Mateus 7 - Etestemente Epe ✠ 1951ONTOPORUA 7. Omakumagido gi iri na gi iri 1 Inamu pangura, kamu pangurue. 2 Oshoka epanguro ndi tamu pangura na rjo, na ne orjo tamu ka pangurua na rjo. Notsheereko shi tamu ereke na tsho, otsho tamu ke erekerua na tsho. 3 Otshike u uete okashuandu mesho rjomumuanjoko, ndere otshiti shi tshi ri mesho rjohe, ku tshi uete? 4 Oto rombuere ngiini omumuanjoko: andi ja ndi ku kuce okashuandu mesho rjohe, nani ngueje ou na otshiti mesho rjohe? 5 Mukengereri nguee, kuca mo tango otshiti mesho rjohe, u je u tshiue okukuca mo okashuandu mesho rjomumuanjoko. 6 Otshijapuki inamu tshi p’eembua, neempore deni inamu du umbira iinguru, kaji di ratagure nomakondo gajo, jo kaji tshune monima ji mu foragure uo. 7 Indireni, nd’otamu peua, kongeni, nd’otamu mono, konkoreni, nd’otamu egururirua po. 8 Oshoka okeshe ngu ti indire, ota peua, ngu ta kongo, ota mono, na ngu ta konkora, ote egururirua po. 9 Nenge ope na gumue mokati keni, ta p’omona onkuuege, nge te mu indire oshima? 10 Nenge nge te mu indire oshi, ote mu pe ando ejoka? 11 Ano ng’omu tshi okupa ojana omagano omaanaua, nando one aauineji, unene po Sho, ngu e ri meguru, ota p’uuanaua mba taa mu indire. 12 Ano shi mua ara aantu je tshi mu ningire, tshi ja ningireni uo. Otsho otshipango, naaprofeti shoka. 13 Piteni motsheero tsha cinana, oshoka otsheero otshinene nondjira oha taanana, ndji ha cinda kokuekeruashi, ndere mba taa piti mo, ojo ojendji. 14 Otsheero otsha cinana tshi cike peni, nondjira oho ontshona hi cike peni, ndji hu uka komuenjo, jo mbo taa hi mo, ojo aatshona. 15 Angareni aaprofeti, mba ja pirama, mba taa ja ku ne meenguuo diipa jeenzi, nde nani meni omambungu haga foragura. 16 Otamu ja dimburura kiihimati jauo. Eembu ohadi rikorua ando komano nenge eenkuju okiijoshorua? 17 Ano keshe tuu omuti omuanaua ohagu imi iihimati iihanaua, ndere omuti omuineji ohagu im’ike iihimati iihineji. 18 Omuti omuanaua kagu tshiua okuima iihimati iihineji, nomuti omuineji kagu tshiua okuima iihanaua. 19 Keshe tuu omuti, itagu imi iihimati iihanaua, otagu keua po, nde tagu umbirua momuriro. 20 Ano otamu ja dimburura kiihimati jauo. 21 Ha keshe ngu ta ti ndje: Muene, Muene, ohe ta hi motshirongo tsheguru, aaue, ongu ike ta rongo eharo rja Tate, ngu e ri meguru, ohe ta hi motshirongo tsheguru. 22 Mesiku ndija ojendji taa ka rombuera ndje: Muene, Muene, inatu shunganeka nani medina rjohe, inatu tida mo eendemoni medina rjohe, ss’inatu ronga iirongankondo ojindji medina rjohe? 23 Nena otii ke mu rombuera: Kanda ri ndi mu tshi, tshivarerue, zii po pu ngaje, jakorokoshi ne! 24 Ano okeshe ngu tu uvu eehapu dandje di, nde te di rongo, okua f’omurumentu omunandunge, ngu a tunga ondjugo he kombanda hemanja. 25 Nde taku roko ovura onene, jo iikunguru jomeja taji ja, eembepo tadi pepe, do tadi pumu ondjugo ndjoka, nde inahi gua nandoodiro, oshoka oha ri ha tungua kombanda hemanja. 26 Ndere keshe ngaa ngu tu uvu eehapu dandje di, he ite di rongo, okua f’omurumentu egoua, ngu a tunga ondjugo he ouara mevundua. 27 Nde taku roko ovura onene, jo iikunguru jomeja taji ja, eembepo tadi pepe, do tadi pumu ondjugo ndjo, ho otahi gu po, nd’okugua kuaho okua ri okudigu. 28 Jesus sho a shurica eehapu dika, aantu oja ri ja rurirua komarongo ge. 29 Oshoka okua ri ta rongo onga ngu omunankondo, ina fa aanongo jomambo naafariseji. |
Omission Heklesia Ekatolika, 1951. Namibian Catholic Bishops Conference.