Titus 3 - Etestemente Epe ✠ 1951

ONTOPORUA 3. “Ehuvico rjomusita gueemuenjo”

¹ Ja kumagida okuvurika komarenga no kaapangeri nokuguanica eehapu dauo nokukara kiironga iihanaua ajishe.

² Kaa tuke nand’ogumue. Kaa humane aaue, oja kare nombiri nengungumano enene kaantu ajeshe.

³ Oshoka nasse uo otua ri nare aarai, katua ri nehiteero, tua puka, aapija jomaharu giiri no giiri, tua ri neemkaro donjanja no dokasheshe, ng’aantu ja ri je nokutondua, nde tua tondacana uo.

⁴ Ndere ondjeerera nohore ha Karunga omukuriri guetu hokuora aantu ajeshe, sho ha oroka,

⁵ he okue tu upica, ha moru’iironga juujuki tua ronga, tshivarerue, okesiroshenda rje, kekosho rjevarururo no ketshitururo rj’Ombepo Ondjapuki,

⁶ ndji a tirira mu sse ohindji mu Jesus Kristus omukuriri guetu.

⁷ Otsho tu ucirue aajuki koshenda he, tu ninge aacigururi jomuenjo guarushe, ngu tua tega.

⁸ Mohapu ndjika omu notshiri, ngaje nda ara u hi okorore neenkondo, opo ajeshe mba j’iteera Karunga ja kembadare kuronga iironga iihanaua. Iinima mbika aji oparere aantu, mu jo mu noruporo.

⁹ Jepa omapuro guurai, omajaruro gomaruvaro, eendjuma nomarudi gokupopja ompango. Meehapu doka kamu nekuaco noruporo.

¹⁰ Omuntu ngu a puka mehiteero, mu eca ciru nge ue mu kumagida rumue nenge ruaari.

¹¹ Ou tshi naua omuntu a tja ngaaka a pirarara, ot’ipangura he muene moru’uurunde ue.

¹² Nge nda tumu Artemas nenge Tishikus kungueje, ou enderera kuja kungaje ku Nikopolis, oshoka oko nda ara okumenekera okufu.

¹³ Tsenas omunongompango na Apollo ou ja rongekidira naua ondjira hauo, kaa kare neempumbue.

¹⁴ Ndere oojakuetu naa higirire uo okuronga iironga iihanaua, nge ja pumbiua, opo ja monikue nga mboka je niihimati.

¹⁵ Ajeshe mba je ri pungaje taje ku kundire po. Ou kunda ajeshe mba je tu ore mehiteero. Oshenda ha Karunga nahi kare na ne amushe Amen.