Ěphěsu 5 - Kawyaw New Testament

Ô̌htûpwa̤ dǒ ta̤lî akû

¹ Sî mî̌ Cǒmara aphû̌ali̤ dǒ a mô̤ǐ sîtokhlǒ akhû̌akhî, ô̌htûpwa̤ kè̌lû̌ sô̌sô̌kû̌ lô̌khô pô̤̌ anu nî̌꤮.

² Sî tô ô̌htûpwa̤ lô̌khô hî̌tè numî̌, mô̤nṳ̌ lô̌khô kòyò pṳ̂̌꤮ tôni̤ sô̌sô̌kû̌ Khrǐ mô̤ǐ pa dě a tṳ̌sikhòsi bǎ payanu nî̌꤮. Htokhôtô̤̌ Khrǐ lṳhtò̌ ata̤htûpwa̤ dǒ Cǒmara a lô̤mô̤̌ sô̌sô̌kû̌ ta̤numû̌ dǒ atô Cǒmara asǎphlǒ nuhǒ.

³ Sî htûhto Cǒmara a kòyò aplò̌shǐ tokhlǒ akhû̌akhî, ta̤cû̌sǔ pwa̤mǒ̤pwa̤khû, ta̤ma̤ sòwò̤̌ ǐ tûû̌ anǎ̤ kû̌ sǐshiphěyî̌ a ta̤sǎyṳ phû̌mò̤̌ pṳ̂̌tocǒ, tô̤̌mî̌ ǎtṳ̌ǎbǐ kò khû̌ tokhlǒnu, a tôbǎ ô̌ dǒ sîkla tîkî̌꤮ tô̤̌.

⁴ Ta̤hî̌bǎ phû̌mò̤̌shǐhtô, ta̤hî̌bǎ dǒ yô̤̌mûyô̤̌sǎ ô̌tô̤̌ tokhlǒ, ta̤hî̌bǎ putupatǎ tokhlǒnu, atôabǎ tô̤̌ akhû̌akhî, hî̌bǎ lô̌khô tǎ̤mǎ̤ nî̌꤮. Tònò̤̌ sî glè̌ hî̌bǎta̤ pô̤̌nu tokhlǒnu, hî̌bwǐhî̌sîrî htò̌wǐ dǒ Cǒmaranu.

⁵ Sî sî̌ganǎ̤ mè̤̌mî̌cahto kû̌ kòyò dǒ a cû̌sǔnṳ̌plěnṳ̌ pwa̤mǒ̤pwa̤khû, kòyò dǒ a ma̤sòwò̤̌ tûû̌ anǎ̤ kû̌ sǐshiphěyî̌ a ta̤sǎyṳ phû̌mò̤̌ tokhlǒ, kû̌ ǎkǒôbe tûû̌ aya tokhlǒnu, a nǐ̤bǎjò kû̌ kò û̌tě̤û̌ca dǒ Khrǐ kû̌ Cǒmara ashiagǎkûnu tôpwǎ̤꤮ tô̤̌. Kòyò dǒ a ǎkǒôbe tûû̌ aya tokhlǒ numî̌ asô̌sô̌kû̌ cabahtò̌ ta̤yô̤ta̤gî̌ nuhǒ.

⁶ No tili̤talô̌ǐ tǎ̤ sînǎ̤ kû̌ kòyò dǒ a hî̌bǎlòhô dě yô̤̌mûyô̤̌sǎ ô̌tô̤̌ tokhlǒnu tǎ̤mǎ̤ nî̌꤮. Kòyò dǒ a ma̤ ta̤phû̌mò̤̌shǐhtô pô̤̌nu tokhlǒ, dě a ganǎ̤de kû̌ kòyò Cǒmara ayô̤̌ tô̤̌ tokhlǒnu, Cǒmara gǔ sǎphlǒdû̌ asî pě dě a gǔ cî̌htò̌ asî pě.

⁷ Pô̤̌nudě, cû̌nṳ̌ bǒsû̌ tǎ̤ kû̌ kòyò ma̤ta̤sǔ pô̤̌nu tokhlǒ tǎ̤mǎ̤ nî̌꤮.

⁸ Sî nǎ̤běcǎ dě sî ô̌htûpwa̤ hto dǒ ta̤khǐsiwi̤ akla hǒ. Bǎbǎkǎlè khònò̤̌ sî htû Běcǎ a kòyò hǒ dě sî ô̌ dǒ ta̤lî akû hǒ. Pô̤̌nudě ô̌htûpwa̤ sô̌sô̌kû̌ lô̌khô pô̤̌ ta̤lîphû̌ tokhlǒnu nî̌꤮.

⁹ Ma̤titèhî̌dě, ta̤lî a ta̤sǎta̤phô tokhlǒ numî̌ lǒ̤bò ta̤tôta̤bǎ, ta̤tě̤ta̤mè̤̌ kû̌ ta̤sǎphlǒ cǒtè̤ tokhlǒ nuhǒ.

¹⁰ Dě kè̌shuǐ sî̌ganǎ̤ lô̌khô ta̤ dǒ atô Cǒmara asǎphlǒ nutokhlǒ nî̌꤮.

¹¹ Ta̤khǐsiwi̤ ata̤ma̤ tokhlǒnu cû̌nṳ̌ ma̤ tǎ̤mǎ̤ nî̌꤮. Asî ta̤ma̤ nutokhlǒ mî̌ abwǐsirî ô̌ tôcǒ꤮ tô̤̌. Mè̤mè̤̌tôkhônu, ta̤ hǒo tokhlǒ nî̌ a dǐsî̌ganǎ̤ bǎ kòyò kû̌ awô̌tô̤̌.

¹² Ta̤ma̤ dǒ kòyò ganǎ̤de kòyò Cǒmara ayô̤̌ tô̤̌ tokhlǒ dě ma̤hǔma̤û̌ ǐtûû̌ tokhlǒnu, shôbǐǐ pwǎ ata̤ma̤ awe̤akè pwǎnu tô hî̌bǎ tô̤̌. Ta̤nutokhlǒ mî̌ lǎ̤sòwò̤̌ agûlǎ̤ pwǎ.

¹³ Kòyò phî̌htò̌lṳ̌ bò ta̤lǒ̤bò dǒ alîklanu, lǒ̤bò ta̤nu tokhlǒ, asô̌sô̌kû̌ titènu kòyò kè̌shǐ lṳ̌lîtîklî̌ bòhǒ.

¹⁴ Ta̤ dǒ a dǐ kè̌shǐlṳ̌ sî̌ganǎ̤ tě̤tě̤mè̤̌mè̤̌ wô̌ kòyò mî̌ ta̤lî nô̤̌ pwǎ. Pô̤̌nudě kòyò hî̌ kû̌, “Phahǎmôô̌shû̌, shǐnǎsô̌ mò̌, ihtǒge mò̌ dǒ ta̤si a gûlǎ̤nu. Khrǐ a ta̤lî gǔ kakhalò̤ dǒ nalô̤ pě.”

¹⁵ Pô̤̌nudě, sî bǎ ô̌htûpwa̤ hî̌tènu, sè̌rè̌ lô̌khô sînǎ̤ nî̌꤮. Ô̌htûpwa̤ lô̌khô tǎ̤ pô̤̌ kòyò dǒ a gènè̤phlô gènè̤phǎ tô̤̌ nutokhlǒ tǎ̤mǎ̤ nî̌꤮. Ô̌htûpwa̤ lô̌khô pô̤̌ kòyò dǒ a gènè̤phlô gènè̤phǎ nutokhlǒ nî̌꤮.

¹⁶ Bǎkhò̌tè̌꤮ bǎbǎ, bǎ na nǐ̤bǎ ta̤shěta̤khǎ wô̌ dǒ na gǔ ma̤ ta̤wô̌ akhanu, tûlû̌ ma̤ yǎ nî̌꤮, ma̤titèhî̌dě lṳlṳmṳ̌ni̤lṳmṳ̌sa khònò̤̌ tokhlǒ numî̌ lṳlṳmṳ̌ni̤lṳmṳ̌sa dǒ kòyò ma̤ ta̤phû̌mò̤̌shǐhtô tokhlǒ pwǎ.

¹⁷ Pô̤̌nudě ô̌ pè̌sho lô̌khô tǎ̤mǎ̤ nî̌꤮. Běcǎ sǎphlǒô̌ kwè̌꤮ hî̌tènu kè̌lǎ sî̌ya lô̌khô nî̌꤮.

¹⁸ Ǎmuômupwǎ lô̌khô sînǎ̤ kû̌ shishǐkhǎ tǎ̤mǎ̤ nî̌꤮, ma̤titèhî̌dě ta̤ǎmuômupwǎnu a ma̤pî̌ kòyò ta̤ô̌htûpwa̤. Pô̤̌nudě plûnṳ̌ Yôla Plò̌shǐ Běcǎ gǔ ô̌lǒô̌be bǎ nakûnu nî̌꤮.

¹⁹ Sî tôpwa̤ kû̌ tôpwa̤ sǎwǐ kè̌khî kû̌ Cǒmara alî̤ sǎwǐ tokhlǒ kû̌ lî̤sǎwǐ htû̌sò̌htò̌ nutokhlǒ nî̌꤮. Sǎwǐ lô̌khô dě sǎwǐ htû̌sò̌htò̌ lô̌khô dǒ sî sǎphlǒkûnu.

²⁰ Titètè̌꤮ aya bǎbǎ, dǒ pa Běcǎ Yeshǔ Khrǐ ami̤ akhû̌akhî, tûlû̌ hî̌bwǐhî̌sîrî papha Cǒmara pṳ̂̌꤮ taplǎ nî̌꤮.

Ma kû̌ wṳ̂ tokhlǒ

²¹ Sî bè̌dubè̌nǎ̤ Khrǐ akhû̌akhî, jûlě̤phî̌yô̤̌ kè̌khî lû̌û ayô̤̌ tôpwa̤ kû̌ tôpwa̤ nî̌꤮.

²² Ma sî, pô̤̌ sî jûlě̤phî̌yô̤̌ Běcǎ ayô̤̌nu, jûlě̤phî̌yô̤̌ sî wṳ̂tokhlǒ ayô̤̌ nî̌꤮.

²³ Ma̤titèhî̌dě, pô̤̌ Khrǐ mî̌ ta̤dòkû a ikǒnu, wṳ̂ mî̌ ma a ikǒ. Ta̤dòkû mî̌ Khrǐ anǎ̤glǒ hǒ. Pwa̤ dǒ a ma̤hǎplǎge a ta̤dòkû numî̌ ahǒ.

²⁴ Pô̤̌nudě, khònò̤̌ pô̤̌ ta̤dòkû jûlě̤phî̌yô̤̌ Khrǐ ayô̤̌nu, sî tôbǎ jûlě̤phî̌yô̤̌ sî wṳ̂ tokhlǒ ayô̤̌ dǒ ta̤lǒ̤꤮ bò akû.

²⁵ Wṳ̂ sî pô̤̌ Khrǐ mô̤ǐ a ta̤dòkû dě a ǐlò̤kè ata̤htûpwa̤ dǒ ta̤dòkû tokhlǒ ayanu, mô̤nṳ̌ lô̌khô sî ma nî̌꤮.

²⁶ Pô̤̌khô a ma̤plò̌shǐ a ta̤dòkû tokhlǒnu, a sikè bǎ asîya, dě a shǔbòkè asî kû̌ shi kû̌mî̌ alě̤ayô̤̌ nuhǒ.

²⁷ Pô̤̌khô a ta̤dòkû gǔ wî̤, gǔ sara, gǔ sîrîdû̌sîrîhtû wô̌ dǒ a lô̤mô̤̌ pěnu, a tṳ̌sikhòsi bǎ asîya. Dě a sǎyṳ dǒ a ta̤dòkû, abǎ wî̌ pe tô̤̌. Bǎ sutǔ pe tô̤̌, bǎ phû̌mò̤̌ ǐ kû̌ ta̤ dǒ ashǔshawa̤ tokhlǒ tô̤̌. Mè̤mè̤̌tôkhô, a sǎyṳ dǒ a bǎ plò̌shǐ dě kòyò bǎ bè̌nṳ̌ ta̤sǔ dǒ alô̤ tô̤̌.

²⁸ Pô̤̌nudě, pô̤̌ wṳ̂ tokhlǒ mô̤ǐlò̤ tûû̌ anǎ̤glǒ nu, asî tôbǎ mô̤ǐ ama pô̤̌nu. Kòyò dǒ a mô̤ǐ amanu a mô̤ǐ tûû̌ anǎ̤hǒ.

²⁹ Kòyò sǎkhě lò̤ǐ tûû̌ anǎ̤ tôpwǎ̤꤮ tô̤̌. Mè̤mè̤̌tôkhônu, kòyò bǔǎbǔô kè̌lò̤ǐ tûû̌ anǎ̤ pṳ̂̌꤮ tôpwa̤. Khrǐ sanǎ̤ bǔǎbǔô kè̌lò̤ǐ anǎ̤glǒ dǒ amè̤̌kû̌ ta̤dòkû nutokhlǒ pô̤̌nuhǒ.

³⁰ Pa mî̌ anǎ̤glǒ ayô̤agî̌ tokhlǒ akhû̌akhî, a kè̌lò̤ǐ pa.

³¹ Lî̤plò̌shǐkû hî̌ kû̌, “Dǒ ta̤we̤ta̤kè hǒo akhû̌akhîdě, pwa̤khû gǔ cû̌ tephekè kû̌ amǒ̤apha dě a cû̌ô̌ kû̌ ama. Dě asî sò̌ginǐ̤ nî̌ a htûhtò̌kè tôpwa̤ nô̤̌.”

³² Yô̤̌sǎ numî̌ adû̌ayô̤̌ dǒ kòyò sî̌yahtû tô̤̌ nuhǒ, bǎbǎkǎlè yô̤̌sǎ numî̌ a sǎyṳ hî̌ Khrǐ kû̌ a ta̤dòkû tokhlǒ pwǎ.

³³ Bǎbǎkǎlè, sî bǎbǎ, sî bǎ mô̤ǐlò̤ tûû̌ sîma pô̤̌ sî mô̤ǐlò̤ tûû̌ sînǎ̤nu pṳ̂̌꤮ tôpwa̤. Htodě ma bǎbǎ, a bǎ bè̌dubè̌nǎ̤ awṳ̂ pṳ̂̌꤮ tôpwa̤.