Mateus 25 - Etestemente Epe ✠ 1951

ONTOPORUA 25. Omeere gaari: aakadona 10

¹ Pecimbo ndija otshirongo tsheguru otathi f’aakadona omurongo, mba ja kuca iiminikiro jauo, nde taa hi ja tsakaneke omujareki nomukadona gue.

² Jatano po oja ri omaraji, jatano oja ri aanandunge.

³ Mbeja omaraji oja ri ike niiminikiro jauo, jo inaa faarera uo omagadi.

⁴ Ndere aanandunge oja kuca iiminikiro jauo mumue nomagadi miijuma jauo.

⁵ Omujareki sho a kara ko, ajeshe oja s’eemposi, nde taa koca.

⁶ Pokati kuusiku opui igidua: Tareni, omujareki ohe ngo te ja, ke mu tsakanekeni.

⁷ Jo aakadona ajeshe ja penduka guanene, nde taa sameke iiminikiro jauo.

⁸ Omaraji oga ti kaanandunge: Tu pii mo uo momagadi geni, oshoka iiminikiro jetu otaji dimi.

⁹ Aanandunge jo otaa jamukura, taa ti: Itage tu guaneni sse na ne. Indeni shira ku mba taa randica, mu ki irandere geni.

¹⁰ Manka taa hi ja ka rande, omujareki e ja. Nde mba ja adika ji irongikida, jo otaa mu cindikire kohango. Mpaka otsheero tsho otatshi patua po.

¹¹ Shugunina aakadona mbeja je ja, nde taa ti: Muene, muene, tu egurura.

¹² Nde he ta ti: Tshiri, andi mu rombuere, ngaje kandi mu tshi.

¹³ Ano taatareni, oshoka kamu tshi esiku nerara.

Muene naapija je 3

¹⁴ One tshi ningi a f’omurumentu, ta ara okuha kiirongo, a hicana aapija je, nde te ja pe iinima je.

¹⁵ Gumue okue mu pe iitalenti iitano, mukuauo te mu pe iijari, nd’omutitatu te mu pe tshimue, keshe muntu te mu pe tshe ereka eenkondo de. H’ota hi nokuri.

¹⁶ Ngu a perue iitalenti iitano, okui ire, ta ka ronga na jo, nde ta guedere po itshee iitano ji iri.

¹⁷ Na nguija, ngu a perue iijari, okua ka guedera po itshee iijari.

¹⁸ Ndere nguija, ngu a perue tshimuike, okui ire, nde ta fumbike tshe mevi, to oreke iimariua ja muene gue.

¹⁹ Sho pua piti erara ere, muene guaapija mbeja a ka garuka, nde ta jarura na jo omujaru.

²⁰ Opue ja nguija, ngu a perue iitalenti iitano, te eta po iitano iikuauo, nde ta ti: Muene, ua pere ndje iitano, nda guedera po itshee iitano.

²¹ Muene h’ota ti ku he: Otshaanaua, nguee mupija omuanaua ngu’omudiginini, morua shi ua diginina muunima uutshona, otii ku dike nduno mojindji. Inda mo menjanju rja muene guohe!

²² Ko otaku randura ngu a perue iitalenti iijari, nde ta ti: Muene, iitalenti iijari ua pere ndje, tara, nda guedera po itshee iijari.

²³ No ku he muene ota ti: Otshaanaua, nguee mupija omuanaua ngu’omudiginini, morua shi ua diginina muunima uutshona, otii ku dike nduno mojindji. Inda mo menjanju rja muene guohe!

²⁴ Ko otaku ja uo nguija, ngu a perue tshimuike, nde ta ti: Muene, ondi tshi tshi, nokutja ngueje omuntu omukukutu. Oto teja, hu ino kuna, oto gongere, hu ino shanena.

²⁵ Otsho ano nda tira, nde tii hi, ndi ko oreke otshitalenti tshohe mevi. Tara, kuata shi tshohe, otsho shi.

²⁶ Nde muene ta jamukura, ta ti ku he: Nguee mupija omuineji ngu’omunjenge. Ue tshi mona, nokutja ote teja, hu ine kuna, ngaje te gongere, hu ine shanena.

²⁷ Ngeno kua ngaa ua fara otshitalenti tshandje kaarandakanici, ando onde ja ngaa mokugaruka kuandje, nde tii tshi peururua niiguederua jatsho.

²⁸ Mu kuceni otshitalenti sho, nde tamu tshi pe nguija, ngu e niitalenti omurongo.

²⁹ Oshoka keshe ngu e na tsha, ota peua itshee a kare nerooro. Ndere ngu ke na tsha, ota kucua uo shi a fa e na.

³⁰ Nd’omupija ngu ke na ruporo, mu umbireni ano meemurema dopondjerera, mu tamu kara eriragano nehikokoto rjomeego.

Epanguro rjuujuni

³¹ Omuna guOmuntu, nge te ke ja e ri mehadimo rje, naajengeli je je mu ima po, ona kaatumba nduno kotshipundi tshepangero tsho mehadimo rje.

³² Aantu ajeshe onaa gongerua pu he, nde he ta joorora ajeshe ong’omusita ta joorora mo eenzi miikombo.

³³ Eenzi one di gameke kokurjo kue, nd’iikombo te ji gameke kokumosho kue.

³⁴ H’omukuaniirua ota ti ku mba je ri kokurjo kue: Ireni, ne jajambekua ja Tate, mu cigurure uukuaniirua, mbu ua kara ua rongikidirua ne okuza ketshito rjuujuni.

³⁵ Oshoka onda ri nda s’ondjara, nde tamu pe ndje ndi rje, onda ri nda s’enota, nde tamu pe ndje ndi nue, onda ri ondjendi, nde tamu edirire ndje.

³⁶ Onda ri ouara korutu, nde tamu zareke ndje, onda ri nda arukua, nde tamu tarere ndje po, onda ri meemango, nde tamu ja ku ngaje.

³⁷ Mpaka ota jamukurua ku mba ju uka, taa ti: Muene, otue ku monene unake ua s’ondjara, nde tatu ku pe u rje? Otue ku pere unake u nue menota rjohe?

³⁸ Otue ku edirire unake ong’ondjendi, nenge oua ri ouara, nde tatu ku zareke?

³⁹ Otue ku monene unake muuvu nenge meemango, nde tatu ja ku nguee?

⁴⁰ H’omukuaniirua one ja jamukura: Tshiri, andi mu rombuere, shi mua ningirire gumue po paamuameme mba aanuunuka, ongaje mue tshi ningira.

⁴¹ H’omukuaniirua ota rombuere nduno mbo je ri kokumosho kue: Zii po pu ngaje, oonakucingua ne, indeni momuriro guarushe, ngu gua rongikidirua satana naaranduri je.

⁴² Oshoka onda ri nda s’ondjara, nd’inamu pa ndje ndi rje, onda ri nda s’enota, nd’inamu pa ndje ndi nue.

⁴³ Onda ri ondjendi, nd’inamu edirira ndje, onda ri ouara, nd’inamu zareka ndje, onda ri nda arukua, ngaje nda ri meemango, nd’inamu ja mu tarere ndje po.

⁴⁴ Mbaka otaa ke mu pura: Muene, otue ku monene unake ua s’ondjara nenge ua s’enota, ondjendi nenge u ri ouara, to arukua nenge u ri meemango, nd’inatu ku karera?

⁴⁵ Ndere he ta ka tja ku jo: Tshiri, andi mu rombuere, shi inamu ningira gumue po paanuunuka mba, inamu tshi ningira ndje uo.

⁴⁶ Jo otaa ka ha mehepeko rjarushe, ndere mba ju uka omomuenjo guarushe.