Hebrǔ 11 - Kawyaw New Testament

Ta̤yṳ̌

¹ Ta̤yṳ̌ta̤nǎ̤ yô̤̌mûyô̤̌sǎ mî̌ ta̤ dǒ pa kè̌shuǐ lû̌û tokhlǒ, pa yṳ̌ǎ měgle kû̌ pa gǔ nǐ̤bǎ hǒ. Htokhôtô̤̌ ta̤yṳ̌ta̤nǎ̤ yô̤̌mûyô̤̌sǎ mî̌ ta̤dǒ pa kè̌shǐjò khôtô̤̌ tokhlǒnu, pa yṳ̌ǎ měgle gutṳ̌ pe kû̌ pa gǔ nǐ̤bǎ pěnuhǒ.

² Cǒmara htû̌sò̌htò̌ǐ kòyò dǒ꤮ nukha tokhlǒ mî̌ a ô̌ lô̌khô kû̌ ta̤yṳ̌ta̤nǎ̤ pô̤̌onu hǒ.

³ Dǒ ta̤yṳ̌ta̤nǎ̤ akhû̌akhî, pa sî̌ganǎ̤ kû̌ Cǒmara bô̌lò̤ mǒlǎ̤ ayô̤agî̌ kû̌ ayô̤̌ pwǎ. Pô̤̌nudě ta̤ dǒ pa kè̌shǐjò khònò̤̌kha tokhlǒ numî̌ a ô̌ bǎ ta̤dǒ pa kè̌shǐ jòtô̤̌ tokhlǒ a ô̌ hè pwǎ.

⁴ Dǒ ta̤yṳ̌ akhû̌akhî, KhûAbelǎ lṳhtò̌ Cǒmaranu awô̌khlo kû̌ Khûkayi̤ ata̤lṳ. Cǒmara phî̌shěshu KhûAbelǎ a ta̤lṳtòhtò̌. Pô̤̌nudě, dǒ KhûAbelǎ ata̤yṳ̌ akhû̌akhî, dě Cǒmara bè̌hto lû̌û pô̤̌ kòyòcǒkòyòtè̤ tôpwa̤ nuhǒ. Dǒ KhûAbelǎ ata̤yṳ̌ akhû̌khî, a si htohǒ bǎbǎkǎlè a hî̌bǎpe pa kû̌ ata̤yṳ̌ awe̤akè.

⁵ Khûěnò̌nu bǎbǎ, dǒ ata̤yṳ̌ akhû̌akhî, a tṳ̌bǎnǒ kû̌ kòyò kû̌ ta̤si tô̤̌, Cǒmara kaǎge htò̌ htûpwa̤ lû̌û dǒ mǒkhû̌. Cǒmara kaǎge hǎmǎkè lû̌û akhû̌akhî, kòyò kè̌shǐjò pe lû̌û tô̤̌. Ma̤titèhî̌dě bǎ Cǒmara kaǎ gehtò̌ KhûĚnò̌ khôtô̤̌ akhanu, a mî̌ kòyò dǒ a ma̤tô Cǒmara asǎphlǒ tôpwa̤, lî̤plò̌shǐkû hî̌pô̤̌nu.

⁶ Ta̤yṳ̌ kè̌ ô̌tô̤̌nu, tôpwa̤꤮ mî̌ kòyò ma̤tôbǎ Cǒmara asǎphlǒ tô̤̌, ma̤titèhî̌dě, kòyò lǒ̤bò dǒ a hè dǒ Cǒmara a ô̌ tokhlǒnu, a bǎ yṳ̌ǎ kû̌ Cǒmaranu a ô̌htûpwa̤ dě kòyò dǒ a sǎphlǒshû̌ kè̌lǎ lû̌û tokhlǒnu, a bǎ yṳ̌ǎ kû̌ Cǒmara ǐ asî ta̤ma̤nǐ̤khû̌kǎ pě pô̤̌nu.

⁷ Dǒ Phanṳ̂̌a ata̤yṳ̌ akhû̌akhî, Cǒmara dǐô̌ sè̌rè̌nǎ lû̌ ta̤dǒ a kè̌shǐ sî̌ganǎ̤ khôtô̤̌ dǒ a gǔ htûhtò̌ htû̌ nô̌kòpě nutokhlǒ. A bè̌dubè̌nǎ̤ Cǒmara, a ganǎ̤de lû̌yô̤̌ dě a bô̌htò̌ sǒkhlidû̌ dǒ a gǔ ma̤hǎplǎge kû̌ a hǐphû̌phòphû̌ aya tôbǎ. Dǒ Phanṳ̂̌a ta̤yṳ̌ akhû̌akhî, a dǔlè̌lṳ̌ kû̌ Cǒmara cî̌htò̌ kòyò hǎkhû̌phû̌ tokhlǒ pě. Dě dǒ ata̤yṳ̌ akhû̌khî, Cǒmara bè̌hto a pô̤̌ kòyòcǒkòyòtè̤ tôpwa̤ hǒ.

⁸ Bǎ Cǒmara kaǎ PhaAbraha dě a nohǎhtò̌cû̌ lû̌û dǒ gǎtôgǎ dǒ a gǔ ǐ kû̌ lû̌û pě akhanu, a tô hǎhtò̌cû̌ tô bǎtè tôkûnṳ̌ a sî̌ganǎ̤ tô̤̌ bǎbǎkǎlè dǒ ata̤yṳ̌ akhû̌akhî, a ganǎ̤de dě a hǎhtò̌cû̌.

⁹ Dǒ ta̤yṳ̌ akhû̌akhî, a cû̌ô̌ dǒ kòyòshi kòyògǎ dǒ Cǒmara olò̤ kû̌ a gǔ ǐ lû̌û nutôbǎ. A cû̌ô̌ sô̌sô̌kû̌ khlilèphû̌ ashǔshawa̤ tôpwa̤ dě a cû̌ ma̤ hǐphû̌ dǒ to̤hǔbǐ tûû̌ kû̌ hugò̌pwǐ tokhlǒ dě a cû̌ô̌ pwǎ dǒ hǐphû̌kû. Dě a phû̌pwa̤khû KhûIsè̌ kû̌ ali̤ Khûya̤kò dǒ a nǐ̤bǎ sô̌sô̌kû̌ ta̤olò̤ dǒ Cǒmara a ô̌nu sò̌ginǐ̤nu, a shǒlò̤ sô̌sô̌dô̌ hǐphû̌ bǎnu.

¹⁰ PhaAbraha ma̤ pô̤̌ Cǒmara hî̌ lû̌nu, ma̤titèhî̌dě a ô̌pǒ̤ kè̌shuǐ wî̤̌ dǒ akòshî̌ měgle tûjû̌pwa̤nu tôwî̤̌. Wî̤̌ hǒtôwî̤̌nu, Cǒmara tîwî̌tòwò nǎ hto dě a bô̌htò̌ ǐtû̌ kû̌ anǎ̤nu.

¹¹ PhaAbraha mǒ̤pwǎ̤ kèhǒ, htokhôtô̤̌ ama Mǒ̤sara mî̌ a shôdôphû̌ bǎbǎkǎlè dǒ ata̤yṳ̌ akhû̌akhî, aphû̌ ô̌bò̌pe dě a htûhtò̌bò̌pe pha tôpwa̤. A yṳ̌ǎ kû̌ Cǒmaranu acǒ kû̌ a ta̤olò̤.

¹² PhaAbraha mǒ̤pwǎ̤ glè̌ sihǒ bǎbǎkǎlè dǒ a tôpwa̤pwǎ dě aphû̌ali̤ tokhlǒnu a ô̌wô̤̌ô̌dû̌ sô̌sô̌kû̌ shǎ dǒ mǒlǎ̤, a ô̌plṳ̂ô̌phǎ sô̌sô̌kû̌ lǒ̤semě dǒ shidû̌te̤we̤ htu dǒ kòyò dô̌bǎpè̤̌ jòpe tô̤̌ nutokhlǒ.

¹³ Kòyò lǒ̤bò dǒ Cǒmara olò̤ dǒ a gǔ ǐ lû̌û hǒtokhlǒ nî̌ a yṳ̌ǎ gutṳ̌ Cǒmara tǒ̤dǒ a si lô̌khô nutôni̤. Ta̤ dǒ Cǒmara olò̤kè lû̌û dǒ a gǔ ǐ asî hǒtokhlǒ nî̌ a nǐ̤bǎ khôtô̤̌, bǎbǎkǎlè asî kè̌shǐnǎ wǐ yî̤̌ kèhǒ dě a sǎlě̤ phî̌shěshu nǎ wǐ ta̤olò̤ nutokhlǒ hǒ. Asî olò̤ lô̌khô kû̌ asî mî̌ a cû̌ htû shǐtè̤mè̤ dǒ kòshikògǎ pwǎ, dě asî hè ô̌kǔlǎ bǎ hǎkhû̌nu tòshò̌phû̌ pwǎ, a hî̌ lô̌khô pô̤̌nu.

¹⁴ Kòyò dǒ a hî̌ lô̌khô pô̤̌o tokhlǒnu a dǔlè̌lṳ̌ lîtîklî̌ kû̌ asî kè̌shuǐ tû̌ lô̌khô tû̌hǒ ashigǎ tû̌hǒ.

¹⁵ Wî̤̌ dǒ PhaAbraha kû̌ kòyò nutokhlǒ hǎhtò̌cû̌kènu, asî shò̌tò̤̌ kû̌ wî̤̌ mè̤̌mî̌ca dǒ asîya mè̤̌tô̤̌. Ma̤titèhî̌dě, kè̌ a mè̤̌mî̌ca mò̌mî̌, asî genṳ̌ tîkhî numî̌ anǐ̤ nò pwǎ.

¹⁶ Bǎbǎkǎlè asî kè̌shuǐ nǎsǔ jî̌ mǒkhû̌ shigǎ dǒ a mô̤khlo nutôbǎ. Pô̤̌nudě asî kaǎ Cǒmara kû̌ asî Cǒmaranu, Cǒmara sòwò̤̌tô̤̌. Dǒ Cǒmara tîwî̌tòwò nǎ hto asî wî̤̌nu akhû̌akhî, a dǔlè̌lṳ̌ hto kû̌ asî tokhlǒ gǔ kaǎ Cǒmara kû̌ asî Cǒmaranu a sòwò̤̌ lô̌khô tô̤̌.

¹⁷ Bǎ Cǒmara ma̤kè̌kè̌ PhaAbraha akhanu, dǒ ata̤yṳ̌ akhû̌akhî, a lṳhtò̌ aphû̌khû KhûIsè̌. A nǐ̤bǎ Cǒmara a ta̤olò̤ bǎbǎ a ô̌ tîwî̌tòwònǎ dǒ a gǔ lṳhtò̌ aphû̌khû dǒ a ô̌pwǎ tôpwa̤ nô̤̌nu tôpwa̤.

¹⁸ Cǒmara hî̌ lû̌û kû̌, “He olò̤ kû̌ nakhlinalè tokhlǒnu a gǔ hèlò̤ tutṳ̌ dǒ KhûIsè̌ a ô̌ pě.” Bǎbǎkǎlè PhaAbraha ô̌ tîwî̌tòwò dǒ a gǔ lṳhtò̌ aphû̌khû dǒ a ô̌ pwǎ tôpwa̤ nô̤̌nu tôpwa̤.

¹⁹ PhaAbraha gènè̤ kû̌ Cǒmara gǔ ma̤htûpwa̤ getîkhî bò̌ pwǎ KhûIsè̌ pô̤̌nu. Kè̌ hî̌ mè̤mè̤̌ mî̌ a sô̌sô̌ kû̌ a nǐ̤bǎ getîkhî aphû̌khû dǒ ta̤si akû hǒ, ma̤titèhî̌dě Cǒmara kè̌ hî̌ tě̤tṳ lû̌tô̤̌ hî̌nu, a gǔ ma̤si mè̤mè̤̌ pwǎ aphû̌khû pwǎ.

²⁰ Dǒ ta̤yṳ̌ akhû̌akhîdě, PhaIsè̌ ǐshowî̤ nǎ aphû̌ Khûya̤kò kû̌ Khûětò̌ kû̌ ta̤ǐshowî̤ dǒ a gǔ nǐ̤bǎ dǒ nô̌kò pě tokhlǒ.

²¹ Dǒ ta̤yṳ̌ akhû̌akhîdě, bǎ Phaya̤kò glè̌ phǔsi akhanu, a ǐshowî̤ nǎwǐkè ali̤ Phayṳ̂tǎ aphû̌ sò̌ginǐ̤. A pṳ̂̌mě gètè̤wǎ̤ pwǎ a nò̌htô̌khi pwǎ dě a cabahtò̌ Cǒmara.

²² Dǒ ta̤yṳ̌ akhû̌akhîdě, bǎ Phayṳ̂tǎ glè̌ si akhanu, a hî̌nǎ kû̌ htû̌ nô̌kòpěnu, Isôrě̤laphû̌ tokhlǒ gǔ hǎhtò̌gekè bǎ Ijî̌gǎkûnu pě. Dě a mǎnǎ ayô̤̌ kû̌ htû̌꤮ sî hǎhtò̌ge pěnu, phî̌ge lô̌khô hekhwǐ pěnî̌, a hî̌nǎ pô̤̌nu.

²³ Dǒ ta̤yṳ̌ akhû̌akhîdě, bǎ Khûmṳ̂shě ô̌phijǎlò̤hto akhanu, amǒ̤apha kè̌shǐ kû̌ phijǎphû̌ hǒtôpwa̤nu, aphatwè̤̌ wî̤tè̤̌sî̌ khô̌ akhû̌akhî, asî bè̌hǔbè̌sè̌ ǐtû̌ lû̌û sula. Khwǐ hî̌lò̤ ayô̤̌ kû̌ a ma̤si bò Yǔdaphû̌ a phû̌pwa̤khû phijǎphû̌ tokhlǒ pě bǎbǎkǎlè asî ǐsha pe khwǐ a ta̤hî̌bǎ lò̤yô̤̌nu tô̤̌.

²⁴ Dǒ ta̤yṳ̌ akhû̌akhîdě, bǎ Khûmṳ̂shě phû̌sǎ dû̌htò̌ akhanu, kòyò kaǎ lû̌û kû̌ khwǐpharû aphû̌pwa̤mǒ̤ aphû̌khû dě, a no kaǎ kòyò pô̤̌nu tôpwǎ̤꤮ tô̤̌.

²⁵ Khûmṳ̂shě bè̌lò̤ asǎphlǒ kû̌, a glè̌ lṳ̂ ta̤mô̤ tòshò̌phû̌ dǒ a gǔ dǐ htûhtò̌ ta̤sǔnu, a gǔ khòdô̌kû̌ ta̤jî̌ta̤jû̌ kû̌ Cǒmara a kòyò tokhlǒnumî̌, a mô̤ǐkhlo pě a sǎyṳ pô̤̌nu.

²⁶ Khûmṳ̂shě bè̌lò̤ hǒ asǎphlǒ kû̌, khòbǎ ta̤pîjî̌ǐsho dǒ Khrǐ ayanu, alě̤dû̌pwî̤htû khlope kû̌ Ijî̌gǎ a ta̤dû̌yò̤̌htò̌sa tokhlǒ ma̤titèhî̌dě a ô̌pǒ̤kè̌shǔ kû̌ Cǒmara gǔ ǐlû̌ a ta̤ma̤nǐ̤khû̌kǎ htû̌꤮ nô̌kòpě.

²⁷ Dǒ ta̤yṳ̌ akhû̌akhîdě, a hǎhtò̌cû̌ dǒ Ijî̌gǎkû. Khwǐ sǎphlǒdû̌ lû̌û bǎbǎkǎlè a ǐsha tô̤̌. Ma̤titèhî̌dě a kè̌shǐ Cǒmara dǒ kòyò kè̌shǐjò lû̌û tô̤̌ nutôpwa̤ akhû̌akhî, a khòsǎphlǒhtû sělě hèpô̤̌.

²⁸ Dǒ ta̤yṳ̌ akhû̌akhîdě, a ma̤htò̌ bǎ kòyò pwè dǒ kòyò kaǎ kû̌ ta̤cû̌bò̌tûlû̌pwè. Pô̤̌khô tanaphû̌ dǒ a ma̤si phû̌wè̤̌pwa̤nu gǔ hè ma̤si Isôrě̤laphû̌ wè̤̌pwǎ̤ tokhlǒ tô̤̌nu, a no plṳ̌bò kòyò sû̌phû̌sǐ dǒ takhalô̤.

²⁹ Dǒ ta̤yṳ̌ akhû̌akhîdě, Isôrělaphû̌ tokhlǒ genṳ̌ tûlû̌bò̌kè shidû̌shitewe̤li̤ nutôû̌ dǒ asô̌sô̌kû̌ klè̌ cû̌ dǒ khôlôkhû̌khwenu. Bǎbǎkǎlè bǎ Ijî̌phû̌ tokhlǒ gû̌nṳ̌ kû̌ akhanu, asî lò̤cǔ sikè lǒ̤bò.

³⁰ Dǒ ta̤yṳ̌ akhû̌akhîdě, bǎ Isôrělaphû̌ tokhlǒ cû̌ te̤we̤ hto Wî̤̌yarikhò̌ susô̌tôni̤ akhanu, wî̤̌we̤ htò̌yô̤̌ lò̤tě̤pro̤kè.

³¹ Dǒ Wî̤̌yarikhò̌ akûnu, pwa̤mǒ̤shaǎlò̤nǎ̤ dǒ ami̤ kû̌ Mǒ̤rakhǎ ô̌tôpwa̤. A yṳ̌ǎ Cǒmara akhû̌akhî, bǎ kòyò ma̤si kòyò dǒ a yṳ̌ǎ Cǒmara tô̤̌ tokhlǒ akhanu, kòyò ma̤si dô̌ lû̌û tô̤̌. Ma̤titèhî̌dě a kaǎmô̤shǔ Isôrělaphû̌ dǒ a nṳ̌ kè̌ǐ gǎbǎnu tôgǎ akû nutokhlǒ dǒ ahǐkû akhû̌akhî, kòyò ma̤si dô̌ lû̌ tô̤̌.

³² He lǎ̤lṳ̂ hî̌lṳ̌ bǎ pô̤̌ sî mî̌titè? He kè̌ hî̌lṳ̌ bǎ pô̤̌ sî kû̌ Khûgǐdayo, Khûbarè̌, Khûshǐshû,Khûye̤phetǎ, Khûdawi̤, Khûshamuěla kû̌ piwi̤pèshè tokhlǒ awe̤akè hî̌dě ashěakhǎ ô̌pe tô̤̌.

³³ Dǒ ta̤yṳ̌ akhû̌akhîdě, asî hǒtokhlǒ nî̌ a shěpè̤̌ shigǎ tokhlǒ. Asî pǒta̤ cǒcǒtè̤tè̤ dě a nǐ̤bǎ ta̤ dǒ Cǒmara olò̤ asî nutokhlǒ. A ma̤pè̤̌ lô̌khô khî dě khî tokhlǒ ě asî tô̤̌.

³⁴ Asî ma̤pǐ̤bò lô̌khô mî̌gè̌ plô̤̌dû̌ tokhlǒ. Asî hǎplǎbò̌ lô̌khô kû̌ kòyò shusi asî kû̌ tô̤̌phû̌ tokhlǒ. Asî khû̌shiǎjǎ pwǎ bǎbǎkǎlè asî htûhtò̌ kòyò dǒ ashû̌asho mè̤mè̤̌ tokhlǒ. Asî nǐ̤bǎ ta̤shû̌ta̤sho dǒ ta̤shěta̤pě̤ aya dě a ma̤pî̌kè gǎshǔshawǎ̤ gǎkhlophû̌ dǒ a sǎphlǒdû̌ asî tokhlǒ.

³⁵ Dǒ ta̤yṳ̌ akhû̌akhî, pwa̤mǒ̤ tokhlǒkhlǒnu, akhlialè tokhlǒ si htohǒ bǎbǎkǎlè a nǐ̤bǎ getîkhî sô̌ asî dǒ ta̤si akû. Pwa̤yṳ̌ǎta̤phû̌ tokhlǒkhlǒnu, kòyò ma̤jî̌ma̤jû̌ asî. Kòyò hî̌ asî kû̌ asî kè̌ wîkè lô̌khô ata̤yṳ̌ hî̌dě, kòyò gǔ plûhǎhtò̌ pi̤li̤ cû̌kè asî bǎbǎkǎlè a jûshǔ kòyò yô̤̌ tô̤̌. Dǒ asî ma̤pô̤̌nu akhû̌akhî, kòyò ma̤si jî̌jû̌ asî. Bǎbǎkǎlè, htû̌ asî si ihtǒhtûpwa̤sô̌ pě tôni̤nu, pô̤̌khô asî gǔ nǐ̤bǎ lô̌khô ta̤ô̌htûpwa̤ dǒ a mô̤lǒ kû̌ hǒtôhtu ayanudě, asî ma̤ lô̌khô pô̤̌nu pwǎ.

³⁶ Tokhlǒkhlǒnu, kòyò ma̤ sòwò̤̌ bò asî, kòyò pîjî̌ǐsho bò asî, dě kòyò po̤ asî kû̌ sǒpli̤lǎ̤plè, tokhlǒkhlǒnu kòyò comě asî kû̌ sǒpli̤tè̤glè, dě kòyò dǒnṳ̌ asî dǒ apô̤kû.

³⁷ Tokhlǒkhlǒnu kòyò tě̤si asî kû̌ lǒ̤, kòyò dǔtṳ̌ asî kû̌ tě̤htò̌lǎ̤bǔtṳ̌, kòyò shusi asî kû̌ nò̌she sòbò. Asî cû̌lè lô̌khô dě a kûsô̌ lô̌khô pwǎ sû̌phû̌bě, pè̤̌bě tokhlǒ, asî hǎwǐ̤shèwè̤ jî̌jî̌, kòyò ma̤jî̌ma̤jû̌ asî. Kòyò pè̤̌ǎpè̤̌ô bò asî tokhlǒ.

³⁸ Kòyò hǒtokhlǒnu awô̌ tûlû̌shû̌lě dě a gwǎ pe kû̌ hǎkhû̌nu tô̤̌. Asî ô̌htûpwa̤ bǎ hǎkhû̌nu, a bǎ cû̌lè te̤we̤ sô̌sô̌kû̌ kòyò dǒ a shôdôhǐ shôdôphò tokhlǒ, asî bǎ cû̌ô̌ pwǎ gûlǎ̤ dǒ kòyò cû̌ô̌bǎ tôpwǎ̤ tô̤̌ nutokhlǒ agûlǎ̤ pwǎ.

³⁹ Dǒ asî ta̤yṳ̌ akhû̌akhîdě, kòyò lǒ̤bò tokhlǒnu, Cǒmara kè̌mô̤ǐ mî̌ca asî. Bǎbǎkǎlè lǒ̤bò Cǒmara olò̤ tokhlǒnu, asî nǐ̤bǎ kû̌ kòyò tô̤̌.

⁴⁰ Ma̤titèhî̌dě ta̤ dǒ awô̌khlo kû̌ hǒtokhlǒ nî̌ Cǒmara ta̤yè̤lò̤nǎ bǎ hto dǒ paya dě a ǐ kû̌ pa pě. Cǒmara bè̌lò̤ hto asǎphlǒ kû̌ pa tôbǎnṳ̌ ô̌pe tǒ̤ kû̌ kòyò dǒnukha tokhlǒ. A ta̤yè̤lò̤nǎ numî̌ pa gǔ ma̤lǒma̤be plǒkû̌ asî nuhǒ.