Galatǐ 5 - Kawyaw New Testament

Ta̤pi̤li̤ dǒ Yeshǔ Khrǐ akû

¹ Pô̤̌khô pa gǔ nǐ̤bǎ ta̤pi̤li̤ ayanu, Yeshǔ Khrǐ ma̤hǎplǎge pa dǒ pa htû ta̤mǎlò̤ ajû̌nu alǎ̤ hǒ. Pô̤̌nudě ô̌měô̌gle lô̌khô dě tiwǐ getîkhî lô̌khô, htû pe tǎ̤ lô̌khô jû̌nu tǎ̤mǎ̤ nî̌.

² Ganǎ̤de kû̌lǎ he mî̌ Khûpò̌lǔ hî̌ bǎ sînu, sî kè̌ gû̌ma̤ ta̤dǔtṳ̌bě numî̌, Khrǐ tṳ̌sikhòsi dǒ sîya nu, a htûbwǐhtûsîrî pe dǒ sîya tôcǒ꤮ tô̤̌ hǒ.

³ He sè̌rè̌ sô̌ sî kû̌ kòyò tôpwa̤pwa̤ dǒ a kè̌ jûǎ ta̤dǔtṳ̌ numî̌ a tôbǎ gû̌ma̤bò ta̤sû̌ta̤tòwò pṳ̂̌꤮ tômè.

⁴ Dǒ sîkla tokhlǒkhlǒnu, a gènè̤sǔ lô̌khô kû̌ asî kè̌ gû̌ma̤ ta̤sû̌ta̤tòwò numî̌ Cǒmara bè̌cǒbè̌tè̤ lû̌û pě, pô̤̌nu. Sî kè̌ gènè̤ lô̌khô pô̤̌nu hî̌dě sî bǒsû̌khǎkhô pe sînǎ̤ kû̌ Khrǐ tô̤̌. Sî bè̌tephekè sînǎ̤ kû̌ Cǒmara abwǐsîrî nuhǒ.

⁵ Bǎbǎkǎlè dǒ Yôla Plò̌shǐ Běcǎ akhû̌akhîdě, pa yṳ̌ǎ panǎ̤ kû̌ Cǒmara bè̌cǒbè̌tè̤ pa, ma̤titèhî̌dě pa yṳ̌ǎ Yeshǔ Khrǐ. Pa ô̌pǒ̤kè̌shuǐ mè̤̌mî̌ca ta̤nuhǒ.

⁶ Ma̤titèhî̌dě bǎ sî htûhtò̌kè kû̌ Yeshǔ Khrǐ tôcǒ꤮ nô̤̌ akhanu, ta̤dǔtṳ̌bě bǎbǎ, ta̤dǔtṳ̌bě tô̤̌ bǎbǎ, a htûbwǐhtûsîrî nô̌ tôcǒ꤮ tô̤̌. Ta̤ dǒ a htûbwǐhtûsîrî khlo numî̌, ta̤yṳ̌ta̤nǎ̤ dǒ a dǔlè̌lṳ̌ ta̤mô̤ Cǒmara kû̌ kòyò ashǔshawa̤nu pwǎ.

⁷ Sî khlè̌ wô̌wô̌bǎbǎ htohǒ bǎbǎkǎlè mò̌pè tôpwa̤ noô̌kǔ sî dǒ sî gǔ ganǎ̤de ta̤tě̤ta̤mè̤̌ tô̤̌nu ya?

⁸ Cǒmara dǒ a kaǎ sî tôpwa̤ numî̌, a noô̌kǔ nô̌ sî tô̤̌.

⁹ “Ta̤bû tîkî̌phû̌ pwǎnu a ma̤ tophǒhtò̌ dû̌wî̤ mû̌ tôpû̌ bò̌bò.”

¹⁰ Bǎbǎkǎlè dǒ pa htûhtò̌kè ta̤tôcǒ꤮ nô̤̌ kû̌ Běcǎ akhû̌akhî, he yṳ̌ǎ kû̌ sî ta̤kè̌shǐ hǒonumî̌ a lûcû̌khô̌ kû̌ he tô̤̌. Mò̌pè bǎbǎ dǒ a ma̤dǐdò sî tôpwa̤pwa̤nu, Cǒmara gǔ cî̌htò̌ tûlû̌ pě.

¹¹ Pṳ̌wè̤̌ sî, he gǔ shôbǐǐlṳ̌ bǎ sî kû̌ Yǔdaphû̌ alǎ̤klô dǔtṳ̌aphě numî̌ ta̤ dǒ a lṳ̂dû̌shî̌ mè̤̌tô̤̌. Dǒ Yeshǔ akhû̌akhî, Yǔdaphû̌ tokhlǒ ma̤jî̌ma̤jû̌ gutṳ̌glǎ he pwǎ. He kè̌ shôbǐǐlṳ̌ bǎ sî kû̌ sî bǎ dǔtṳ̌aphě kè̌hî̌numî̌, Yǔdaphû̌ tokhlǒ sǎphlǒmô̤꤮ jî̌ kǎlè. Bǎbǎkǎlè he shôbǐǐ pô̤̌nutô̤̌. He shôbǐǐ pwǎ kû̌ Khrǐ nò̌dò̌htǔ dǒ Yǔdaphû̌ tokhlǒ sǎphlǒmô̤ yǎ tô̤̌nu awe̤akè pwǎ.

¹² Kòyò dǒ a ma̤jî̌ ma̤shû̌shǎ sî sǎphlǒ kû̌ ta̤dǔtṳ̌phě awe̤akè tokhlǒnu, he sǎyṳ noshǔkèbò pô̤̌ a dǐnu.

¹³ He pṳ̌wè̤̌ sî, pô̤̌khô sî gǔ nǐ̤bǎ ta̤pi̤li̤ ayanudě, Cǒmara kaǎhto sî hǒ. Bǎbǎkǎlè dǒ sî nǐ̤bǎ ta̤pilinu akhû̌akhîdě, nopǒ tǎ̤ sînǎ̤ kû̌ sî sǐshiphěyî̌ a ta̤sǎyṳsǎbǎ nutokhlǒ tǎ̤mǎ̤ nî̌. Mè̤mè̤̌tôkhônu, sî tô mô̤ǐ kè̌khî lû̌û tôpwa̤ kû̌ tôpwa̤, sî tô ma̤jè kè̌khî bò lû̌û tôpwa̤ kû̌ tôpwa̤.

¹⁴ Ma̤titèhî̌dě lǒ̤bò ta̤sû̌ta̤tòwò tokhlǒnu kè̌ bè̌plǒ lǒ̤bò yǎ kû̌ ta̤mǎlò̤ tômûpwǎ numî̌, a gǔ hî̌ kû̌, “Mô̤ǐ kòyò dǒ a ô̌ phǔ te̤we̤bò kû̌ na nutokhlǒ pô̤̌ na mô̤ǐlò̤ tûû̌ nanǎ̤nu nî̌,” a gǔ hî̌ pô̤̌o pwǎ.

¹⁵ Bǎbǎkǎlè sî kè̌ jî̌ sînǎ̤ pô̤̌ ta̤mi̤ta̤mò̤̌ dě sî kè̌ ǎ kè̌khî sô̌ lû̌û tôpwa̤ kû̌ tôpwa̤ numî̌ ô̌sè̌rè̌ lô̌khô sînǎ̤ nî̌꤮, ma̤titèhî̌dě hî̌pě sî ma̤pî̌ma̤lṳ̂̌ tûû̌ bòsô̌ sînǎ̤ tôpwa̤ kû̌ tôpwa̤ pě.

Ô̌htûpwa̤ kû̌ Yôla Plò̌shǐ Běcǎ

¹⁶ Pô̤̌nudě he hî̌ sî, ô̌htûpwa̤ lô̌khô pô̤̌ Yôla Plò̌shǐ Běcǎ nè̌klè̌nè̌klòǐ sî nunî̌. Sî kè̌ ma̤pô̤̌nu htodě sî gû̌ma̤ pe sî sǐshiphěyî̌ a ta̤sǎyṳsǎbǎ tô̤̌ hǒ.

¹⁷ Ma̤titèhî̌dě sǐshiphěyî̌ a ta̤sǎyṳsǎbǎ numî̌, a lûcû̌ khô̌kè kû̌ Yôla Plò̌shǐ Běcǎ a ta̤sǎyṳsǎbǎ. Dě Yôla Plò̌shǐ Běcǎ a ta̤sǎyṳsǎbǎnu a lûcû̌ khô̌kè sô̌ kû̌ nǎ̤glǒ a ta̤sǎyṳsǎbǎ. Ta̤hǒo ginǐ̤cǒ a kla lû̌û tô̤̌ akhû̌akhî, pô̤̌ sî sǎyṳ ma̤ nu sî ma̤jò pe tô̤̌ hǒ.

¹⁸ Yôla Plò̌shǐ Běcǎ kè̌ sû sî hî̌dě, sî ô̌ pe dǒ ta̤sû̌ta̤tòwò alǎ̤ tô̤̌ hǒ.

¹⁹ Sǐshiphěyî̌ ata̤ma̤ nutokhlǒmî̌ a ô̌lṳ̌lîtîklî̌ hî̌tè numî̌ a cû̌sǔnṳ̌plěnṳ̌ pwa̤mǒ̤pwa̤khû, a ô̌htûpwa̤ phû̌mò̤̌shǐhtô, asǎphlǒ putupatǎ,

²⁰ A caba lô̌khô ta̤yô̤ta̤gî̌, a ma̤ lô̌khô khînǎkhîno ta̤ma̤ tokhlǒ, a sǎkhěkhû̌khwè kè̌khî lû̌û, a htè̌ kè̌khîlû̌û, sǎkhě kè̌khî lû̌û, sǎphlǒdû̌ lû̌û, sǎyṳ mi̤ lṳ̌shilṳ̌gǎ, sǎphlǒ tô kè̌khî lû̌û tô̤̌, sǎkhěkè Khrǐphû̌ aprṳ̂aphǎ dǒ ashǔshawa̤ tokhlǒ.

²¹ Kè̌lǎma̤ǎ kòyòkhû̌, ta̤ǎmuômu, ma̤pwèma̤lû dǒ aphû̌mò̤̌ kû̌ ta̤ma̤ ashǔshawa̤ dǒ asô̌sô̌kû̌ hǒtokhlǒ. Pô̤̌ he dǐsè̌rè̌ hto sî dǒ awǐkhanu hǒ, he dǐsè̌rè̌ pô̤̌ sô̌ sî khònò̤̌. Kòyò dǒ a ô̌htûpwa̤ pô̤̌o tokhlǒnu, a nǐ̤bǎ gû̌ kòyò Cǒmara shilǎ̤gǎkû a ta̤ǐshowî̤ tô̤̌.

²² Bǎbǎkǎlè Yôla Plò̌shǐ Běcǎ numî̌ a dǐô̌htò̌ ta̤mô̤, ta̤sǎlě̤sǎlò̤, ta̤pè̤̌ta̤dû, ta̤khòsǎdô, ta̤sǎyṳgwèbǎǐ, ta̤wî̤ta̤wô̌, ta̤jûlě̤phî̌yô̤̌,

²³ Ta̤sǎdôhôbî̌ kû̌ ta̤khòpè̤̌ sǎphlǒ sî tokhlǒnu hǒ. Sî kè̌ ma̤pô̤̌ numî̌, asǔ pwǎ ta̤sû̌ta̤tòwò hî̌nô̌ pô̤̌nu tômè̌ tô̤̌.

²⁴ Kòyò dǒ a htû Yeshǔ Khrǐ ata̤ tokhlǒ numî̌ a sǐshiphěyî̌ a ta̤sǎyṳsǎbǎ pǒǐ pe lû̌û tô̤̌ hǒ. A po̤sihtò̌kè a sǐshiphěyî̌ a ta̤sǎyṳsǎbǎ lǒ̤bò dǒ nò̌dò̌htǔ alô̤ hǒ.

²⁵ Pa ô̌htûpwa̤ kû̌ Yôla Plò̌shǐ Běcǎ akhû̌akhî, pa bǎ gû̌ma̤ pô̤̌ Yôla Plò̌shǐ Běcǎ nè̌klè̌nè̌klò panu.

²⁶ Pa bǎ bè̌dû̌ panǎ̤ tô̤̌. Ma̤sǎphlǒdû̌ kè̌khî tǎ̤ lû̌û tôpwa̤ kû̌ tôpwa̤ tǎ̤mǎ̤. Sǎkhě kè̌khîlû̌û tôpwa̤ kû̌ tôpwa̤ tǎ̤mǎ̤ nî̌꤮.