Mateus 20 - Etestemente Epe ✠ 1951

ONTOPORUA 20. Aarongi mepja rjomavinju

¹ Otshirongo tsheguru otsha fa muene guegumbo, ngu a meneka ongura onene a ka shije aarongi jepja rje rjomavinju.

² Tu uvacana naarongi ondjambi hondenari himue mesiku, h’ote ja tumu mepja rje.

³ Potundi ontitatu ta piti mo, nde ta mono jamue je nonjaro potshirandero.

⁴ Te ja rombuere: Na ne uo indeni mepja rjandje, otii mu pe shi tshu uka.

⁵ Jo otaa hi: Potundi ontikanekamue nomutimugoji ta piti mo itshee, he ta ningi nga tshikuauo.

⁶ Potundi ontimurongo na himue okua hi, nde ta ada po jamue, ja cikama, nde ta ti ku jo: Otshike mua cikama etango arishe mpoka, itamu rongo tsha?

⁷ Jo otaa jamukura: Oshoka kapena ngu e tu shija. H’ote ja rombuere: Na ne uo indeni mepja rjandje.

⁸ Onguroshi muene guepja rjomavinju ta rombuere kapitija ke, ta ti: Icana aarongi, nde to ja p’ondjambi, to shimbike ku mba ja shugunina sigo oko jotango.

⁹ Mbeja ojo je ja po tango, mba ji ire kiironga potundi ontimurongo na himue. Nde keshe tuu ogumue ta peua ondenari he.

¹⁰ Jotango sho je ja momutete, okua ja tega ja peue je vure po, ndere na jo oja peu’ike ondenari.

¹¹ Pokuhifutua oja ngunguturire muene guepja.

¹² Nde taa ti: Mba ja shugunina, oja ronga otundi himuike, ndere oue je ereka na sse, mba tu umbata uudigu nomutenja guetango arishe.

¹³ H’ota jamukura po gumue, ta ti: Kuume, inandi ku ningira otshineji. Inatu uvacanena nani ondjambi hondenari himue?

¹⁴ Kuca shi tshohe, nde to hi. Na ngu a shugunina otii mu pe ngaa uo tshi cike po tshohe.

¹⁵ Nenge ite vuru okuninga na shi tshandje shi nda ara? esho rjohe orja ninga okasheshe, sho ngaje omuanaua?

¹⁶ Otsho ngii aashugunini ojo naa ninge jotango, jo jotango taa ningi aashugunini. Oshoka ojendji oji icanua, ndere aatshona jo ogororua.

Okuepekua kua Jesus

¹⁷ Mondjira Jesus sho a hi ku Jerusalem, okui ikucire po aarongua je omurongo na jaari, nde te ja rombuere:

¹⁸ Tareni, otatu hi ku Jerusalem, Omuna guOmuntu a ka gandjue kaapristeri aakuruntu no kaanongo jomambo, jo taa ke mu tokora a se.

¹⁹ Jo otaa mu ecere nduno miikasha jaapagani a tshekue, a dengue neengora, a harerue komutshigakano, nde mesiku etitatu ta ka jumuka itshee.

Aana ja Zebedeus

²⁰ Po opue ja ku he hina haana ja Zebedeus naamati je, h’oti injongamene ku he, e mu indire tsha.

²¹ Jesus h’ota ti ku he: Oua ara tshee? H’ota jamukura: Popja, aamati jandje mba jaari ja ka kaatumbe motshirongo tshohe, gumue korurjo, mukuauo korumosho.

²² Jesus ti i mo: Kamu tshi nande shi tamu indire. Otamu vuru nani okunua ehoro, ndi tandi ka nua? Jo taa ti: Otatu tshi vuru.

²³ Nde he ta ti: Ehoro rjandje otamu ke ri nua ngiika, ndere okupa iipundi korurjo ruandje nenge korumosho katshi shi otshironga tshandje, aaue, otsha Tate tuu, h’ote ji pe mba e ji rongera.

²⁴ Aakuauo omurongo sho je tshu uvu, oja geere aamuahina mba jaari.

²⁵ Nde Jesus te ji icana ku he, he ta ti: Omu tshi tshi, nokutja aakuaniirua jiirongo ohaa ji rere, nomarenga hage ji pangere.

²⁶ Ha tsho tshi kare mokati keni; mokati keni ngu a hara a ninge omukuruntu ku mukuauo, ni ininge omupija gueni.

²⁷ Ngu a hara a ninge guotango mokati keni, na ninge omupika gueni.

²⁸ Ngashi Omuna guOmuntu ine ja a karerue, aaue, okue ja a karere tuu, nomuenjo gue e gu gandjerere ojendji ong’otshikurira.

Aaposi mu Jeriko

²⁹ Sho ja zi ko ku Jeriko, aantu ojendji oje ja randura.

³⁰ Nde tara, aaposi jaari taa kaatumba pondjira; sho ju uvu, nokutja Jesus te ende po, oji igida: Muene, tu siroshenda, nguee Mumua David!

³¹ Aantu oje ja ganda ja muene. Ndere jo otaji igida itshee muure: Muene, tu siroshenda, nguee Mumua David!

³² Jesus ta cikama, h’ote ja pura: Omua ara ndi mu ningire tshike?

³³ Jo otaa ti: Omesho getu ga pashurue.

³⁴ Jesus e ja siroshenda, ta njenge omesho gauo, jo oja mono ko, jo otaa mu randura nokuri.