Mateus 3 - Etestemente Epe ✠ 1951

ONTOPORUA 3. Ehuvico netshatsho rja Johannes

¹ Momasiku ngeja Johannes omutshatshi okue ja tu uvica mombuga ha Judea.

² Nde ta ti: Idirurureni, oshoka otshirongo tsheguru otshe ja popepi.

³ Ohe ngu a shunganekerue komuprofeti Isaias, ta ti: Eui rjomuhigidi mombuga, pareni ondjira ha Muene, ukiririceni omapora ge.

⁴ Ndere Johannes muene okua zarere onguuo ha tungua nomafufu geengamero nepaja rjiipa motshija; eendia de oda ri eembashu nomagadi geenjutshi.

⁵ Jo mu Jerusalem oje ja ku he no jo mu Judea no jiihende ja Jordan.

⁶ Je epurura eendjo dauo, jo ja tshatshua ku he.

⁷ Ndere sho a mono, aafariseji ojendji naasaduseji oje ja ku he ja ka tshatshue, okua ti ku jo: Jana jomafu ne, ore e mu ronga okuijageka ondjashi ndji tahi ke ja?

⁸ Eteni ano iihimati jo oparera ehigaruro.

⁹ Kamu noruporo mu ipopire: Otu na Abraham otate? Ngaje andi mu rombuere: Karunga ota vuru okupendurira Abraham ojana meenkuuege dika.

¹⁰ Ekuua orja turua nare kiitako jeemuti. Keshe tuu omuti, ngu itagu imi iihimati iitoue, otagu keua po, nde tagu umbirua momuriro.

¹¹ Tshiri, ngaje otandi mu tshatsh’ike nomeja kehigaruro, ndere ngu te ja konima handje, oku neenkondo e vure ndje, ngaje inandi opara ndi zare eengaku de, ngu ote ke mu tshatsha nOmbepo Ondjapuki nomuriro.

¹² Oku noruuouoro meke rje, he ta jereke otshipare tshe; iirja je te ji pungura momashisha, ndere ota ka fika etutu momuriro kagu dima.

¹³ Esiku ndija Jesus a zi ku Galilea, e ja ku Jordan ku Johannes a ka tshatshue ku he.

¹⁴ Ndere Johannes okua tinda, he ta ti: Ongaje ndi nokutshatshua ku nguee, ndere ongueje itshee to ja ku ngaje ngiini?

¹⁵ Jesus ta jamukura: Iteera tshi ningue ngaa, oshoka otshe tu oparera tu guanice atshishe shi tshu uka. Opo nduno e mu iteera.

¹⁶ Ano Jesus sho a tshatshua, h’okua zi mo momeja, nde tara, eguru rjo orje mu ihegururira nokuri, nde ta mono Ombepo ha Karunga tahi mu tenene, ho tahi nambere ha f’onguti.

¹⁷ Nde tara, eui rja zi keguru, tari ti: Nguka omumuandje omuorike, ngu ndi nohokue mu he.