Ěphěsu 2 - Kawyaw New Testament

Cǒmara ma̤hǎplǎge pa kû̌ abwǐdû̌sîrîhtû

¹ Dǒ awǐkha numî̌, sî ganǎ̤de jûlě̤phî̌yô̤̌ kû̌ kòyò Cǒmara ayô̤̌ tô̤̌, sî ma̤ ta̤sǔ akhû̌akhî, dǒsû̌dǒsò̌ tôkhônu, sî sô̌sô̌kû̌ kòyò si nutokhlǒ hǒ.

² Bǎnuakha, sî gû̌ma̤ hǎkhû̌ a ta̤phû̌mò̤̌shǐhtô tokhlǒ. Sî ganǎ̤de jûlě̤phî̌yô̤̌ gû̌ pwǎ hǎkhû̌tana dǒ a pǒǐ khînǎkhîno dǒ mǒlǎ̤ tokhlǒ ayô̤̌. Hǎkhû̌tananu, a pǒǐ pe kòyò dǒ a ganǎ̤de gû̌ kòyò Cǒmara ayô̤̌ tô̤̌ nutokhlǒ.

³ Dǒ awǐkha numî̌, pa ô̌htûpwa̤ sô̌sô̌kû̌ asî nuhǒ. Pa ô̌htûpwa̤ pô̤̌ pa sǎphlǒ lǎ̤klô sǎyṳ ma̤ta̤sǔ nutokhlǒ pwǎ. Pa lṳ̂ma̤mô̤ panǎ̤ kû̌ panǎ̤glǒ sǔshi lǎ̤klô sǎyṳ phû̌mò̤̌ nutokhlǒ kû̌ ta̤gènè̤ phû̌mò̤̌ tokhlǒ. Cǒmara tô cî̌htò̌ pa pô̤̌ asî nuhǒ.

⁴ Pa sô̌sô̌ pô̤̌nu pwǎ bǎbǎkǎlè, Cǒmara dǒ a lǒbe kû̌ ta̤sǎyṳgwèbǎǐ tôpwa̤nu a mô̤ mè̤̌mî̌ca pa.

⁵ Bǎnukha pa jûǎ ayô̤̌ tô̤̌, pa asô̌sô̌kû̌ kòyòsinu bǎbǎkǎlè a ǐ pa ta̤ô̌htûpwa̤ asa kû̌ Khrǐ hǒ. Cǒmara abwǐdû̌asîrîhtû akhû̌akhîdě, pa nǐ̤bǎ ta̤hǎplǎge hǒ.

⁶ Pa htûhto ta̤tôcǒ꤮ nô̤̌ kû̌ Khrǐ hǒ akhû̌akhî, Cǒmara ma̤htûpwa̤ getîkhî pa kû̌ Khrǐ hǒ. Pa kû̌ Khrǐ htûhtò̌kè lû̌û ta̤tôcǒ nô̤̌ akhû̌akhî, a dǐ pǒǐ pa kû̌ Khrǐ dǒ mǒkhû̌ ashiagǎkû hǒ.

⁷ Cǒmara nî̌ awô̌ jî̌ dǒ pa htû akòyò tokhlǒ akhû̌. Khrǐ ma̤ bǎ hto ta̤ dǒ paya akhû̌akhî, Cǒmara dǔlè̌lṳ̌lò̤ a ta̤ma̤mô̤ma̤wô̌ pa tokhlǒ hǒ. Pô̤̌khô Cǒmara dǔlè̌lṳ̌ bǎ kòyòhǎkhû̌phû̌ dǒ nô̌kòpě tôhtu tokhlǒ kû̌ abwǐdû̌asîrîhtû tokhlǒ pěnu dě, a ma̤ bǎ dǒ paya pô̤̌o pwǎ.

⁸ Ma̤titèhî̌dě, dǒ sî yṳ̌ǎ Khrǐ kû̌ Cǒmara ǐbwǐǐsîrî dǒ sîkhû̌ akhû̌akhî, a ma̤hǎplǎge sî hǒ. Dǒ sî nǎ̤běcǎ jî̌pwǐ̤jî̌le akhû̌khî, dě sî nǐ̤bǎ ta̤hǎplǎge mè̤̌tô̤̌. Hǒomî̌ Cǒmara ǐlò̤kwe pwǎ sî pwǎ.

⁹ Dǒ sî ma̤ ta̤wô̌ nutokhlǒ akhû̌akhîdě, Cǒmara ma̤hǎplǎge sî mè̤̌bǎtô̤̌. Pô̤̌nudě, sî lǎ̤htû̌sò̌ phî̌htò̌lǒ tûû̌ sînǎ̤nu, agûlǎ̤ ô̌ tôcǒ꤮ tô̤̌.

¹⁰ Khònò̤̌dě pa htûhtò̌ pô̤̌o numî̌, Cǒmara ma̤ bǎ pa pwǎ. Dǒ pa htûhtò̌ kû̌ Yeshǔ Khrǐ tôcǒ꤮ nô̤̌ akhû̌akhî, Cǒmara ǐ pa ta̤ô̌htûpwa̤ asa hǒ. Pô̤̌khô pa gǔ ma̤wô̌ta̤ ayanudě, a ǐ pa hǒ. Pa gǔ ma̤ ta̤wô̌ nutokhlǒ ayanu, a tîwî̌tòwò nǎ yî̤̌ pe dǒ paya hǒ.

Dǒ Khrǐ akhû̌akhî Cǒmara ma̤cu tîkhîsô̌ Yǔdaphû̌ tokhlǒ kû̌ Yǔdaphû̌ mè̤̌tô̤̌ tokhlǒ

¹¹ Pô̤̌nudě, sî̌yahtò̌ lô̌khô sînǎ̤ kû̌ dǒ awǐkhanu, sî ô̌phijǎlò̤ dǒ Yǔdaphû̌ mè̤̌tô̤̌ tokhlǒ akla. Dě Yǔdaphû̌ dǒ a kaǎ tûû̌ anǎ̤ kû̌ kòyò dǔdṳ̌phě tokhlǒnumî̌, a dǔ lô̌khô pwǎ nǎ̤glǒ phěyî̌ pwǎ, dě kòyòhǎkhû̌phû̌ dǔ bǎ asî pwǎ. Dě asî nutokhlǒ mî̌ a kaǎ lô̌khô sî kû̌, “Kòyò dǔtṳ̌bě mè̤̌tô̤̌ tokhlǒ,” pô̤̌nu.

¹² Gènè̤ gesô̌ tû̌ lô̌khô sînǎ̤ dǒ awǐkha nutokhlǒ, bǎnukha mî̌ sî sî̌ganǎ̤ bǎ Khrǐ tô̤̌, dě sî ô̌plǒ dǒ Isôrělaphû̌ nutokhlǒ akla khôtô̤̌. Dǒ Cǒmara kû̌ a kòyò tokhlǒ ǎměǎgle lû̌yô̤̌ dě a olò̤ tûû̌ a kòyò tokhlǒ aklanumî̌, sî ô̌plǒ khôtô̤̌tô̤̌. Sî ô̌htûpwa̤ dǒ hǎkhû̌nu, sî ô̌htûpwa̤ shôdô Cǒmara, sî ô̌htûpwa̤ shôdô ta̤kè̌shuǐ lô̌khô pwǎ.

¹³ Dǒ awǐkha numî̌, sî ô̌tepheyî̤ kû̌ Cǒmara bǎbǎkǎlè khònò̤̌ sî kû̌ Yeshǔ Khrǐ htû lû̌û tôcǒ꤮ nô̤̌ dě Khrǐ cǔbò hto sî kû̌ asǐ akhû̌akhî, Cǒmara kaǎge phǔ sî dǒ akòshî̌ hǒ.

¹⁴ Ma̤titèhî̌dě, Khrǐ anǎ̤ Běcǎ tûû̌ numî̌ pwa̤ dǒ a ma̤pè̤̌ma̤dû ta̤ dǒ paplǎkû tôpwa̤. Dǒ awǐkhanu, Yǔdaphû̌ kû̌ Yǔdaphû̌ mè̤̌tô̤̌ tokhlǒ numî̌ a sǎkhěkhû̌khwè lû̌û sô̌sô̌kû̌ dǒdǎ dǒ a ô̌ tě̤tṳ panu hǒ. Khònò̤̌ a ma̤ hǎmǎkè ta̤sǎkhwè̌ lû̌ûnu, dě kòyò ginǐ̤mṳ̌ nî̌ a ma̤htûhtò̌ sô̌ lû̌û tômṳ̌ nô̤̌hǒ.

¹⁵ Yǔdaphû̌ tokhlǒ a ta̤sû̌ta̤tòwò aklanumî̌, a ta̤sû̌ta̤tòwò aphû̌aphò tokhlǒ a ô̌ dû̌wî̤ bǎbǎkǎlè dǒ Khrǐ si akhû̌akhî, a ma̤ gutṳ̌ htokè phlǔbò asî ta̤ nutokhlǒ hǒ. A ta̤yè̤lò̤nǎ mî̌ amè̤̌kû̌, pô̤̌khô kòyònu ginǐ̤mṳ̌ gǔ htûhtò̌ kòyò asa tômṳ̌ dǒ Khrǐ akû dě, a ma̤ tèplè̌ tûû̌ kû̌ anǎ̤ hǒ. Pô̤̌nudě a ma̤pè̤̌ma̤dû getîkhî sô̌ asî hǒ.

¹⁶ A tṳ̌sikhòsi anǎ̤ dǒ nò̌dò̌htǔlô̤ akhû̌akhî, kòyònu ginǐ̤mṳ̌ a ma̤cu getîkhî sô̌lû̌ tômṳ̌ nô̤̌, dě a ma̤klaǐ getîkhî sô̌ asî kû̌ Cǒmara hǒ. Pô̤̌nudě asî tôpwa̤ kû̌ tôpwa̤ sǎkhěkhû̌khwè pe lû̌û tô̤̌.

¹⁷ Pô̤̌nudě Yǔdaphû̌ mè̤̌tô̤̌ dǒ a ô̌phǔ kû̌ Cǒmara tokhlǒ bǎbǎ, Yǔdaphû̌ dǒ a ô̌phǔ kû̌ Cǒmara tokhlǒ bǎbǎ, Khrǐ hèlò̤ shôbǐǐ hto asî kû̌ ta̤pè̤̌ta̤dû a ta̤sǎlě̤we̤kè hǒ.

¹⁸ Dǒ Khrǐ ma̤ bǎ hto dǒ paya dě Yôla Plò̌shǐ Běcǎ tôpwa̤꤮ nô̤̌ ma̤jè̌ bǎ tutṳ̌ pa akhû̌akhî, lǒ̤bò pa Yǔdaphû̌ tokhlǒ bǎbǎ, Yǔdaphû̌ mè̤̌tô̤̌ tokhlǒ bǎbǎ, pa hènṳ̌ dǒ Cǒmara alô̤mô̤̌ hǒ.

¹⁹ Kè̌ ma̤pô̤̌nudě, sî Yǔdaphû̌ mè̤̌tô̤̌ tokhlǒnu, sî htûpe shilǎ̤gǎkhlophû̌ tokhlǒ mè̤petô̤̌ hǒ, tô̤̌mî̌ sî htûpe shǐtèmè̤ tokhlǒ mè̤petô̤̌ hǒ. Khònò̤̌ sî htû sô̌sô̌kè kû̌ Cǒmara a shiphû̌gǎphû̌ sô̌sô̌kû̌ a kòyò nutokhlǒ hǒ. Htokhôtô̤̌ sî mî̌ Cǒmara a hǐphû̌phòphû̌ tokhlǒ hǒ.

²⁰ Sî mî̌ asô̌sô̌kû̌ hǐ dǒ kòyò bô̌ a kòshî̌gutṳ̌ kû̌ lǒ̤ tômè nuhǒ. Pwa̤nophû̌ kû̌ piwi̤pèshè tokhlǒ numî̌ asô̌sô̌kû̌ kòyò bô̌ hǐhtǔ a kòshî̌gutṳ̌ tokhlǒnu hǒ. Dě Běcǎ Yeshǔ Khrǐ anǎ̤běcǎ numî̌ asô̌sô̌kû̌ hǐ tômè gǔměgǔgle ayanu, a mî̌ a htû pwa̤tûhtû̌ mě bǎ kòyò ta̤ dǒ a lǎ̤lṳ̂dû̌lǒ tôpwa̤ hǒ.

²¹ Běcǎ mî̌ pwa̤ dǒ a pṳ̂̌měcî̌mě plǒcubò hǐ ta̤kî̌ta̤krû̌ nutômè dě sǔ sǔ ama̤dû̌htò̌ǐ hǐ nutômè dě dǒnô̌kò gutṳ̌nu, a htûhtò̌ ta̤lṳhtò̌hô plò̌shǐ dǒ Běcǎ lǎ̤ô̌ aya tômè hǒ.

²² Dǒ sî kû̌ Khrǐ htûhtò̌ lû̌û ta̤tôcǒ꤮ nô̤̌ akhû̌akhî, Khrǐ bè̌plǒ sî kû̌ Yǔda Khrǐphû̌ tokhlǒ hǒ. Htodě dǒ Yôla Plò̌shǐ Běcǎ a ta̤pô̤ta̤phǎ akhû̌akhî, sî dǒ a htû Yǔdaphû̌ mè̤̌tô̤̌ tokhlǒnu, kòyò bô̌htò̌ sî kû̌ Yǔdaphû̌ dǒ Cǒmara ahǐkû nuhǒ.