Mateus 19 - Etestemente Epe ✠ 1951

ONTOPORUA 19. Ehokano

¹ Opua ningi, Jesus sho a shurica eehapu de, h’ota zi mo mu Galilea, nde ta hi motshirongo tsha Judea haandija ha Jordan.

² Aantu ojendji oje mu randura, he te je erukica mpoka.

³ Aafariseji oje ja ku he, jo otaa mu makere, taa ti: Otshu uka tuu, omurumentu a rareke omukiintu gue kompango keshe?

⁴ H’ota jamukura: Inamu resha nani, kutja ohe ngu a tshita aantu petameko, okue ja tshita omurumentu gumue nomukiintu gumue, nde ta ti:

⁵ Ano omurumentu ota cigi po she na hina a kare nomukiintu gue, jo ajeshe jaari taa ningi onjama himue?

⁶ Ano kaa je shi ue jaari, aaue, onjama tuu himuike. Shi tsha turua kumue ku Karunga, inatshi kucua kumue komuntu.

⁷ Jo otaa ti: Otshike nduno Moses a rombuera okutshanga ombirive herareko, omukiintu a rarekue?

⁸ He ta ti ku jo: Moses okue tshi pitikirire moru uukukutu ueemutima deni, mu rareke aakiintu jeni. Ndere petameko ko otsho tsha ri.

⁹ Ndere ngaje otii mu rombuere: Keshe tuu ngu ta cigi po omukiintu gue-ng’inatshi ningirua oruondero-nde to okana gumue i iri, oto ondere; na ngu to okana gumue a rarekua, oto ondere.

¹⁰ Aarongua jo otaa ti: Ehokano rjomurumentu no rjomukiintu ng’orja tja ngaaka, okuokana inaku opara.

¹¹ He ta ti ku jo: Ha ajeshe taa nongere ohapu ndjika, ojo tuu ike, mba je tshi peua.

¹² Oku na oonakuikarera, mba ja varua ngii mera rja hina, noku na oonakuikarera, mba ja ningua ngii kaantu, noku na itshee oonakuikarera, mba taa hikarere moru otshirongo tsha Karunga. Ngoka ta vuru okutshinongera, ne tshi nongere.

Jesus nuunona

¹³ Po opue etua uunona ku he, e u tenteke omake ge, e u jambeke. Ndere aarongua oje ja ganda nokuri.

¹⁴ Jesus h’ote ja rombuere: Eceni uunona u je ku ngaje, inamu u kerera, oshoka otshirongo tsheguru otsha mbuka.

¹⁵ H’ote u tenteke omake ge, nde ta zi po mpoka.

Omumati omujamba

¹⁶ Nde tara, gumue okue ja, te mu pura: Muhongi omuanaua, nandi ronge uuanaua uuni, ndi mone omuenjo guarushe?

¹⁷ H’ota ti ku he: Otshike to pura ndje uuanaua ouuni po? Gumuike omuanaua: oKarunga. Nge ua ara ano okuha momuenjo guarushe, guanica iipango.

¹⁸ H’ote mu pura: Ojiini? Jesus ta ti: Ino dipaga, ino jakera, ino jaka, ino rundira.

¹⁹ Simaneka sho na njoko, ora mukueni ngashi u ihore muene!

²⁰ H’omumati ota jamukura: Atshishe shika onde tshi ninga okuza kuunona uandje. Otshike itshee ndi na po katshi po?

²¹ Jesus h’ote mu rombuere: Ng’oua ara u kare ua pua ua guana, inda, ka randica po atshishe shi u na, nde to tshi p’aacigona, opo to kara u neriko meguru. Nguee to ja u randure ndje.

²² Omumati sho a huvu eehapu di, h’okua hi a hehama momuenjo, oshoka okua ri omujambarera.

²³ Nde Jesus ta ti kaarongua je: Tshiri, andi mu rombuere, ope nuudigu komujamba a he motshirongo tsheguru.

²⁴ Eno, otii mu rombuere itshee: Ongamero ngeno hi pite mombururu honguija oshuepo tshi vure omujamba a he motshirongo tsheguru.

²⁵ Aarongua sho je tshu uvu, oja kumua ko, nde taa ti: Ore ano ta vuru okuupicua?

²⁶ Jesus h’ote ja tara, nde ta ti ku jo: Paantu otsha njengacana, ndere Karunga ka njengua ku tsha.

²⁷ Nde Petrus ta jamukura: Tara, otua ciga po iinima ajishe, sse tue ku randura, onatu ka peua ondjambi hiini?

²⁸ He Jesus ti i mo: Tshiri, otii mu rombuere: Pokutshiturura uujuni Omuna guOmuntu nge ta ka kaatumba kotshipundi tshehadimo rje, na ne uo, mbo mua randura ndje, onamu ka kaatumba kiipundi omurongo niijaari, ne mu pangure omazimo omurongo na gaari ga Israel.

²⁹ Nde keshe tuu ngu ta cigi po egumbo naamuahina aamati naakadona na she na hina nomunona nepja rje moru edina rjandje, ota ka mona ondjambi pecere, he ta ka cigurura omuenjo guarushe.

³⁰ Ndere ojendji mbo jotango nena otaa ka ninga aashugunini, na mba aashugunini nena ojo taa ka ninga jotango.