Mateus 16 - Etestemente Epe ✠ 1951

ONTOPORUA 16. Aafariseji taa gandua

¹ Aafariseji naasaduseji oje ja ku Jesus je mu makere. Jo otaa mu indire e ja pe edidiriko tari zi keguru.

² H’ote ja jamukura: Nge kua toka, ohamu ti: Otatu ka mona esiku euanaua, oshoka eguru orja tirigana.

³ Ng’okua tshi: Nena taku uviua ombepo onene, oshoka eguru orja tirigana kiikogo.

⁴ Omadidiriko go keguru omu tshi okugatokora, ndere omadidiriko gecimbo kamu ga tshi nani? Orudi ndu oruineji ruo oruaageri otaru kongo edidiriko, ndere itaru mono rimue, shira orja Jona omuprofeti ike. H’ote ja cigi po, nde ta hi.

⁵ Aarongua sho ja taaguruka efuta, oje ja ku he, ndere oja dimbua okuha neeshima.

⁶ H’ote ja rombuere: Taatareni, mu he ondapo ontaku haafariseji no haasaduseji.

⁷ Ngashiingika otaa kundacana: Inatu ha neeshima.

⁸ Jesus okua ri e tshi tshi, nde ta ti: Otshike tamu kundacana, janenguni mehiteero, oshoka kamu neeshima?

⁹ Natango kamu neendunge nani? Inamu dimburukua ue eemboroto ntano daarumentu omajovi gatano niihupe jado miimbare iingapi?

¹⁰ Nenge eemboroto uunuaari daarumentu omajovi gane? Iimbare iingapi mua toora?

¹¹ Kamu uvite ko nani, kutja inandi popja eemboroto, sho nda ti: Indeni ondapo ontaku haafariseji no haasaduseji?

¹² Ngashiingika oju uvite ko, kutja ina tja, naa he ondapo ontaku heemboroto, aaue, erongo rjaafariseji no rj’aasaduseji tuu.

Petrus ta ningi erenga

¹³ Jesus h’okue ja meemukunda da Kesarea Filipi. Nde ta pura aarongua je: Omuna guOmuntu aantu otaa mu ti omumua re?

¹⁴ Jo otaa jamukura: Jamue otaa mu ti Johannes omutshatshi, jamue taa ti ohe Elias, jamue itshee taa ti ohe Jeremias nenge ngaa gumue po go maaprofeti.

¹⁵ Nde Jesus te ja pura: Ne nduno otamu ti ndje omumua re?

¹⁶ Simon Petrus ta jamukura: Onguee Kristus, Omumua Karunga munamuenjo.

¹⁷ Jesus ta ti ku he: Omunerago onguee Simon, omumua Jona, oshoka ka njama nombinzi he tshi ku ororere shi, aaue, oTate, ngu e ri meguru.

¹⁸ Nd’otii ku rombuere: Onguee Petrus. Ko kemanja ndika ote ka tungira ko Eklesia rjandje, nd’itari ka sindika nandoodiro kiijeero joheri.

¹⁹ Ngueje otii ku pe eeshapi dotshirongo tsheguru. Atshishe shi to ka manga komband’evi, no meguru atshi kara tsha mangua uo; natshishe shi to ka mangurura mo komband’evi, no meguru atshi kara tsha mangururua uo.

²⁰ H’ota rombuere aarongua je, kaa tshi popje nand’okomuntu, kutja ohe Kristus.

Jesus ta popi omeepeko ge

²¹ Okuza nduno petango ndio Jesus h’ota shimbike okurombuera aarongua je, nokutja e nokuha ku Jerusalem nokumona iishuna ojindji kaakuruntu no kaanongo jomambo no kaapristeri aakuruntu, nokudipagua nokujumuka mesiku etitatu.

²² Petrus h’ota hi na he ruampee, nde ta tameke okumuganda, ta ti: Muene, tshivarerue, ito tshi ningirua nandenande.

²³ H’ota piramene ko, nde ta ti ku Petrus: Za po pu ngaje, satana, to shindi ndje, oshoka ito diradira shi tsha Karunga, aaue, shoka otshaantu ike.

²⁴ Jesus h’ota rombuere aarongua je: Omuntu, ng’a hara a randure ndje, ni iciminike, i itshike omutshigakano gue, nde ta randura ndje.

²⁵ Oshoka ngu a hara a hupice omuenjo gue, ote ke gu kanica po, nde ngu ta kanica omuenjo gue morua ndje, ote ke gu mona.

²⁶ Oshoka otatshi kuaca tshike omuntu, nge ta jugu uujuni aushe, nde nani komuenjo gue ta mono iishuna? Nenge omuntu ota gandja tshike a rande omuenjo gue?

²⁷ Oshoka Omuna guOmuntu one ja mehadimo rja She puamue naajengeli a fute keshe tuu gumue tshi cike piironga je.

²⁸ Tshiri, otii mu rombuere: Jamue ja mbo ja cikama mpano, itaa ka mona okusa, manka Omuna guOmuntu ine ja motshirongo tshe.