Mateus 6 - Etestemente Epe ✠ 1951

ONTOPORUA 6. Ongiini piironga iiuanaua?

¹ Diginineni, kamu kembadare iironga iiuanaua jeni miipaci jaantu, mu tarikue ku jo; nge tamu tshi ningi, kamu nondjambi pu Sho, ngu e ri meguru.

² Ng’oto gandja egano, ino tshi popja tango ngashi aakengeri, haa tshi ningi meesinagoga no meendjira, opo ja ambererue kaantu. Tshiri, andi mu rombuere, oje nondjambi hauo nare.

³ Ndere ng’oto gandja omagano, eke rjohe rjo kumosho inari tshiua, rjo kurjo shi ari ningi.

⁴ Opo omagano gohe ga kare mofuci, nde Sho, ngu e uete mehoramo, one ku futu.

⁵ Nge tamu garikana, inamu kara mua f’ooneruado, mba je ore okugarikana ja cikama meesinagoga no piikororo jeendjira, ja tarikue kaantu. Tshiri, andi mu rombuere, oje nondjambi hauo nare.

⁶ Ngueje ano, nge to garikana, inda mondunda hohe, edira otsheero, nde to garikana ku Sho, nguee ku uetikue, nde Sho, ngu e uete mehoramo, one ku futu.

⁷ Manka tamu garikana, inamu popjagana mua f’aapagani; jo je tshi, otaj’iteerua, nge taa popi eehapu odindji.

⁸ Ano inamu facana na jo, oshoka oSho oku tshi nare shi mua pumbua, manka inamu mu indira.

⁹ Ano garikaneni ngii: Tate hetu, ngu u ri meguru, edina rjohe nari japurue.

¹⁰ Uukuaniirua uohe nau je ku sse, eharo rjohe nari guanicue kombanda hevi ngashika meguru.

¹¹ Tu pa nena okurja kuetu komasiku ageshe.

¹² Tu dimina po eendjo detu ngashi sse uo hatu dimine po aanandjo na sse.

¹³ Ino tu fara memakero, ndere tu upica muuineji. Amen.

¹⁴ Oshoka nge mua dimina po aantu eendjo dauo, Sho heni meguru ote ke mu dimina po uo eendjo deni.

¹⁵ Ndere ng’inamu dimina po aantu, na Sho heni ite mu dimine po uo eendjo deni.

¹⁶ Nge tamu ikerere iikurja, inamu tara ng’ooneruado nomesho ga fa ga rura, oshoka jo otaa pirike iipara jauo, aantu ja tje, nokutja oji ikerera iikurja; tshiri, andi mu rombuere: oje nondjambi hauo nare.

¹⁷ Ngueje ano, ng’otu ikerere iikurja, guajeka omutse guohe, ngueje u koshe uo otshipara tshohe,

¹⁸ Aantu kaa dimburure okuikerera kohe, aaue, Sho oh’ike na kare e tshi tshi tuu, ngu e uete mehoramo, nde Sho, ngu e uete mehoramo, one ku futu.

¹⁹ Inamu igongera omariko go muujuni, nga taga tukua kiikogo no keentuko, na nga taga jakua po keembudi.

²⁰ Ndere ingongereni omariko go meguru, mu itaga tukirua kiikogo no keentuko, na mu itamu hi uo eembudi, di ga jake mo.

²¹ Oshoka hu ku na eriko rjohe, omutima guohe oko gu ri uo.

²² Uujerere uorutu ruohe ouo esho rjohe; esho rjohe nge ano inari jonua mo, nena orutu ruohe arushe oru nuujerere.

²³ Ndere esho rjohe nge rja jonua mo, orutu ruohe arushe oru neemurema. Ano uujerere, mbu u ri mu nguee, nge ua tshituka eemurema, nena eemurema dojene otadi ka kara di cike peni!

Ndere iimpuju juujuni!

²⁴ Kapen’omuntu ta vuru okukarera oojene jaari, oshoka ota kara a tonde po gumue, he e hore mukuauo; nenge ota kara i igameke ku gumue po, he ta dini mukuauo. Itamu vuru okukarera Karunga nomariko.

²⁵ Otsho ano andi mu rombuere: Inamu kara mua mbandara keemuenjo deni, nokutja otamu ri tshike nenge komarutu geni nokutja amu zara tshike? Omuenjo nani kagu vure eendia norutu nani karu vure eenguuo?

²⁶ Tareni eedira do meguru! Kadi kuna, kadi teja, kadi pungura momashisha, ndere Sho meguru ote di paruca. Ne nani kamu di vure unene?

²⁷ Ore mokati keni ta vuru okuguedera ko, nando a kembadara, korutu rue a ninge omure?

²⁸ Otshike tamu kara mua mbandarera okuzara kueni? Tareni omanjanganjanga go mepja, shi taga mene! Kaga ronga, kaga tunga,

²⁹ Ndere ngaje andi mu rombuere: Na Salomon muene muurenga ue ka ri a zarekua ngashi rimue rjago.

³⁰ Na ngashiingino Karunga, ng’okua zareka omuidi guo meputa guo opara, ngu gu ri po nena, nde ngura otagu ekerua meziko: nani ne itamu zarekua nduno unene mu gu vure, janenguni mehiteero ne?

³¹ Inamu mbandara, ne mu tje: otatu ri tshike, ss’atu zara tshike?

³² Oshoka aapagani ajishe mbika ojo ngaa taa purapura. Sho oku tshi nokutja shika omue tshi pumbua.

³³ Kongeni ano tango otshirongo tsha Karunga nokuuka kue, jo ajishe mbika onamu ji guederua ko ouara.

³⁴ Ano inamu mbandarera esiku rja ngura, oshoka esiku rja ngura ori inena tsharjo. Keshe tuu esiku ori inena otshimpuju, tsharjo.