Mateus 26 - Etestemente Epe ✠ 1951

ONTOPORUA 26. Jesus ta guajekua

¹ Okua ningi, Jesus sho a mana eehapu di adishe, okua rombuere aarongua je, ta ti:

² Omu tshi tshi, nokutja konima homasiku gaari Opaska. Omuna guOmuntu nduno ta gandjua a ka arerue komutshigakano.

³ Petango ndiono opua gongarere aapristeri aakuruntu naakuruntukuruntu jaantu motshoto tshomupristeri omukuruntu, edina rje Kaifas.

⁴ Oko kua taa huvacanene, nokutja Jesus otaa mu kuata ngiini nekoto, je mu dipage.

⁵ Ndere taa ti: Inatshi ningua mesiku rjotshituci, kamu tukuke evundakano mokati kaantu.

⁶ Nde Jesus a ri mu Betania, ta kaatumba kotshiriro megumbo rja Simon, ngu a ri nuuvu uotshirundu.

⁷ Omukiintu gumue okue ja ku he, e notshijuma tsh’uurenga, tshu uda omagadi gokuguaja, ge nondiro, nde te ga tire komutse gue.

⁸ Aarongua taa tshi mono, nde taa geje, taj’ipopire: Okuepica kua tshee huno?

⁹ Ngeno kua ga randerue po iimariua ojindji, ji gandjerue eehepere!

¹⁰ He Jesus e tshi tshi, nde ta ti ku jo: Otshike tamu geere omukiintu ngu? Okua ningira ndje otshironga otshaanaua.

¹¹ Oshoka aacigona oje ri pu ne arushe, ndere ngaje kamu na ndje uunaarushe.

¹² Nokutira omagadi ngaka korutu ruandje okue tshi ningirire efumbikiro rjandje.

¹³ Tshiri, otii mu rombuere: Uunaarushe nakushe hu taku uvicirua evangelium, na ko uo otaku epururua shi a ningira ndje, otsho tshidimburukico tshe.

¹⁴ Mesiku ndija gumue gua mboka omurongo na jaari, edina rje Judas Iskariot, okua hi kaapristeri aakuruntu.

¹⁵ He ta ti ku jo: Otamu pe ndje tshee, nge tandi mu ororere ngu? Jo otaa kundacana je mu pe iishilinge eemurongo ndatu.

¹⁶ Okuza mpoka ota kongo po ike ompito hokumugandja.

Uurarero uujapuki

¹⁷ Mesiku rjotango rjiikurja iitoue aarongua oje ja ku Jesus, taa ti: Oua ara tu ka rongikidire peni onzigona ha Paska, tu hi rjeni?

¹⁸ Jesus h’ota ti: Indeni momukunda komurumentu guontumba, mu tje: Muene ota ti: Erara rjandje orja cika, ndi ningire oPaska maandjohe naarongua jandje.

¹⁹ Aarongua taa ningi, ngashi Jesus e ja rombuere; nde taa rongikida oPaska.

²⁰ Konguroshi h’ota kaatumba na jo kotshiriro.

²¹ Manka taa ri, h’ote ja rombuere: Tshiri, andi mu rombuere, gumue mo mu ne oto orora ndje.

²² Aarongua nde taa nik’uupongo uunene, taa shimbike okumupura ko ogumuegumue: Muene, ha ngaje ndi tshi?

²³ H’ota jamukura: Ohe ngu, ngu ta tura eke rje puamue na ngaje motshijasha, ohe ta ko orora ndje.

²⁴ Omuna guOmuntu ota hi ngaaka ngashi pua tshangua, ndere ojeeje komuntu ngo, ngu to orora Omuna guOmuntu. Oshuepo ngeno kuaj’omuntu ngoka ina varua.

²⁵ Nde Judas omuoorori gue te mu pura: Muene, ha ngaje nani? Nde Jesus ti i mo: Eno, ongueje.

²⁶ Manka taa ri, Jesus ta kuca omboroto, nde te hi jambeke, te hi pambura, he te hi pe aarongua je, ta ti: Kuateni, rjeni, shika orutu ruandje.

²⁷ He ta kuca ehoro, nde ta amberere, te ri ja pe, ta ti: Nueni mo amushe.

²⁸ Oshoka shika ombinzi handje, ho ombinzi heguaneno epe, ndji tahi tikire ojendji kediminopo rjeendjo.

²⁹ Otii mu rombuere: Okuza mpaka itandi ka nua ue iihimati mbi jomavinju sigo okesiku ndija, tii ga nu itshee puamue na ne motshirongo tsha Tate.

Jesus mepja rjeemono.

³⁰ Sho ja mana okuimba ehamberero, oja hi kondundu heemono.

³¹ Nde Jesus ta ti ku jo: Uusiku mbu amushe otamu ka rimbirirua, ndere oku ngaje, oshoka otsho pua tshangua: Onda ara ndi denge omusita, nd’eenzi duusita tadi sharakana.

³² Ndere ng’onda jumuka, andi ke mu tetekerera ku Galilea.

³³ Mpo Petrus ta jamukura, ta ti ku he: Ajeshe nge ja rimbirirua, ngaje itii rimbirirua.

³⁴ Nde Jesus ta ti ku he: Tshiri, andi ku rombuere: Uusiku ngaa mbuno, manka ekondomboro inari iga, otu idimbike ndje rutatu.

³⁵ Ndere Petrus ta gana: Nando one he mokusa na ngueje, itii ku idimbike. Tsh’otsho ngaa aarongua ajeshe taa popi.

³⁶ Jesus h’okue ja na jo mepja, edina rjarjo Getsemani, nde ta ti kaarongua je: Kaatumbeni mpa, manka andi hi huija, ndi ka garikane.

³⁷ Nde he ta zi po na Petrus naana ja Zebedeus, a shimbike okuponga nokumbandara.

³⁸ Nde ta ti ku jo: Omuenjo guandje ogua ponga sigo okokusa. Kareni mpa, ne mu taatare na ngaje.

³⁹ Sho a hengene katshona komesho, okua ts’otshipara pevi, nde ta garikana: Tate, nge tatshi vurikua, ehoro ndi nari pitirire ndje: Ndere ha ngashi ngaje nda ara, aaue ongashi tuu ua ara.

⁴⁰ H’ote ja kaarongua je, nde te ja ada ja koca. H’ota ti ku Petrus: Itamu vuru nani okukara mua taatara na ngaje okacimbo okatshona?

⁴¹ Taatareni, ne tamu garikana, kamu guire memakero; ombepo ho komuenjo oha hara ngaa, ndere onjama oh’onkundi.

⁴² H’ota tshuna ko itshee, nde ta garikana, ta ti: Tate, ng’itatshi vurikua, ehoro ndika ri pitirire ndje, ngaje otii ri nu, eharo rjohe nari ningue.

⁴³ H’ota hi itshee ku jo, nde te ja ada itshee ja koca, oshoka omesho gauo oga ri ga ninga omadigu.

⁴⁴ Te je eca, ta hi ike, nde ta garikana orutitatu, ta popi nga’tshikuauo.

⁴⁵ Te ja kaarongua je, ta ti: Koceni ano, ne mu vururukue: Tareni, erara orja cika, Omuna guOmuntu mu ta gandjerua miikasha jaarunde.

⁴⁶ Pendukeni ano, tu eni! Tara, omuoorori oku ri popepi.

Jesus ta kuatua

⁴⁷ Manka e ri po ta popi doka, tara, Judas h’oku uruka ko, gumue guo mu mboka omurongo na jaari, te ja nongundu onene haantu, je neemuere needimbo Aapristeri aakuruntu naakuruntukuruntu jotshirongo ojo kua je ja tuma.

⁴⁸ Ndere omuoorori okue ja pe otshidimburukico, a tja: Ngu tii ka amberere eemurungu, ohe ngo, mu kuateni.

⁴⁹ Naanzijanzija ta hi ku Jesus, ta ti: Muene, kundua! Nde te mu amberere eemurungu.

⁵⁰ Jesus no ta ti: Kuume, oui ire tshike? Jo otaa hengene ko, nde taa kuata Jesus, nde meemango.

⁵¹ Nde tara, gumue gua mboka jo pu Jesus okua kuata omuere meke rje, ta denge omupija guomupristeri omukuruntu, nde te mu keke okutsi.

⁵² He Jesus te mu rombuere: Tura omuere morumpangua, oshoka ajeshe, mba haa kuata omuere, otaa si komuere.

⁵³ Nenge ou tshi, itandi vuru okuindira Tate, a tumine ndje nzijanzija aajengeli, je vure eengundu omurongo na mbaari, ja karere ndje?

⁵⁴ Ndere nani otatshi guanicua ngiini, shi tsha tshangua, nokutja shi atshishe otsho tatshi ningua.

⁵⁵ Perara ndika Jesus okua rombuere uo eengundu d’ aantu: Omue ja po, mu kuate ndje, mua f’aantu taa hi ja ka kuate omukorokoshi, mu neemuere needimbo. Keshe siku onda ri pu ne, nda kaatumba montempeli, ndere inamu kuata ndje.

⁵⁶ Ndere ajishe mbi oja ningua, omutshangero guaaprofeti gu guanicue. Aarongua je ajeshe oje mu cigi po, nde taa h’onda po.

⁵⁷ Mbejaka, mba ja kuata Jesus, oje mu fara ku Kaifas omupristeri omukuruntu, mpa pua ri pua gongara aanonga jomambo naakuruntukuruntu.

⁵⁸ Petrus te mu randura ngaa ngahui kotshoto tshomupristeri omukuruntu. Nde ta hi mo, ta kaatumba paapija a tare shi tatshi ningua.

⁵⁹ Aapristeri aakuruntu notshingongi atshishe jo otaa kongere po Jesus iihokorora jiirombo, opo je mu tokore a se.

⁶⁰ Ndere inaa mona nande tshimue, jo nando aahokorori ojendji oja cikamene momarundiro. Shugunina aahokorori jaari ji iri oje ja nomarundiro gauo itshee gamue.

⁶¹ Taa ti: Nguka okua tire: Ote vuru okukumuna po ontempeli ha Karunga, ngaje tii hi tungurura po momasiku gatatu.

⁶² Omupristeri omukuruntu ta cikama, ta ti ku he: Ito jamukura mo tsha mu shi taa ku dogere?

⁶³ Nde Jesus okua muena ciru. Omupristeri omukuruntu h’ota ti ku he: Otii ku ganica ku Karunga omunamuenjo, u tu rombuere: Onguee Kristus Omumua Karunga?

⁶⁴ Jesus ta ti: Eno, ongaje ngashi ua ti. Otii ku rombuere: Kongashiingika otamu ka mona Omuna guOmuntu a kaatumba korurjo rueenkondo da Karunga, nde he one ja miikogo jeguru.

⁶⁵ Naanzija omupristeri omukuruntu h’ota fuagura eenguuo de, ta ti: A tsheka Karunga. Otua pumbua itshee aahokorori ji iri? Tareni, ne etsheko rja Karunga omue ri uva.

⁶⁶ Otamu ti ngiini? Jo otaa jamukura: Oku notshikoro tshokusa.

⁶⁷ Jo otaa mu sijire omate motshipara tshe, taa mu denge neengonjo, nde jamue taa mu denge eempi keempanda.

⁶⁸ Jo otaa ti: Tu ucira nduno, Kristus, ore e ku denga?

Petrus ti idimbike

⁶⁹ Nde Petrus ta kaatumba pondje potshoto. Omukareri omukiintu te engene ku he, ta ti: Na ngueje oua ri na Jesus omugalilea.

⁷⁰ H’oti ipatana momesho gaantu ajeshe, ta ti: Kandi tshi shi to popi.

⁷¹ Sho a piti motsheero, omukareri omukiintu i iri h’ote mu mono, nde ta rombuere aantu, mba je ri mpo: Na nguka uo okua ri na Jesus omunazareta.

⁷² Nde ti ipatana itshee, ta gana: Omuntu ngo ngaje kandi mu tshi nandekuri.

⁷³ Konima herara etshona ajeshe oje engene ko, mba ja cikama mpo, jo taa ti ku Petrus: Otshiri, na ngueje ogumue po gua mbeja, eraka rjohe ari ku orora ngaa.

⁷⁴ Naangashiingika ta tameke okucinga nokugana: omuntu ngo kandi mu tshi. Naanzija ekondomboro rjo tari igi.

⁷⁵ Mpoka Petrus h’okua dimburukua ohapu ha Jesus, sho a tire: Ekondomboro mank’inari iga, ngueje oto idimbike ndje rutatu. H’ota zi mo nokuri, a huka kondje, ta riririre.