Mateus 28 - Etestemente Epe ✠ 1951

ONTOPORUA 28. Jesus ta jumuka

¹ Esiku rjesabata sho rja piti, eruua rjesiku rjotango rjotshiuike tari tende, Maria Magdalena na Maria omukuauo jo otaj’idenge ondjira, ja ka tare ombira.

² Nde tara, opua ningi ekekamo edigu rjevi, oshoka omujengeli gua Muene a zi keguru, te ja poshi, te engene po, ta kandura po emanja, nde ta kaatumba ko.

³ Okua ri e uetikue a f’oruadi, onguuo he ha toka ha f’omeegere.

⁴ Aarangeri oje mu tira, taa kekama, nde taa s’onkunkumucika.

⁵ Nde omujengeli ta popica aakiintu, ta ti: Inamu tira, ondi tshi tshi, otamu kongo Jesus, omuarerua komutshigakano.

⁶ Ke mo mu, okua jumuka, ireni, mu tare, Muene mpa a ri a rangekua.

⁷ Indeni nzija, nde tamu ka rombuera aarongua je, nokutja okua jumuka. Ote mu tetekerere ta hi ku Galilea, oko tamu ke mu mona, tareni, ongaje nde tshi mu rombuere sho.

⁸ Jo taa zi po nzija pombira nokutira, jo ja njanjukua uo, taa henderere je ke tshi rombuere aarongua je.

⁹ Nde tara, Jesus okue ja tsakaneke, nde ta ti: Mua penduka? Jo otaa hengene ko, taa huukata eempadi de, nde taa mu injongamene.

¹⁰ He Jesus ta ti ku jo: Inamu tira, indeni, ka rombuereni aamuameme, naa ka he ku Galilea, oko taa ka mona ndje.

¹¹ Sho ja hi, tara, aarangeri jo je ja momukunda, nde taa hepururire aapristeri aakuruntu ajishe mbi ja ningua.

¹² Oji icanica otshingongi naakuruntukuruntu, taa kundacana, taa pe aakuiita iimariua ojindji.

¹³ Nde taa ja rombuere, omu tja: Aarongua je oji ire uusiku, nde taa mu jaka mo, manka tua koca.

¹⁴ Omureri guotshirongo, nge e ke tshu uva, otatu ke mu anda, sse tu mu gamene.

¹⁵ Mbejaka taa tuumba iimariua, nde taa ningi ngashi ja rombuerua. Nd’omurombo ngu ogue endahenda mokati kaajuda sigo onena.

Jesus ta rareke aapostoli

¹⁶ Aarongua omurongo na gumue oja hi ano ku Galilea kondundu, ngashi Jesus e ja rombuerere.

¹⁷ Sho je mu mono, oje mu injongamene, ndere jamue oja rimbirirua.

¹⁸ Jesus te engene ko, nde te ja popica, ta ti: Ngaje ondi nompago ahishe meguru no kombanda hevi.

¹⁹ Indeni ano, ka rongeni omarudi ageshe, ne mu ga tshatshe medina rja She no rjOmona no rjOmbepo Ondjapuki.

²⁰ Ne ja rongeni okudiginina ajishe, mbi nde mu rombuera. Nde tareni, ngaje ondi ri pu ne omasiku ageshe sigo eshuriro rjuujuni.