Mateus 4 - Etestemente Epe ✠ 1951

ONTOPORUA 4. Jesus ta makerua

¹ Jesus okue etua kOmbepo mombuga a ka makerue ku satana.

² Sho a ningi omasiku eemurongo iine i ikerera iikurja, h’ota s’ondjara.

³ Po opue ja pu he omumakeri, ta ti: Nguee, ng’Omumua Karunga, rombuera ano eenkuuege dika di ninge oshima.

⁴ Ndere he ta jamukura, ta ti: Opua tshangua: omuntu ku upicu’ike kokurja, aaue, ok’ohapu ahishe tahi zi mokana kua Karunga.

⁵ Satana te ja te mu fara momukunda omujapuki, he te mu tura kombanda hontempeli.

⁶ Nde ta ti ku he: Ngueje ano, ng’Omumua Karunga, ihumbira nduno poshi, oshoka opua tshangua: Karunga okue ku rombuerere aajengeli, jo taa ku umbata momooko, ku ipume nandoodiro keempadi dohe kemanja.

⁷ Jesus h’ota ti: Opua tshangua uo: ino makera Muene Karunga kohe.

⁸ Satana te mu kuca itshee, te mu fara mondundu ondeendeka, nde te mu urukire eembara adishe do muujuni aushe nuurenga uado.

⁹ Ta ti: Ajishe mbi otii ku pe, ng’oua ts’eengoro, nde to injongamene ndje.

¹⁰ Jesus ta ti ku he: Za po, satana, oshoka opua tshangua, aku ti: Injongamena ku Karunga kohe, h’ohike to karere.

¹¹ Ngashiingika satana okue mu cigi po, nde tara, aajengeli oje ja je mu karere.

Aarongua jotango.

¹² Jesus sho a huvu, Johannes a kuatua, okua tshuna ko Galilea.

¹³ He ta zi mo mu Nazaret, nde ta kara mu Kafarnaum, omukunda gu ri pefuta, keengamba da Zabulon na Neftalin.

¹⁴ Opo tshi guanicue, shi tsha popiua komuprofeti Isaias, ta ti:

¹⁵ Otshirongo Zabulon notshirongo Neftalin, ojo ondjira pefuta haandijaka ha Jordan, oGalilea gaapagani.

¹⁶ Ojo aantu mba je ri meemurema, nde taa mono uujerere uunene; na mba mokati keemudire dokusa, uujerere tau ja jerere.

¹⁷ Okuza kesiku ndija Jesus a shimbike okuuvica, ta ti: Idirurureni, oshoka otshirongo tsheguru otshe ja popepi.

¹⁸ Ano Jesus, sho a hende komukunkuro guefuta rja Galilea, okua mono aamuahina jaari, Simon, ngu a rukua uo Petrus, na Andreas, omumuahina, taa humbire iijurico jauo mefuta, oshoka oja ri aajuri.

¹⁹ He ta ti ku jo: Randurii ndje, ngaje ndi mu ninge aajuri jaantu.

²⁰ Opo mpa oja cigi po iijurico, jo je mu randura.

²¹ Okuza mpoka, sho a hi komesho, okua mono ko aamuahina jaari ji iri, Jakobus, omumua Zebedeus, na Johannes omumuahina, taa haandeke iijurico jauo mosikepa puamue na she Zebedeus; h’ote ji icana.

²² Naanzija oja cigi po iijurico, nde taa mu randura.

²³ Jesus h’ote endahenda apeshe mu Galilea nokuronga aantu meesinagoga dauo, tu uvica evangelium rjotshirongo tshe, he ta panga uuvu aushe niigombo ajishe mokati kaantu.

²⁴ Omurombo, ngu gue mu popirua, gu uvika apeshe mu Siria, jo je eta ku he ajeshe, mba je nuuhehame nuuvu u iri niigombo neendemoni noruidi niirema, he te ja panga.

²⁵ Naantu ojendjijendji oje mu randura, jo mu Galilea no jo mu Dekapolis no jo mu Jerusalem no jo mu Judea na mbo nduno ja haandijaka ha Jordan.