Mateus 2 - Etestemente Epe ✠ 1951

ONTOPORUA 2. Aanongo jatatu mu Betlehem

¹ Ano Jesus sho a varua mu Betlehem motshirongo tsha Judea, muujum ua Herodes omukuaniirua, tara, aanongo oja za kuuziro, je ja ko Jerusalem.

² Oja ti: Omukuaniirua guAajuda, ngu a varua ngashiingika, oku ri peni? Oshoka otua mona onjoci he kuuziro, nde ss’otue ja tu mu injongamene.

³ Ndere Herodes, sho e tshu uvu, okua ri a haruka unene, nAajerusalem ajeshe puamue na he.

⁴ H’ota gongere aapristeri aakuruntu naatshiui jomambo jotshirongo, te ja pura, Kristus mp’a varua.

⁵ Jo otaa ti ku he: Omo Betlehem, motshirongo tsha Judea, oshoka otsho pua tshangerue ngii komuprofeti:

⁶ Nguee Betlehem, motshirongo tsha Juda, ku shi nand’okatshonatshona mokati keemukunda domarenga mu Juda, oshoka mu ngueje otamu zi Muene, ngu ta ka ninga omureri guorudi ruandje Israel.

⁷ Nena Herodes eti icana aanongo mofuci, he tu uvu ku jo tshiri, ecimbo ri ini onjoci he jo orokere.

⁸ He te ja tumu ku Betlehem, ta ti: Indeni ko ano mu ka konge okanona, nde nge mue ka mono, omu tshiuica ndje, ndi he uo ndi ki injongamene.

⁹ Shi ja puakene omukuaniirua, oja hi. Nde tara, onjoci, ndji ja monene kuuziro, ohe ja tetekerera, tahi ja kombanda heshara, mpa pu nomunona, nde tahi cikama.

¹⁰ Sho ja mono onjoci, oja njanjukua unene.

¹¹ Oja hi megumbo, nde taa mono okanona na hina Maria; oji ishata poshi, taji injongamene. J’otaa suukura iikeca, nde taa ka p’omagano: iingoldi niizimba nomaka.

¹² Mondjodi oja rombuerua kaa tshune ue ku Herodes; otsho ano ja tshunine kotshirongo tshauo nondjira hi iri.

Etembukiro ku Egipte.

¹³ Sho ja zi po, omujengeli gua Muene okuo orokere Josef mondjodi, ta ti: Cikama, kuca omunona na hina, nde to h’onda po ku Egipte, oko to kara sigo otii ku rombuere, oshoka Herodes a hara a konge okanona, e ka dipage.

¹⁴ Naanzija ta cikama, ta kuca okanona na hina uusiku, nde ta hi ku Egipte.

¹⁵ Oko a kara sigo okusa kua Herodes, opo tshi ningue shi tsha popirue ku Muene momuprofeti, ta ti: Ondi icana omumuandje ku Egipte.

¹⁶ Herodes sho a mono, nokutja okua tshendjerekua kaanongo, okua geje unene; he ta tumu ko okudipagica mu Betlehem no mehero rjago uunona uumati aushe, mbu u neevura mbaari na mbu inau ada, nokuereka ecimbo, ndi a huva kaanongo.

¹⁷ Otsho tsha guanicua shi tsha rombuerua komuprofeti Jeremias, ta ti:

¹⁸ Eui orju uvika mu Rama, neriragano neenkari; Rakel ta ririre aanona je, h’ina ara okuekerericua, oshoka kaa po ue.

¹⁹ Herodes, sho a si, tara, mondjodi omujengeli gua Muene okuo orokere Josef mu Egipte, ta ti:

²⁰ Cikama, kuca okanona na hina, u tshune kotshirongo tsha Israel, oshoka mba kua ja tanta ja dipage okanona, oja sa.

²¹ He ta cikama, ta kuca omunona na hina, nde ta tshuna kotshirongo tsha Israel.

²² Sho a huvu, nokutja Arkelaus ta pangere mu Judea peshara rja she Herodes, okua tira ko, nde sho a rombuerua mondjodi, ho ota hi motshirongo tsha Galilea.

²³ Nokue ja a kare momukunda gua rukua Nazaret, opo tshi ningue, shi tsha tiua kaaprofeti: He ta rukua omunazareta.