Mateus 17 - Etestemente Epe ✠ 1951

ONTOPORUA 17. Jesus ta adimicua

¹ Omasiku kanekamue sho ga piti po, Jesus h’ota kuca Petrus na Jakobus na mumuahina Johannes, nde ta hi na jo ike kondundu onde.

² H’okua tshituka momesho gauo; otshipara tshe otsha jerere tsha f’etango, nd’eenguuo de adi toko da f’omeegere.

³ Nde tara! Po opo oroka Moses na Elias, nde taa kundacana na he.

⁴ Nde Petrus ta shimbike okupopja, ta ti ku Jesus: Muene, mpaka op’uuhanaua mpa; ng’oua ara, atu tungu po eendunda ndatu, himue hohe, himue ha Moses, onkuauo ha Elias.

⁵ Mank’e ri ta popi, tara, po opue ja otshikogo otshitokere, nde tatshi ja ningire omudire. Motshikogo tamu zi eui, tari ti: Nguka omumuandje omuorike, ngu ndo okua unene. Ohe namu uve!

⁶ Peehapu dika aarongua jo otaa hishata po iipare jauo, nde taa kara ja tiririra.

⁷ Jesus h’ote ja pu jo, te ja njenge, nde ta ti: Pendukeni, ne inamu mbandara ue.

⁸ Hera ja rigamenica omesho, inaa ada po nand’ogumue, oJesus ike.

⁹ Mokurondoroka ko kondundu Jesus h’ote ja rombuere: Inamu ka rombuera nande omuntu emoniko ndika sigo Omuna guOmuntu ota ka jumuka.

¹⁰ Mpa aarongua je mu pura: Otshike aanongo jomambo taa ti: Elias one ja tango?

¹¹ He ta jamukura: Eno, Elias one ja, he ta ka tungurura ajishe.

¹² Ndere otii mu rombuere: Elias okue ja nare, ndere inaa mu dimburura, jo ja ning’ike shi ja ara. Tsh’otsho Omuna guOmuntu ta monicua iishuna ku jo.

¹³ Ngashiingika oje uete, kutja he okua popja ku jo Johannes omutshatshi.

Omuvu guotshitona te erudua.

¹⁴ Sho a tsakanekua kaantu, omuntu okue ja ku he, ti ishata keengoro.

¹⁵ Ta ti: Muene, sir’omumuandje oshenda, oku nuuvu ua f’otshitona, ote epekua unene. Orundji ota guire momuriro, orundji uo momeja.

¹⁶ Onde mu eta kaarongua johe, ndere oja njengua okumuerukica.

¹⁷ He Jesus ta ti: Rudi orupagani rua pirika ne, sig’ unake te kara pu ne? Sig’unake andi mu tar’onteni? Mu eteni hu ku ngaje!

¹⁸ Jesus ta ganda ombepo ombuineji, ho otahi zi mo momumati, nde petango ndika okue eruka.

¹⁹ Aarongua ojo ike je ja ku Jesus, taa mu pura: Otshike matsa kuaj’inatu pondora okuhitida mo?

²⁰ Jesus ta ti: Oshoka kamu nehiteero. Tshiri, otii mu rombuere: Ng’omu nehiteero rja f’onjapi, ando ng’otamu popi kondundu: Za po mpaka, otahi hi, nd’itamu ka njengua ku tsha, tshivarerue.

²¹ Orudi ndu otaru tidua mo ike negarikano nokuidirika iikurja.

²² Manka taa hendahenda mu Galilea, Jesus ta ti ku jo: Otatshi ka ningua, Omuna guOmuntu ta ka gandjua miikasha jaantu.

²³ Jo otaa ke mu dipaga, nde mesiku etitatu ota ka jumuka. Jo oja nik’uupongo uunene.

Jesus ta fendere uo.

²⁴ Sho ja ciki ku Kafarnaum, aafenderi oje ja ku Petrus, taa ti: Omuhongi gueni ota fendere uo?

²⁵ H’ota ti: Ee. Sho a hi mondjugo, Jesus okue mu pura tango: Oto ti ngiini, Simon, aakuaniirua juujuni otaa kuca ku re efendero nofuto, okaana jauo nenge okaakuiirongo?

²⁶ He ta jamukura, ta ti: Okaakuiirongo tuu. Jesus ta ti: Ano ojana itaa futu.

²⁷ Ndere katu ja shinde, inda kefuta, umbira mo okarongororo, nd’oshi, ndji tahi piti tango, hi kuata. Nge to hi makura okana, to ka mona mo otshimarirua, tshi kuca mo, u tshi ja pe, otshetu na ne.