ mî̌ asô̌sô̌ pô̤̌nu tô̤̌. Asô̌sô̌kû̌ phîmṳ̂̌ dǒ gili̤sǎ htû̌lûcû̌kè lû̌nu pwǎ.

⁵ Htû̌ Cǒmara tûjû̌pwa̤ ata̤cî̌htò̌ alṳmṳ̌ni̤ pě tôni̤nu kòyòkhucawa gǔ khòbǎ ta̤cî̌htò̌ pě. Kòyò ta̤sǔ ô̌ tokhlǒ gǔ ô̌ kû̌ pe dǒ kòyòcǒkòyòtè̤ asaprṳ̂ tô̤̌.

⁶ Cǒmara tûjû̌pwa̤ ô̌pǒ̤kè̌khwè̌ bǎ kòyòcǒkòyòtè̤ aklè̌. Kòyò phû̌mò̤̌shǐhtô aklè̌nu a gǔ gutṳ̌kè kû̌ ta̤pî̌ta̤lṳ̂̌.