Mateus 23 - Etestemente Epe ✠ 1951

ONTOPORUA 23. Jesus ta ganda aafariseji

¹ Jesus h’ota rombuere aantu naarongua je, ta ti:

² Aanongo jomambo naafariseji ohaji ikaatumbike kotshipangerapundi tsha Moses.

³ Ajishe mbi taa mu rombuere, ji ningeni, ne ji rongeni, ndere inamu orera iironga jauo, oshoka otaa rombor’ike, nde itaa tshi ningi.

⁴ Jo haa manga eemutenge eemudigu da njengacana okuumbatua, jo taa di tsike komapepe gaantu, ndere jo ojene inaa hara okudinjenga nand’onomunue.

⁵ Iironga jauo ajishe taa ji rongo, opo ja monike kaantu, iipakorua jomatumburiro otaa ji ningi iinene neendjendjerera deefungi eende.

⁶ Oje ore iipundi jotango piituci neembanga dotango meesinagoga.

⁷ Oja ara unene okukundua motshirandero nokurukua edina Rabbi.

⁸ Ne inamu ihicanica Rabbi, oshoka omuongi gueni gumuike, ndere ne amushe aamuahina.

⁹ Inamu ruka nand’omuntu kombanda hevi edina tate, oshoka Sho gumuike, ohe tuu ngu e ri meguru.

¹⁰ Inamu irukica edina rjaakuruntu rjaarongi, aaue, oshoka gumuike omukuruntu gueni, oKristus.

¹¹ Ngu e vure mukuauo mokati keni, na ninge omukareri gueni.

¹² Oshoka ngu ti inenepeke, ota tshonopekua, ngu ti itshonopeke, ota nenepekua.

¹³ Ojeeje ku ne, janongo jomambo naafariseji, aafudime ne, oshoka ohamu edirire aantu otshirongo tsha Karunga. Ne ojene itamu hi mo, ne tamu imbi mo itshee, mba ja ara mo.

¹⁴ Ojeeje ku ne, janongo jomambo naafariseji, aafudime ne, oshoka ohamu ri omagumbo gaasherekadi nokupopja omagarikano omare, ano tamu ka mona epanguro edigu ri vure po.

¹⁵ Ojeeje ku ne, janongo jomambo naafariseji, aafudime ne, oshoka ohamu endahenda mefuta no miirongo, mu konge omuiteeri gumuike, nde ng’i iteera, tamu mu ningi omuna guoheri, a vurikue ku ne ruuaari.

¹⁶ Ojeeje ku ne, jatetekereri aaposi, mbo hamu ti: Omuntu ngu ta gana kontempeli, ke na mbudi, nde ngu ta gana kiingoldi jontempeli, he ta ciminikua e tshi diginine.

¹⁷ Maraji ne aaposi! Shi tshi vure po otshiini, otshingoldi nenge ontempeli, ndji tahi japura iingoldi.

¹⁸ Itshee: Omuntu ngu ta gana kohaltari, ota gana ouara, ndere ngu ta gana kegano, ndi ri ri mo, ohe ti imanga.

¹⁹ Japosi ne, shi tshi vure po otshiini, egano nenge ohaltari, ndji tahi japura egano?

²⁰ Ano, ngu ta gana kohaltari, he ta gana ku ho no ku ajishe, mbi ji ri kombanda haho.

²¹ Ngu ta gana kontempeli, ota gana ku ho no ku ngoka e ri mo.

²² Ngu ta gana keguru, ota gana uo kotshipundi tshepangero rja Karunga no ku ngu a kaatumba ko.

²³ Ojeeje ku ne, janongo jomambo naafariseji, aafudime ne, mbo hamu gandja otshitimurongo tshiiganga no tshopepera no tshiimeno jiikunino, nde shi tshi vure atshishe miipango, nokutja ehuko nesiroshenda nediginino tamu tshe eca. Shika namu tshi ninge, tsho tshikuauo kamu tshe ece.

²⁴ Ne jatetekereri aaposi, otsho ngii ohamu dindi mo odi, ne hamu ninagura ongamero.

²⁵ Ojeeje ku ne, janongo jomambo naafariseji, aafudime ne, ohamu kosho ehoro notshijasha kombanda, ndere meni omu uda uumpuru nuuharu.

²⁶ Mufariseji omuposi nguee, jereka tango meni rjehoro no rjotshijasha, kombanda taku jere tshito.

²⁷ Ojeeje ku ne, janongo jomambo naafariseji, aafudime ne, omua f’eembira da korongua, di uetikue do opara kombanda, nde meni rjado odu uda omasipa gaasi nonjata keshe.

²⁸ Otsho ngaa ngii kombanda mu uetikue mu uka, nde meni rjeni mu uda uufudime nuurunde.

²⁹ Ojeeje ku ne, janongo jomambo naafariseji, aafudime ne, ohamu tungu eembira daaprofeti, ne hamu opareke uo iidimburukico jeembira da mba ju uka.

³⁰ Nde tamu ti: Ngeno kua tua ri nomuenjo muujuni uotate, ando inatu monenua mo ombedi hotshikoro mombinzi haaprofeti.

³¹ Omui ihorora ne ojene, nokutja one aana jaadipagi jaaprofeti.

³² Ne tamu udica nduno otsheerekico tsh’oosho.

³³ Majoka ne, ruvaro ruomapiri, omua ara ngiini mu enuke epanguro rjoheri?

³⁴ Tareni ano, otii tumu ku ne aaprofeti naanongo naatshiui jomambo, nde tamu ka dipaga jamue, ne tamu ke ja arera komutshigakano jamue po tamu ke ja denga n’eengora meesinagoga nokujatidagana keemukunda neemukunda.

³⁵ Nde ombinzi ahishe ondjapuki, ndji ha tikira muujuni, ahi ja mu ne okuza kombinzi ha Abel, ngu a ri a huka, sigo okombinzi ha Zakarias, omumua Barakias, mue mu dipagere mokati kontempeli nohaltari.

³⁶ Tshiri, otii mu rombuere, ajishe mbi otaji ke ja kombanda horuvaro nduka.

³⁷ Jerusalem, Jerusalem, ngu ua dipaga aaprofeti, nde to mbambanga uo nomamanja, mba je ku tuminua, rungapi nda arere okugongara aanohe tsh’ondjushua hahi gongere uujushuona koshi homauaua, nde ngueje ino tsha ara!

³⁸ Tareni, egumbo rjeni otamu ke ri cigirua ri ri ouara.

³⁹ Oshoka otii mu rombuere: Okuza konena itamu ka mona ndje ue sigo okesiku ndioka tamu ka tja: Na ambererue, ngu te ja medina rja Muene.