Mateus 9 - Etestemente Epe ✠ 1951

ONTOPORUA 9. Jesus notshirema

¹ H’okua rondo mosikepa, nde ta taaguruka haandijaka nokue ja momukunda gue.

² Nde tara, aantu oje eta ku he otshirema tsha rara kokariri. Nde Jesus, sho a mono ehiteero rjauo, okua rombuere otshirema: Ikorerera, mumuandje, eendjo dohe ode ku diminua po.

³ Jamue jaanongo jomambo oji ipopire: Nguka ota tsheke Karunga.

⁴ Jesus oku uete omadiradiro gauo, nde ta ti: Otshike tamu diradira uuhineji meemutima deni?

⁵ Otshipu otshiini, okutja: eendjo dohe oto di diminua po nenge okutja: cikama u ende?

⁶ Ndere opo mu tshiue, nokutja Omuna guOmuntu oku neenkondo pevi ndika okudima po eendjo, he ota rombuere nduno otshirema: Cikama, kuca okariri kohe, ngueje u he kaandjohe.

⁷ H’ota cikama, nde ta hi kegumbo rje.

⁸ Aantu ajeshe oja tara shii, ja tiririra, taa simaneke Karunga, ngu a p’omuntu eenkondo da tja ngii.

Jesus na Mateus.

⁹ Pokuha Jesus okua mono omuntu a kaatumba petsari rjefendero, edina rje Mateus. H’ota ti ku he: Randura ndje! H’okua cikama, te mu randura.

¹⁰ Opua ningi, sho a kaatumba megumbo rje potshiriro, tara, aafenderi naarunde ojendji oje ja ja konge uo iipundi potshiriro puamue na Jesus naarongua je.

¹¹ Aafariseji, sho je tshi mono, oja pura aarongua je: Otshike nduno omuhongi gueni ta rire puamue naafenderi naarunde?

¹² Jesus h’okue tshu uvu ngaa, nde ta ti: Ha mba ja kora, ojo ja pumbua omupangi, aaue, oombo tuu aavu.

¹³ Indeni ano mu ihonge shi tsha tja: Esiroshenda nda ara, ha magano, oshoka inandi ja okuicana mba ju uka, aaue, aarunde tuu.

Okuidirika iikurja

¹⁴ Nena aarongua ja Johannes oje ja ku he, jo otaa pura: Otshike nduno sse tatu idirike iikurja, norundji uo aafariseji, ndere aarongua johe aaue?

¹⁵ Jesus te ja jamukura: Nani ookume komujareki otaa ka s’uupongo, manka omujareki e ri pu jo? Ndere omasiku tage ja, omujareki te ja kucua, nopo taa ki idirika.

¹⁶ Kakuna ngu ta aandeke onguuo onkuru notshaando tsherapi epe, oshoka otshaando otshipe otatshi togonjoka ko konguuo ndjija, ho ombururu tahi ningi onene hi vure po.

¹⁷ Nenge kakuna muntu ta zire omavinju omape m’ eempunda eenkuru, oshoka nge te tshi ningi, ando eempunda otadi tsipuka, nde omavinju taga tik’ouara, neempunda tadi togonjoka. Ndere ta tir’omavinju omape meempunda eempe, tsh’otsho ajishe iijaari taji kara.

Aakiintu jaari taa kuacua

¹⁸ Manka ta popi dika na jo, omukuruntu e ja po, ti isizimike, nde ta ti: Muene, omumuandje omukadona opo a si, ndere ira u ke mu tenteke eke rjohe, he a ka mone omuenjo.

¹⁹ Jesus h’ota cikama, nde te mu randura puamue naarongua je.

²⁰ Nde tara, omukiintu, ngu a ninga eemuvo omurongo neemuvo mbaari ta arukua etiko rjombinzi, okue ja ku he konima he, ta njenge omutse guonguuo he.

²¹ Oshoka okua ti ipopire: Ng’onda njenga ouara konguuo he, otii ka kuacerua.

²² Jesus h’ota punguruka, te mu mono, nde ta ti: Ikorerera, mumuandje, ehiteero rjohe orje ku kuacera! Petango ndika omukiintu okue eruka.

²³ Jesus sho e ja megumbo rjomukuruntu, nde ta mono aashiki jeembendo naantu taa jogerere, h’ota ti:

²⁴ Zii mo, oshoka omukadona ina sa, aaue okua koc’ike. Ndere taa mu jor’ike.

²⁵ Aantu oja tidua mo. He ta hi mo, nde te mu kuata peke, h’omukadona ta penduka.

²⁶ Omurombo nguka ogua hi motshirongo shija atshishe.

Aaposi na nakusit’eui taa kuacua

²⁷ Jesus sho a zi po mpano, aaposi jaari oje mu randura, jo taa higida, taa ti: Tu siroshenda, Mumua David!

²⁸ Sho a ciki pegumbo, aaposi taa hengene ko, nde Jesus ta ti ku jo: Omui iteera nani, kutja ngaje otii tshi mu pondorere? Oja ti: Eno, Muene!

²⁹ He ta njenge nduno omesho gauo, nde ta ti: Ningueni ano ngashi mui iteera.

³⁰ Go omesho gauo oga pashuka. Nde Jesus te ja kumagida nokuri: Tareni nduno, aantu kaa huve tsha.

³¹ Ndere taa hi, jo taa mu okorora motshirongo shija atshishe.

³² Mbeja sho ja zi po, aantu oje eta ku he omuntu a sit’eui, he a kuatua kombepo ombuineji.

³³ Ombepo ombuineji sho ha tidua mo, omuntu ngu a ri a sit’eui, okua popi nduno, jo aantu oja kumua ko, taa ti: Shino inatshi monika nandoodiro mu Israel.

³⁴ Ndere aafariseji taa ti: Meenkondo domukuruntu gueembepo eembuineji he ota tida mo eembepo eembuineji.

³⁵ Nde Jesus te endahenda meemukunda adishe no m’ iihende nokuronga meesinagoga dauo nokuuvica evangelium rjotshirongo nokupanga uuvu aushe niigombo ji iri.

³⁶ Sho a mono eengundu daantu, okue ja siroshenda, oshoka oja ri je epa, jo ja ri ngashi eenzi kadi nomusita.

³⁷ He ta rombuere aarongua je: Etejo enene, ndere aarongi aatshona.

³⁸ Indireni ano Muene guetejo a tume aarongi mepja rje.