Hebrǔ 12 - Kawyaw New Testament

Papha Cǒmara

¹ Pô̤̌nudě, kòyò dǒ a dǔlè̌lṳ̌ bǎ pa kû̌ a ta̤yṳ̌ta̤nǎ̤ tokhlǒnu, a ô̌ te̤we̤plṳ̂te̤we̤phǎ kû̌ pa. Pô̤̌nu akhû̌akhî, pa wîkè ta̤pṳ̂̌꤮ tocǒ dǒ a ma̤ dǐdò tě̤tṳ pa tokhlǒ kû̌ ta̤sǔ dǒ a ma̤ topho lòkhǔkè pa hǒtokhlǒ tǎ꤮! Dě pa kè̌wô̤̌wô̤̌ lû̌û kòyò ǐ pa ta̤bò̌htò̌htǔ dǒ palô̤mô̤̌nu dě pa gǔ sǎphlǒhtû khlè̌hètǒ̤ dǒ a ô̌nu tǎ꤮.

² Asô̌sô̌kû̌ kòyò khlè̌ tokhlǒ kè̌tôtǐ hètô pwǎ ta̤ma̤pè̤̌ bò̌htò̌htǔ nuhǒ, pô̤̌nudě pa kè̌hè tôtǐ pwǎtǒ̤ Yeshǔ nô̤̌ tǎ꤮. Ma̤titèhî̌dě a mî̌ pa ta̤yṳ̌ta̤nǎ̤ a kòshî̌gutṳ̌ tôpwa̤. Htokhôtô̤̌, a mî̌ pwa̤ dǒ a ma̤lǒma̤be bǎ pa ta̤yṳ̌ta̤nǎ̤ tôpwa̤. A khòsi htopědě, a sî̌ganǎ̤ nǎ hto kû̌ a gǔ nǐ̤bǎ ta̤sǎlě̤sǎlò̤ pě akhû̌akhî, a tôbǎ khòsi dǒ nò̌dò̌htǔlô̤ bǎbǎkǎlè a sòwò̤̌ tôcǒ꤮ tô̤̌. Khònò̤̌dě a hǎnòò̌ dǒ Cǒmara a lǎ̤hǎnòò̌ htò̌yô̤̌ dǒ cǔtômû nutôkhô hǒ.

³ Pô̤̌khô sî ma̤ ta̤wô̌ dě sî gǔ lò̤dô̌lò̤de tô̤̌, dě sî gǔ sǎphlǒpî̌ tô̤̌ ayanu, gènè̤kè̌ lô̌khômò̌ Běcǎ Yeshǔ awe̤akènu, pwa̤ma̤sǔphû̌ tokhlǒ sǎkhěkhû̌khwè lû̌û ma̤takhû̌takǎ mî̌ca lû̌û bǎbǎkǎlè a khòsǎdô mî̌ca dǒ asîkhû̌.

⁴ Sî shěshǔ kû̌ ta̤sǔta̤phû̌mò̤̌ nutokhlǒ bǎbǎkǎlè sî khòbǎ ta̤jî̌ta̤jû̌ tǒ̤dǒ kòyò bǎma̤si sînu, a ô̌nô̌ tôpwǎ̤꤮ tô̤̌.

⁵ Cǒmara ǐkhû̌ǐǎ sî pô̤̌ aphû̌ kû̌ anǎ̤ numî̌ sî shôpe̤kè hǒ ya? A hî̌ sî kû̌, “Ǒ hephû̌ sî꤮ bǎ Běcǎ tṳ̂mṳ̂̌ sû̌ǐtòwòǐ wô̌kè sî akhanu, bè̤̌dubè̌nǎ̤ a tṳ̂mṳ̂̌ sû̌ǐwô̌ sînu nî̌꤮. Bǎ a tṳ̂mṳ̂̌ sî akhanu, sǎphlǒpî̌ tǎ̤ lô̌khô tǎ̤mǎ̤ nî̌꤮.

⁶ Ma̤titèhî̌dě, Cǒmara tṳ̂mṳ̂̌ sû̌ǐwô̌ gesô̌ kòyò dǒ a mô̤ǐ nutokhlǒ. Dě kòyò lǒ̤꤮ bò dǒ Cǒmara bè̌ asî kû̌ aphû̌ nutokhlǒnu, a plèǐ lû̌û.”

⁷ Sî khòbǎ ta̤tokhlǒnu, khòsǎphlǒhtû dě bè̌ a pô̤̌ pha Cǒmara sû̌ǐwô̌ gesô̌ sî pwǎnu nî̌꤮. Cǒmara tṳ̂mṳ̂̌ta̤ma̤ sû̌ǐwô̌ gesô̌ aphû̌ kû̌ anǎ̤ nutokhlǒ pwǎ. Pha dǒ a tṳ̂mṳ̂̌ sû̌ǐwô̌ gesô̌ kû̌ aphû̌ tokhlǒ tô̤̌ numî̌ a ô̌ nô̌ tôpwa̤pwa̤ ya?

⁸ Cǒmara sû̌ǐtòwòǐ wô̌ge bò aphû̌ pṳ̂̌꤮ tôpwa̤. Kè̌ a tṳ̂mṳ̂̌ sû̌ǐwô̌gesô̌ sî tô̤̌ hî̌nu, sî htû mè̤̌mî̌ca aphû̌ khôtô̤̌. Sî mè̤̌pwǎ phû̌ dǒ a shôdô apha nutokhlǒ pwǎ.

⁹ Pa ô̌ kû̌ pamǒ̤papha dǒ hǎkhû̌nu tokhlǒ dě a tṳ̂mṳ̂̌ sû̌ǐtòwòǐ wô̌ gesô̌ pa dě pa bè̌dubè̌nǎ̤ ǐ asî. A sô̌sô̌ pô̤̌nudě pa ô̌ kû̌ papha dǒ mǒkhû̌ nutôpwa̤ akhû̌akhî, pa tô shò̌lò̤ khlope pa sǎphlǒ dǒ alǎ̤nu. Dě pa nǐ̤bǎ ta̤htûpwa̤ pě.

¹⁰ Papha dǒ hǎkhû̌ nutokhlǒ tṳ̂mṳ̂̌ sû̌ǐtòwòǐ wô̌ gesô̌ pa aněala alṳmṳ̌ni̤ lṳmṳ̌sa sî tokhlǒnu, a yî̤tô̤̌, tòshò̌phû̌pwǎ dě a bè̌ lô̌khô kû̌ a ma̤ ta̤ numî̌ awô̌ pwǎ a gènè̤ dě a sû̌ǐ pa pwǎ. Pô̤̌khô pa gǔ plò̌shǐ sô̌sô̌kû̌ pô̤̌ papha Cǒmara nudě, a tṳ̂mṳ̂̌ sû̌ǐtòwòǐ wô̌ gesô̌ pa ta̤ dǒ a gǔ htûbwǐhtûsîrî dǒ paya nutokhlǒ pwǎ.

¹¹ Bǎ Cǒmara tṳ̂mṳ̂̌ sû̌ǐ wô̌ gesô̌ pa akhanu, a sô̌sô̌ kû̌ sǎplǎ̤sǎyṳ lû̌ûnu, a sô̌sô̌ kû̌ ta̤sǎlě̤sǎlò̤ ô̌ tôcǒ tô̤̌. Bǎbǎkǎlè kòyò dǒ a khòbǎ nô̌ kòyò tṳ̂mṳ̂̌ sû̌ǐtòwòǐ wô̌ gesô̌ lû̌û tokhlǒnu, dǒ nô̌kòpě dě a gǔ nǐ̤bǎ khû̌kǎ pěnumî̌ amè̤̌ ta̤ô̌htûpwa̤ dǒ acǒatè̤ dě a nǐ̤bǎ sǎphlǒ gûjû̌kabǎ pě.

Ta̤sû̌ǐtòwòǐ tokhlǒ kû̌ ta̤dǐsè̌rè̌ tokhlǒ

¹² Pô̤̌nudě, ma̤shohtò̌ sô̌ sî cǔde dǒ a gayǎ̤ lǎlǎnu tokhlǒ, dě ma̤shû̌htò̌ sô̌ khò̌lô̤mě̤ dǒ a gònò̤̌gòglè nutokhlǒ.

¹³ Tûlû̌ gû̌hè sělě gutṳ̌ ta̤tě̤ta̤mè̤̌ aklè̌nu nî̌꤮. Kòyò dǒ ata̤yṳ̌ pî̌tî̌ tokhlǒnu, asô̌sô̌kû̌ kòyò khò̌lôpô̤̌dě nutokhlǒ hǒ. Pô̤̌khô kòyò dǒ a khò̌lôpô̤̌dě nutokhlǒ gǔ lò̤khǔpo̤ tô̤̌, htodě pô̤̌khô asî khò̌lôpô̤̌ wô̌ tîkhîsô̌ ayanu, tûlû̌ gû̌ sělě hènè gû̌pô̤̌ lô̌khô nî̌꤮.

Ta̤dǐsè̌rè̌bǎ kòyò kû̌ ta̤htû̌tiwǐ̤ cû̌khô̌kè Cǒmara awe̤akè

¹⁴ Jî̌pwǐ̤ ô̌mô̤ô̌kla pû kû̌ kòyò pṳ̂̌꤮ tôpwa̤ nî̌꤮. Jî̌pwǐ̤ ô̌htûpwa̤ plò̌shǐ lô̌khô nî̌꤮. Ma̤titèhî̌dě ta̤ô̌htûpwa̤ plò̌shǐ kè̌ ô̌tô̤̌ hî̌nu, kòyò kè̌shǐjò Běcǎ tôpwǎ̤꤮ tô̤̌.

¹⁵ Pô̤̌khô sî pṳ̂̌꤮ tôpwa̤ gǔ nǐ̤bǎ lô̌khô Cǒmara abwǐsîrî nudě, sè̌rè̌ lô̌khô sînǎ̤ nî̌꤮. Nohtûhtò̌ tǎ̤ lô̌khô sînǎ̤ pô̤̌ sǒmṳ̌ dǒ awè̤̌htòô̌ dě kòyò ǎ a dě a sijò kòyò nutokhlǒ tôpwǎ̤ tǎ̤mǎ̤ nî̌꤮. Kòyò dǒ asô̌sô̌kû̌ sǒmṳ̌ dǒ a ma̤ sijò kòyò tokhlǒnu a gǔ dô̌htò̌ dǒ sîkla dě a ma̤pò̤̌ma̤sha dû̌wî̤ kòyò kû̌ a ta̤wè̤̌ta̤htò si nupě.

¹⁶ Nohtûhtò̌ tǎ̤ lô̌khô sî nǎ̤glǒnu kû̌ kòyò dǒ a cû̌sǔnṳ̌plěnṳ̌ pwa̤mǒ̤pwa̤khû nutokhlǒ tǎ̤mǎ̤ nî̌꤮. Htûhtò̌ sô̌sô̌ lô̌khô tǎ̤ pô̤̌ Khûětò̌ dǒ a bè̌dû̌ kû̌ kòyò Cǒmara ayô̤̌ tô̤̌ dě a shaǎ ǐ sô̌ phû̌wè̤̌pwǎ̤ û̌tě̤û̌ca kû̌ hǎsǐ tôbè nutôpwa̤ tǎ̤mǎ̤ nî̌꤮.

¹⁷ Pô̤̌ sî sî̌ganǎ̤ hto nuhǒ, dǒ nô̌kò dě bǎ a sǎyṳ hè phǐgû̌ ta̤ǐshowî̤ dǒ apha ô̌ akhanu, apha ǐpe lû̌û tô̤̌. A kè̌shuǐ ta̤ǐshowî̤ kû̌ amǐ̤sǎshi bǎbǎkǎlè, dǒ a shaǎ hto phû̌wè̤̌pwǎ̤ a û̌tě̤û̌ca akhû̌akhî, a htû̌lè̌ tèplè̌ khô̌jò petô̤̌.

^18-19 Sî hèphǔ dǒ Cǒmara a ô̌ numî̌, asô̌sô̌kû̌ Isôrělaphû̌ dǒwǐkha tokhlǒ hè dǒ Tǐnǎkhôlô a ô̌nu mè̤̌tô̤̌. Asî hètǒ̤ dǒ Tǐnǎkhôlô dǒ kòyò kè̌shǐjò lû̌û, kòyò pṳ̂̌bǎ jò lû̌û nutômè a ô̌, mî̌gè̌htò̌ dǒ khôlô nutômè alô̤, poǒlṳ̌ khǐsiwi̤ lò̤jobǐ, gili̤sǎ dû̌hè, kǐlû pwe̤htò̌ dě Cǒmara alě̤pwe̤htò̌ dǒ khôlô nutômè akû. Isôrělaphû̌ tokhlǒ ganǎ̤de alě̤pwe̤htò̌ dě a ǐsha tûlû̌shû̌lě akhû̌akhî, asî kwisǎyṳ Cǒmara kû̌ a gǔ hî̌bǎ pǒhǒ.

²⁰ Ma̤titèhî̌dě, alě̤pwe̤htò̌ dě a hî̌ kû̌, “Ta̤phû̌ta̤wè̤ bǎbǎ a kè̌ hè ma̤bǎ khôlô nutômè hî̌nu, bǎ desikè a kû̌ lǒ̤,” ta̤hî̌bǎ pwe̤lò̤ hǒtômû nî̌ asî khòpè̤̌pe tô̤̌.

²¹ Asî kè̌shǐ lô̌khô ta̤ htûhtò̌ pô̤̌o dǒ asî lô̤mô̤̌ dě, asî ǐsha jî̌ akhû̌akhî, “He ǐsha gònò̤̌gòglè,” Khûmṳ̂shě hî̌ pô̤̌nu.

²² Bǎbǎkǎlè, sî dě sî hètǒ̤ dǒ Sǐûkhôlôhǒ. Khôlô hǒtômè numî̌ amè̤̌ Cǒmara dǒ a htûpwa̤ nutôpwa̤ awî̤̌ tôwî̤̌ dǒ kòyò kaǎ kû̌ Wî̤̌yarǔshôle dǒ mǒkhû̌nu tôwî̤̌ hǒ. Cǒmara amǒkhû̌ tanaphû̌ dǒ a ô̌ dǒ asî̌ kû̌ asî̌kû tokhlǒ hè̌ô̌plǒ sǎlě̤ wô̤̌wô̤̌ kû̌ bò lû̌û bǎnu. Dě sî hè ô̌plǒ kû̌ amǒkhû̌ tanaphû̌ nutokhlǒ hǒ.

²³ Sî hètǒ̤ dǒ Cǒmara a phû̌wè̤̌pwǎ̤ tokhlǒ lǎ̤hè ô̌plǒcu lû̌û agûlǎ̤ nuhǒ. Kòyò wě̤nṳ̌ asîmi̤ dǒ mǒkhû̌ hǒ. Sî hètǒ̤ lô̌khô dǒ Cǒmara dǒ a gǔ cî̌htò̌ kòyò pṳ̂̌tôpwa̤ kû̌ anǎ̤ nutôpwa̤ alô̤mô̤̌ hǒ. Sî hètǒ̤ dǒ kòyòcǒkòyòtè̤ dǒwǐkha tokhlǒ a yôla htûpwa̤ dǒ Cǒmara ma̤lǒbe hto lû̌û nutokhlǒ a ô̌ hǒ.

²⁴ Sî hètǒ̤ dǒ Yeshǔ a ô̌ hǒ. Ta̤olò̤ asa dǒ kòyòhǎkhû̌phû̌ kû̌ Cǒmara aplǎkûnu a htû bǎ pwa̤ma̤ta̤ dǒ aplǎkû tôpwa̤ hǒ. Htokhôtô̤̌ sî hètǒ̤ dǒ Běcǎ Yeshǔ asǐ lǎ̤sǐlò̤ agûlǎ̤ dǒ awô̌ khlo pe kû̌ Khûabelǎ asǐnu a ô̌ hǒ.

²⁵ Pô̤̌nudě, pô̤̌khô sî gǔ htû kòyò dǒ a ganǎ̤de Cǒmara alě̤pwe̤htò̌ dě a htè̌shěshu Cǒmara nutokhlǒ tô̤̌nu, ô̌sè̌rè̌ lô̌khô sînǎ̤ nî̌꤮. Bǎ Isôrělaphû̌ tokhlǒ ganǎ̤de ta̤dǐsè̌rè̌ asî dǒ hǎkhû̌nu akhanu, asî ganǎ̤de lô̌khô lû̌ûyô̤̌ tô̤̌. Pô̤̌nudě a khlè̌ hǎplǎbò̌ lô̌khô kû̌ ta̤cî̌htò̌ tô̤̌. Kè̌ ma̤pô̤̌nudě kè̌ pa htè̌shěshu dǒ mǒkhû̌ nutôpwa̤ dǔlè̌lṳ̌ panu kè̌hî̌dě, gènè̤kè̌mò̌, sî khlè̌ hǎplǎ bò̌jò pe kû̌ Cǒmara a ta̤cî̌htò̌ tîkî̌꤮ nô̌tô̤̌hǒ.

²⁶ Bǎnuakha Cǒmara ayô̤̌nu apwe̤ guyṳ̌ bò hǎkhû̌ tôbǎ. Bǎbǎkǎlè khònò̤̌dě a olò̤ kû̌, “He gǔ ma̤ guyṳ̌ pô̤̌gesô̌ pě tôplǎ, dě he ma̤ guyṳ̌ tǒ̤ hǎkhû̌ nutô̤̌, he ma̤ guyṳ̌ pô̤̌ bò mǒlǎ̤ tokhlǒ pě,” a hî̌ pô̤̌nu.

²⁷ A hî̌ kû̌, “Ma̤pô̤̌ sô̌ pě,” yô̤̌mûyô̤̌sǎ mî̌, a shôbǐǐlṳ̌phlô kèhto kû̌ Cǒmara ma̤ guyṳ̌htò̌ bò ta̤bô̌lò̤ nutokhlǒ pě, dě a hǎmǎkè bò pě. A guyṳ̌ jòtô̤̌ tokhlǒ gǔ ô̌kè pwǎ ayanu, Cǒmara ma̤guyṳ̌ pô̤̌nupwǎ.

²⁸ Pô̤̌nudě, pa hî̌bwǐhî̌sîrî wô̤̌wô̤̌ lû̌û Cǒmara tǎ꤮, ma̤titèhî̌dě pa nǐ̤bǎ shigǎ dǒ a guyṳ̌ jòtô̤̌ nutôgǎ. Pa gǔ cabahtò̌ Cǒmara kû̌ ta̤caba dǒ atô kû̌ asǎphlǒ kû̌ ta̤ǐsha bè̌dubè̌nǎ̤ lû̌û akûnu tǎ꤮.

²⁹ Ma̤titèhî̌dě pa Cǒmara mî̌ asô̌sô̌kû̌ mî̌gè̌htò̌ dǒ a gè̌sikè kòyò nuhǒ.