Mateus 24 - Etestemente Epe ✠ 1951

ONTOPORUA 24. Eshanagura rja Jerusalem no rjuujuni

¹ Jesus ta zi mo montempeli, nde ta hi. Aarongua je oje engene ku he, je mu urukire eenguru adishe dontempeli.

² He te ja jamukura: Omu uete ajishe mbino? Tshiri, otii mu rombuere, muka itamu cigua emanja ri ri kombanda hekuauo, ndi itari kumunua po.

³ Sho a kaatumba mondundu heemono, aarongua oje ja ku he, ojo ike, nde taa mu pura: Tu rombuera ano, mbika ajishe onaji ningua unake, notshidimburukico tshokuja kohe no tsheshuriro rjuujuni otshiini?

⁴ Jesus te ja jamukura: Tareni, inamu pukicua nand’ okomuntu.

⁵ Oshoka ojendji otaa ke ja medina rjandje, nde taa ti: Onga’Kristus, nde taa ka pukica ojendji.

⁶ Otamu ku uva iita neemurombo diita, nde tareni, kamu mbandare, oshoka ajishe onaji ningua, ndere natango eshuriro inari cika.

⁷ Oshoka otshiguana otatshi ka cikama tshi kondjice otshiguana, notshirongo notshirongo otsho tuu, eemukici eemudigu nondjara nomakekamo gevi otage ke ja, okeemukunda no keemukunda.

⁸ Ajishe mbiono etameko ouara rjuuhehame.

⁹ Jo otaa ke mu gandja miishuna, jo taa ke mu dipaga, ne tamu ka tondikua komarudi ageshe moru edina rjandje.

¹⁰ Nojendji otaa ka rimbirirua, taa ka popacana, jo taa ka tondacana.

¹¹ Otaku ja aaprofeti jiirombo ojendji, jo taa ka pukica uo ojendji.

¹² Na shoka uurunde tau ku udirira, ohore hojendji otahi ka shushua.

¹³ Ndere ngu ti ididimike sigo eshuriro, ota ku upicua.

¹⁴ Evangelium ndika rjotshirongo otari ku uvicirua uujuni aushe, ri tshiuicire aantu ajeshe; eshuriro rjo otari ja nduno.

¹⁵ Nge tamu mono iishuna jeshanaguropo rjotshirongo otshijapuki, mbi ja shunganekerue komuprofeti Daniel-ngu ta resha, he na kotoke —

¹⁶ Indeni ondapo nduno; ngu e ri mu Judea, ta hi m’eendundu.

¹⁷ Ngu e ri pombanda hondunda, ina rondoroka po, a ke ete tsha maandje.

¹⁸ Ngu e ri mepja ina garuka, a ke ete onguuo he.

¹⁹ Ojeeje nahi kare po kaamuaari naasimba momasiku ngo.

²⁰ Ndere garikaneni, okuha kueni kaku ningue pokufu nenge mesiku rjesabata.

²¹ Oshoka onapu kara uudigu uunene ngashi inau kara po nare ketameko rjuujuni sigo onena, uo itau ja ko ue.

²² Ngeno kua omasiku itaga shupiparekua, ando kape nomuntu tu upicua, ndere omasiku otaga shupiparekua moru aahogororua.

²³ Ng’omuntu te mu rombuere, ta ti: Tareni, Kristus oongu nenge oonguii, inamu tshi iteera.

²⁴ Oshoka ookristus jiirombo naaprofeti jiirombo onaa ja, jo taa ka ronga omadidiriko niirongankondo, opo aahogororua uo ja pukicue, mpa tatshi pondokere.

²⁵ Tareni, onde tshi mu rombuera.

²⁶ Ano, nge taa mu rombuere: Tareni, oku ri mombuga, inamu ha ko, tareni, oku ri momagumbo, inamu tshi iteera.

²⁷ Oshoka ngashi oruadi taru zi kuuziro, ruo taru adima sigo okuuninginino, otsho ngaa ngii okuja kOmuna guOmuntu naku oroka.

²⁸ Mpa pu na omudimba, opo tapu gongara uo eentsa.

²⁹ Uudigu mbuka uomasiku ngano nge ua piti, nopo etango onari ruuda nomuedi onagu kara itagu jere ue, n’eenjoci onadi gu ko keguru neenkondo deguru onadi kekamicua.

³⁰ Nena otshidimburukico tshOmuna guOmuntu otatsho oroka nduno keguru. Omazimo ageshe guujuni onaga riragana, go taga ka mona Omuna guOmuntu te ja e ri m’iikogo jeguru neenkondo nehadimo.

³¹ Ona tumu ko aajengeli je, ja tje eembendo, nde taa ka gongorora ko aahogororua je keembinga iine okuza koshuro heguru sigo okonkuauo.

³² Ihongereni omeere komukuju: Iitaji jago nge taji rouo, nuufo nge tau ja ko, otamu dimburura, nokutja okuenje oku ri popepi nokupita.

³³ Tsh’otsho uo ne, nge mu uete ajishe mbijaka ja ningua, tshiueni, nokutja eshuriro ori ri popepi.

³⁴ Tshiri, andi mu rombuere: Ezimo ndika itari shuru po, manka ajishe inaji ningua.

³⁵ Eguru nevi otari shuru po, ndere eehapu dandje kadi shura po.

³⁶ Ndere esiku necimbo ndija kape nomuntu e ri tshi, naajengeli uo, Tate ohike tuu.

³⁷ Ngashi tsha ningirue muujuni ua Noa, otsho uo okuja kuOmuna guOmuntu.

³⁸ Ngashi petango rjejeru, manka inari cika, aantu ja ri taa ri, taa nu, taa hokana, taa hokanua sigo okesiku ndija Noa sho a hire metembameja.

³⁹ Ndere inaa dimburura tsha, sigo ejeru rje ja, rjo tari kuca po ajeshe; otsho tatshi ningua pokuja kuOmuna guOmuntu.

⁴⁰ Onaku adika jaari mepja: gumue ota jakurua, mukuauo ta cigua po.

⁴¹ Jaari onaa tsu motshiini: gumue ota jakurua, mukuauo ta cigua po.

⁴² Ano rungameni, oshoka esiku rjokuja kua Muene kamu ri tshi.

⁴³ Ndere tshiueni shika: Muene guegumbo ngeno kua a ri e tshi ecimbo, mu hamu ja omufuci, ando a kara a taatara, egumbo rje kari ruue po.

⁴⁴ Ano kareni, mui irongikida, oshoka Omuna guOmuntu one ja pecimbo kamu ri tshi.

⁴⁵ Omukareri omudiginini homunandunge oguni, ngu a turua po ku muene a pangere aantu jomegumbo rje, e ja p’iikurja pecimbo euanaua?

⁴⁶ Omukareri ngu e nerago, muene nge te mu ada, ta rongo ngii pokuja kue.

⁴⁷ Tshiri, andi mu rombuere, ote mu pe a pangere iinima je ajishe.

⁴⁸ Ndere omukareri nguno nge omuineji, nde ti ipopire momuenjo gue: muene guandje ite ja nena,

⁴⁹ He ta shimbike uo okudenga aakareri aakuauo, nde ta ri, he ta nu neenkorui,

⁵⁰ Nena ano muene guomukareri ngu, nge te ja mesiku ndi, ine mu tega, no pecimbo ke ri tshi.

⁵¹ Tshiri, te mu shashara, e mu pe tshimue naafudime meshara, mo mu na eriragano nehikokoto rjomeego.