Hebrǔ 5 - Kawyaw New Testament

¹ Pwa̤shû̌gǎ ikǒdû̌lǒ pṳ̂̌꤮ pwa̤pwa̤nu, kòyò rû̌htò̌ a dǒ kòyòhǎkhû̌phû̌ tokhlǒ akla pwǎ, dě kòyò bè̌htò̌ yǎ dǒ a gǔ ma̤ bǎ Cǒmara ata̤ma̤ dǒ kòyò lǒ̤꤮ bò agûlǎ̤. A gǔ lṳhtò̌tòhtò̌ bǎ kòyò ta̤tokhlǒ, htokhôtô̤̌ pô̤̌khô kòyò tokhlǒ ta̤sǔ gǔ plûkè ayanu, a lṳhtò̌ bǎ kòyò ta̤phû̌ta̤wè̤ tokhlǒ dǒ Cǒmara a ô̌ pě.

² Asî htûpwǎ kòyòhǎkhû̌phû̌ akhû̌akhî, a ma̤sǔma̤plě lô̌khô pwǎ. Pô̤̌nudě kòyò dǒ a sî̌ganǎ̤ tě̤mè̤̌ gû̌ kòyò ta̤tě̤ta̤mè̤̌ tô̤̌ dě a ma̤sǔma̤plě ta̤ tokhlǒ ayanu, asî gènè̤ gwèbǎǐjò kû̌ kò tô̤̌.

³ Htodě asî sanǎ̤ nî̌ a ma̤sǔma̤plě ta̤ akhû̌akhî, asî bǎ lṳhtò̌ bǎ pwǎtǒ̤ kòyò nutokhlǒ ata̤sǔ tokhlǒnô̤̌ mè̤̌tô̤̌, asî bǎ lṳhtò̌ padô̌ asî ta̤sǔsǔ.

⁴ Kòyò tôpwa̤pwa̤ bè̌htò̌jò tûû̌ anǎ̤ kû̌ kòyò gǔ htûhtò̌ pwa̤shû̌gǎ ikǒdû̌lǒnu tôpwǎ̤꤮ tô̤̌. Pô̤̌ Cǒmara bè̌htò̌ PhaArû kû̌ a gǔ htû pwa̤shû̌gǎ ikǒdû̌lǒ tôpwa̤nu, kòyò dǒ a gǔ htû pwa̤shû̌gǎ ikǒdû̌lǒ tôpwa̤ numî̌, a gǔ mè̤̌ pwǎtǒ̤ Cǒmara tôpwa̤ bǎ rû̌htò̌ a nupwǎ.

⁵ Pô̤̌nudě, pô̤̌khô Khrǐ gǔ htû pwa̤shû̌gǎ ikǒdû̌lǒnu, a bè̌htò̌ tûû̌ anǎ̤ mè̤̌tô̤̌, a ma̤bwǐdû̌sîrîhtû tûû̌ anǎ̤ mè̤̌tô̤̌, Cǒmara bè̌htò̌ yǎ pwǎ. Dě Cǒmara hî̌ lû̌û kû̌, “Na mî̌ hephû̌pwa̤khû, khò̌tôni̤ dě, he htû napha hǒ,” a hî̌ lû̌û pô̤̌nu.

⁶ Cǒmara hî̌ dǒ ashǔshawa̤ tômû kû̌, “Na htû pwa̤shû̌gǎ tûjû̌pwa̤ dǒ asô̌sô̌kû̌ pwa̤shû̌gǎ Malakhǐsedè̌ dǒ awǐkha tôpwa̤,” a hî̌ pô̤̌ lû̌û pô̤̌nu.

⁷ Bǎ Yeshǔ ô̌htûpwa̤ bǎ hǎkhû̌ akhanu, a kwicaba lǒ̤sû̌lǒ̤sò̌ htò̌ Cǒmara dǒ a ma̤hǎplǎjò lû̌û dǒ ta̤sinu tôpwa̤, dě a yî̤̌kǒhtò̌ mǐ̤sǎshilò̤ kè. A shò̌lò̤ asǎphlǒ dě a sǎphlǒshû̌ ganǎ̤de Cǒmara ayô̤̌ akhû̌akhî, Cǒmara ganǎ̤de a ta̤kwicaba.

⁸ Yeshǔ htû Cǒmara aphû̌khû tôpwa̤ bǎbǎkǎlè bǎ a khòbǎ ta̤jî̌ta̤jû̌ akhanu, a phî̌nṳ̌ tutṳ̌pe ta̤ganǎ̤de ayô̤̌ dǒ Cǒmara a ô̌.

⁹ Bǎ Khrǐ ganǎ̤de htobò Cǒmara ayô̤̌ pṳ̂̌꤮ tocǒ akhanu, a htûhtò̌ bǎbò kòyò dǒ a ganǎ̤de lû̌yô̤̌ nutokhlǒ a ta̤ma̤hǎplǎge ajû̌jû̌ apwa̤pwa̤ a kòshî̌gutṳ̌ hǒ.

¹⁰ Dě Cǒmara bè̌htò̌ yǎ kû̌ pwa̤shû̌gǎ ikǒdû̌lǒ dǒ asô̌sô̌kû̌ pwa̤shû̌gǎ Malakhǐsedè̌ ma̤ta̤ dǒ awǐkha tôpwa̤ nuhǒ.

Dǐ sè̌rè̌nǎ kû̌ kòyò gǔ wîkè tǎ̤ ta̤yṳ̌ tǎ̤mǎ̤

¹¹ Lǎ̤lṳ̂ hî̌ bǎ pô̤̌ sî kû̌ ta̤we̤ta̤kènu a ô̌ dû̌ pe. Sî sî̌yaphlô pò̤̌yǎ̤ tûû̌ sîya akhû̌akhî, he shôbǐǐphlô bǎ sî dě apò̤̌yǎ̤.

¹² Khònò̤̌dě sî tô htû lô̌khô sara tokhlǒhǒ. Bǎbǎkǎlè sî cû̌ lǎ̤lṳ̂pe lô̌khô pwǎ kòyò bǎ sû̌ǐ getîkhî sî kû̌ Cǒmara alě̤ayô̤̌ dǒ akòshî̌ pwǎ. Sî tô ǎ kû̌ kòyò shǎǎpwǐ̤ hǒ bǎbǎkǎlè sî cû̌ ôpe pwǎ lô̌khô nṳ̌shi pwǎ.

¹³ Kòyò tôpwa̤pwa̤ dǒ a ôpepwǎ nṳ̌shi numî̌ a sô̌sô̌pwǎ kû̌ phijǎ dǒ a ûnû̌pe nupwǎ. Ta̤cǒta̤tè̤ awe̤akènu, a sî̌ganǎ̤ dû̌wî̤ kû̌ kòyò tô̤̌.

¹⁴ Bǎbǎkǎlè, shǎǎ a pwǐ̤ numî̌ kòyò dû̌to̤yobǎ sî̌ya dǒ a sû̌ǐ sî̌ganǎ̤hè bǎ hto anǎ̤ dǒ a gǔ běphò̌ sî̌ganǎ̤jò ta̤wô̌ kû̌ ta̤phû̌mò̤̌ nutokhlǒ aya pwǎ.