Hebrǔ 1 - Kawyaw New Testament

Comara hî̌bǎlò̤ tutṳ̌ kû̌ aphû̌khû

¹ Cǒmara hî̌bǎlò̤ sǎla̤la̤ paphipaphu dǒwǐdǒnô̌ akha tokhlǒ kû̌ dǒ klè̌ abô̌꤮ bô. Dě a nohî̌bǎ tutṳ̌ kû̌ piwi̤pèshè tokhlǒ.

² Bǎbǎkǎlè lṳmṳ̌ni̤ gutṳ̌kò tokhlǒnu, a hî̌bǎlò̤ tutṳ̌ kû̌ a phû̌pwa̤khû. Cǒmara nobô̌lò̤ tutṳ̌ aphû̌khû kû̌ hǎkhû̌ mǒkhû̌ kû̌ ta̤lǒ̤꤮ bò. Dǒ gutṳ̌kò pěnu, lǒ̤꤮ bò ta̤nutokhlǒ pô̤̌khô a gǔ htûbò ata pě nudě Cǒmara rû̌htò̌ yǎ hǒ.

³ Kòyò gǔ kè̌shǐ tutṳ̌ Cǒmara a ta̤bwǐdû̌sîrîhtû dǒ akû pě. A mî̌ a sô̌sô̌ bòmǔtegle kû̌ Cǒmara. Pô̤̌khô hǎkhû̌ kû̌ mǒkhû̌ kû̌mî̌ ta̤bô̌lò̤ lǒ̤꤮ bò tokhlǒ gǔ ô̌ gutṳ̌ hènè pô̤̌ pěnu, a pṳ̂̌mějè̌ kû̌ ta̤bô̌lò̤ lǒ̤bònu kû̌ ayô̤̌ dǒ apô̤phǎ shû̌sho nutokhlǒ. Bǎ a ma̤phlǔma̤hto ta̤plûkè kòyòhǎkhû̌phû̌ ata̤sǔ sîtokhlǒ akhanu, a gehtò̌ dǒ mǒkhû̌ dě a htò̌hǎnòò̌ bǎ Cǒmara dǒ apô̤aphǎ adû̌htû gutṳ̌ nutôpwa̤ acǔde cǔtômû tôkhô pě.

Cǒmara aphû̌khû dû̌khlo mǒkhû̌ tanaphû̌ tokhlǒ

⁴ Cǒmara aphû̌khû nî̌ a htûhtò̌kè pwa̤ dǒ adû̌ahtû khlo tanaphû̌ ô̌ bǎ mǒkhû̌ nutokhlǒ. Hǒo numî̌ a sô̌sô̌ kû̌ a ǐ aphû̌khû ami̤ dǒ adû̌ahtû khlo mǒkhû̌ tanaphû̌ nutokhlǒ ami̤ hǒ.

⁵ Lî̤plò̌shǐkû wě̤ kû̌ Cǒmara hî̌ aphû̌khû pô̤̌o, “Na mî̌ hephû̌pwa̤khû, khò̌tôni̤ dě, he htû napha hǒ,” a hî̌ pô̤̌nu. Bǎbǎkǎlè Cǒmara hî̌bǎ mǒkhû̌ tanaphû̌ pô̤̌nu tôpwǎ̤꤮ tô̤̌. Lî̤plò̌shǐ wě̤ pe dǒ ashǔshawa̤ tômè dě a hî̌ kû̌, “He htû apha pě, dě a htû hephû̌ pě,” ata̤hî̌ pô̤̌o nî̌ a hî̌bǎ mǒkhû̌ tanaphû̌ tôpwǎ̤꤮ tô̤̌tô̤̌.

⁶ Bǎ Cǒmara nohèlò̤ aphû̌khû wè̤̌pwǎ̤ dǒ hǎkhû̌ akhanu, a hî̌ kû̌, “Cǒmara a tanaphû̌ lǒ̤꤮ bò bǎ cabahtò̌ phû̌khûnu,” a hî̌ pô̤̌nu.

⁷ Bǎbǎkǎlè Cǒmara hî̌tè̌ mǒkhû̌ tanaphû̌ tokhlǒ awe̤akè kû̌, “Cǒmara nohtûhtò̌ a tanaphû̌ tokhlǒ pô̤̌ gili̤sǎnu. Asî tokhlǒ numî̌ Cǒmara pwa̤ma̤ta̤phû̌ tokhlǒ dě a nohtûhtò̌ asî pô̤̌ mî̌plô̤̌nu,” a hî̌ pô̤̌nu.

⁸ Bǎbǎkǎlè, bǎ a hî̌tè̌ aphû̌khû awe̤akè akhanu, “Ǒ꤮ Cǒmara, nashinagǎnu, a ô̌yî̤ tûjû̌pwa̤ talakhǎ pě꤮. Na pǒǐtû̌ na kòyò tokhlǒ kû̌ ta̤tě̤ta̤mè̤̌ pě.

⁹ Na mô̤ǐ ta̤ dǒ atô tokhlǒ dě na sǎkhě ta̤ dǒ asǔ tokhlǒ. Dǒ hǒo akhû̌akhî dě Cǒmara dǒ a mî̌ na Cǒmaranu rû̌htò̌ hto na dě a no dû̌htû khlokè na kû̌ nasû̌nakhô tokhlǒ hǒ. A bè̌dû̌bè̌htû na hǒ, a ǐ na sǎlě̤sǎlò̤ hǒ,” a hî̌ lû̌û pô̤̌nu.

¹⁰ Htodě a hî̌ pô̤̌ aphû̌khû kû̌, “Ǒ꤮ Běcǎ, dǒ tôcǒ꤮ ô̌htûhtò̌ khôtô̤̌ akhanu, na bô̌lò̤ tûû̌ hǎkhû̌, na tèlò̤ tûû̌ mǒlǎ̤ tokhlǒ kû̌ na cǔde.

¹¹ Hǎkhû̌ kû̌ mǒlǎ̤ tokhlǒ gǔ pî̌kèbò pě bǎbǎkǎlè na gǔ ô̌ gutṳ̌ hènè tûjû̌pwa̤ pě. Hǎkhû̌ kû̌ mǒlǎ̤ tokhlǒ gǔ htò̌yè̌htò̌mǔkè pô̤̌ jehǐyò̤̌li̤ jehǐyò̤̌ ayò̤̌ nutokhlǒ pě.

¹² Na gǎkhlǐwô̌kè asî tokhlǒ pô̤̌ jekhlonu pě. Na htû̌lè̌ tèplè̌ khô̌kèbò hǎkhû̌ kû̌ mǒlǎ̤ tokhlǒ pô̤̌ kòyò tôpwa̤ htû̌lè̌ tèplè̌kè ajenu pě. Bǎbǎkǎlè na bè̌ na sǎphlǒ gûlǎ̤lǎ̤ pwǎ pě. Na lṳmṳ̌ni̤ lṳmṳ̌sanu, a gutṳ̌jò tô̤̌,” a hî̌ pô̤̌nu.

¹³ “Hǎnòò̌ô̌ dǒ he cǔde cǔtômû nutôkhô, dě hǎnòò̌ tǒ̤dǒ he nopǒ na kû̌ pwa̤dǔdǎ na nutokhlǒ hè cabahtò̌ na dǒ na khò̌lôpô̤̌ kòshî̌ pě,” Cǒmara hî̌bǎnǒ amǒkhû̌ tanaphû̌ tokhlǒ pô̤̌onu tômṳ̂̌꤮ tô̤̌.

¹⁴ Kè̌hî̌pô̤̌nudě, mǒkhû̌ tanaphû̌ tokhlǒ mî̌ mò̌pè? Asî mî̌ yôla htûpwa̤ dǒ a ma̤ bǎ Cǒmara ata̤ma̤ tokhlǒ. Cǒmara noma̤jè̌ bǎ asî kû̌ kòyò dǒ a nǐ̤bǎ ta̤ma̤hǎplǎge pě tokhlǒ aya pwǎ.