Mateus 27 - Etestemente Epe ✠ 1951

ONTOPORUA 27. Okusa kua Judas

¹ Ongura sho kua tshi, aapristeri aakuruntu naakuruntukuruntu jotshirongo oja ningi otshingongi, ju uvacane Jesus je mu gandje a se.

² Jo otaa mu eta mo, a mangua, nde taa mu gandjere Pontius Pilatus, omureri guotshirongo.

³ Nde Judas omuoorori, sho a mono, Jesus a tokorua, h’oti ip’ombedi, ta tshuna ko iishilinge eemurongo ndatu kaapristeri aakuruntu no kaakuruntukuruntu.

⁴ Nde ta ti: Nda jona, oshoka ondo orora ombinzi kahi na’ndjo. Jo otaa ti: Sse itatu purua ku ho, ongueje u tshi muene.

⁵ H’ote ekere iishilinge montempeli, ta hi kondje, ta ki iponda nepando.

⁶ Aapristeri aakuruntu oja kuca po iishilinge, taa ti: Itatshi pondoka, ji turue miimariua jontempeli, oshoka iikurira jombinzi.

⁷ Ano oja kundacana, nde taa randa na jo epja rjomuhongi gueembiga, ri ninge omeendo gokufumbika aahendanandjira.

⁸ Otsho ano epja ndi rja rukirue sigo onena Hakaldama, okutja epja rjombinzi.

⁹ Ohapu oha guanicua, ndji ha popiua komuprofeti Jeremias, ngu ta ti: Oja kuca iishilinge eemurongo ndatu, ojo ofuto homuntu, ngu a herekua, je mu erekere mojana ja Israel.

¹⁰ Jo otaa ji gandja, ja rande epja rjomuhongi gueembiga, ngashi Muene a rombuera ndje.

Jesus pu Pilatus

¹¹ He Jesus ta cikama miipaci jomureri guotshirongo. Omureri guotshirongo he te mu pura: Ongueje omukuaniirua guaajuda? Jesus ta jamukura, ta ti: Ongashi to ti.

¹² Ndere sho a tamanekua kaapristeri aakuruntu no kaakuruntukuruntu, he ina jamukura nande.

¹³ Nde Pilatus te mu pura: Nguee ku uvite ko nani, sho taa hokorora iinima iinene na nguee?

¹⁴ Ndere ita jamukura nande ohapu, h’omureri ta fe ta kumua ko unene nokuri.

¹⁵ Opua ri omukaro gu neue komureri guotshirongo, potshituci otshinene ha diturire mo aantu gumue meemango, ngu ja ara mo.

¹⁶ Esiku ndiono okua ri mo na gumue meemango, omupjaganeki a simana, edina rje Barabas.

¹⁷ Aantu sho ja gongara, Pilatus h’okue ja pura: Nandi mu mangururire mo guni po, omua ara Barabas nenge oJesus, ngu a rukua Kristus?

¹⁸ Oshoka okuaj’e tshi naua, nokutja aajuda oje mu gandja morua shi je nondumbo na he.

¹⁹ Manka a kaatumba motshipanguriro, omukiintu gue a tumu ku he, ta ti: Omuntu ngo oku uka, ino mu ninga tsha, oshoka nena mondjodi onde mu ehamena unene.

²⁰ Ndere aapristeri aakuruntu naakuruntukuruntu jo otaa popi naantu, ja tje: otua ara Barabas, nde Jesus na dipague.

²¹ H’omureri guotshirongo ta pura ano, ta ti ku jo: Oguni po pu mbano jaari mua ara nduno, ndi mu mu mangururire mo? Jo otaa higida: oBarabas.

²² Nde Pilatus ti i mo: Nduno Jesus, ngu ha tiua Kristus, otii mu ninge ngiini?

²³ Ajeshe jo otaa higida: Na ka arerue komutshigakano! Omureri guotshirongo ta ti ku jo: Okua ninga tshike otshiineji? Jo otaa higida pombanda unene: Na ka arerue komutshigakano!

²⁴ Pilatus sho a mono, nokutja ita pondora po tsha, edunguuko ike tari ningi enene, h’ota kuca omeja, ta kosho eenjara de miipaci jaantu, ta ti: Ngaje kandi notshikoro mombinzi homuntu ngu a huka ngu. Tareni po ne ojene.

²⁵ Aantu ajeshe jo otaa jamukura: Ombinzi he nahi tikire sse naana jetu.

²⁶ Mpa h’ote eca Barabas a mangururue mo, nde Jesus te mu dengica neengora, te mu gandja a arerue komutshigakano.

²⁷ Aakuiita jomureri guotshirongo oje eta Jesus mondjugo hokupangurira, nde taa gongere po aantu ojendji.

²⁸ Omo je mu shurire eenguuo, nde taa mu zareke onguuo onde ontirigane.

²⁹ Taa ningi po otshingongo tshomakegua, taa tshi cindire komutse gue, jo taa mu pe onenge meke rje rjokurjo. Jo otaa ningi nduno haa mu tsire eengoro, nde taa mu tsheke, taa ti: Kundua, mukuaniirua guaajuda!

³⁰ Jo otaa mu sijire omate, jo taa mu denge nonenge komutse.

³¹ Sho ja dimbuka okumutsheka, oje mu shura onguuo ontirigane, taa mu zareke nonguuo he muene, nde taa mu kuca momukunda, je ke mu arere komutshigakano.

Jesus ta arerua

³² Sho ja zi mo, taa mono omurumentu omukireni, edina rje Simon, nde taa mu ciminike a humbate omutshigakano.

³³ Nde taa ja keshara, rja rukua Golgata, atshi ti: Opo tsheenkue deemutse.

³⁴ Jo otaa mu pe omavinju, ga vundakanicua nonjango a nue. Ndere sho a makere mo, ina ara ue nokuri.

³⁵ Sho je mu arere komutshigakano, jo otaa hitoporere eenguuo de nokudiogororica, opo tshi guanicue, shi tsha popiua komuprofeti, a tja: Oji itoporera eenguuo dandje, jo taa hogororica onguuo onde handje.

³⁶ Nde taa kaatumba, jo taa mu rangere.

³⁷ Kombanda homutse gue jo otaa pangere ko otshireji, mu mua tshangua otshikoro tshe: Nguno oJesus omukuaniirua guaajuda.

³⁸ Aakorokoshi jaari oja arerua puamue na he, gumue kokurjo, mukuauo kokumosho.

³⁹ Nde mba taa hende po, taa mu tsheke, jo taa puku keemutse dauo.

⁴⁰ Nde taa ti: Hee, nguee, ngu to kumuna po ontempeli ha Karunga, u hi tungurure po momasiku gatatu, ikuaca muene, nguee ng’Omumua Karunga, za ko nduno komutshigakano.

⁴¹ Otsho uo ngaa aapristeri aakuruntu naanongo jomambo naakuruntukuruntu je mu tsheke, taa ti:

⁴² Okua kuacerere jakuauo, nde nena ita vuru okuikuaca muene. He ng’omukuaniirua guaajuda, na ze ko nduno komutshigakano, sse tu mu iteere.

⁴³ Okui inekere mu Karunga, ngashiingika ne mu upice nduno, ng’okue mu okua, oshoka okua tire: Ongaje Omumua Karunga.

⁴⁴ Tsh’otsho aakorokoshi je mu njanene ng’itshee, mba ja arerue puamue na he.

⁴⁵ Pouiri ontikanekamue kua ningi eemurema muujuni aushe, tadi kara sigo okouiri ontimugoji.

⁴⁶ Pouiri ndjika ontimugoji Jesus okui igida neui enene: Eli, Eli lama sabaktani atshi ti: Karunga kandje, Karunga kandje, otshike ue ekerashi ndje?

⁴⁷ Jamue mba ja ri taa cikama mpoka, nde taa tshu uvu, oja ti: Nguka oti icana Elias.

⁴⁸ Gumue gua mboka ote enderere, ta kuca otshinuameja, te tshu uda omeja omaruru, te tshi tura kotshenguti, nde te mu pe okunua.

⁴⁹ Jakuauo taa ti: Muena manka, otua ara tu tare, Elias ng’ote ja e mu upice.

⁵⁰ He Jesus ti igida itshee neui enene, nde ta si.

⁵¹ Nde tara, erapi rjomutshigo, ndi tari edire ontempeli, orja tatuka pokati pombanda sigo oposhi, evi tari kekama, omamanja taga tendaguka.

⁵² Eembira tade eguruka, nde eemudimba odindji d’oonakusa aajapuki tadi jumuka.

⁵³ Konima hejumuko oja ka za mo meembira, nde taa hi momukunda omujapuki, taa monikua kojendji.

⁵⁴ Erenga rjaakuiita na ajeshe, mba je ri na he, ja rangere Jesus, sho ja mono ekekamo rjevi najishe, mbi ja ningua po, oja tiririra, nde taa ti: Otsh’otshiri guanene, nguka okua ri Omumua Karunga.

⁵⁵ Ngahuija okua ri ku naakiintu ojendji, mba ja zi ku Galilea, ja randura Jesus, je mu jakure.

⁵⁶ Mu jo omua ri Maria Magdalena, Maria hina ha Jakobus, na hina haana ja Zebedeus.

Jesus ta turua mombira

⁵⁷ Rokonguroshi ku Pilatus okue ke ja omuntu omujamba, edina rje Josef guo ku Arimatea. Okua ri itshee omurongua gua Jesus.

⁵⁸ He ta hi ku Pilatus, h’oti indire omudimba gua Jesus. Pilatus ta rombuere omudimba e gu peue po.

⁵⁹ Josef h’ota kuca nduno omudimba, nde te gu dingire merapi rja jera.

⁶⁰ Te gu rangeke mombira he ompe, ndji a hokica memanja. Potsheero tshombira ta garangaticire po emanja enene, h’ota hi.

⁶¹ Mpo opua ri pu na Maria Magdalena na Maria omukuauo, ja kaatumba haandija hombira.

⁶² Esiku rja nofu, ndi rja randura esiku rjerongikido, aapristeri aakuruntu naafariseji oja ki igongera ku Pilatus.

⁶³ Nde taa ti: Muene, otua dimburukua, nokutja omupukici nguija, manka a ri e nomuenjo, okua tire: Nge pua piti omasiku gatatu, otandi ka jumuka.

⁶⁴ Rombuera ano, ombira hi ka rangerue sigo omesiku etitatu, aarongua kaa he ando, nde taa mu jaka mo, jo ja tje kaantu: okua jumuka kuusi, nde rjo ekotokero rja shugunina tari geje ri vure rjotango.

⁶⁵ Pilatus ta ti ku jo: Aarangeri ojo mbo, indeni mu ka rangere ombira ngashi mu uete tsho opara.

⁶⁶ Jo otaa hi, taa ka patekera ko emanja, nde taa tura po pombira aarangeri.