Mateus 15 - Etestemente Epe ✠ 1951

ONTOPORUA 15. Jesus ta pukurura aafariseji

¹ Aanongo jomambo naafariseji oje ja ku Jesus, ja zi ku Jerusalem, taa ti:

² Otshike aarongua johe taa tokora eemukaro daakuru jonare, oshoka kaa hikosha keenjara, nge taa ri?

³ He ta jamukura, ta ti: Otshike tamu tokora otshipango tsha Karunga moru eemukaro deni, nande Karunga ta ti:

⁴ Simaneka sho na njoko, nde ngu ta tuka she na hina, na se.

⁵ Ndere ne otamu ti: Keshe tuu ngu ta ti ku she nenge hina: ajishe mbi ondi nokukupa, otaji ningi egano, he ina pumbua ue okusimaneka she na hina.

⁶ Otsho mua dima po otshipango tsha Karunga moru eemukaro deni.

⁷ Jakengereri ne! Isaias okue mu shunganekera notshiri, sho ta ti:

⁸ Orudi ndu otaru simaneke ndje ouara neemurungu, ndere eemutima dauo odi ri kokure na ngaje.

⁹ Jo otaa simaneke ndje ouara, sho taa rongo aantu omarongo niipango jaantu.

¹⁰ H’oti icana aantu ku he, nde ta ti: Puakeneni, ne mu uve ko naua!

¹¹ Katshi shi shi tatshi hi mokana, tatshi nigirikica omuntu, aaue, nde shi tatshi zi mo mokana ike, tatshi nigirikica omuntu.

¹² Nena aarongua oje ja ku Jesus, taa ti: Ou tshi tshi nani, nokutja aafariseji oja geja, sho ju uva eehapu dohe?

¹³ He ta ti ku jo: Keshe tuu otshimeno, shi inatshi tsikua ku Tate homeguru, otatshi tudua po.

¹⁴ Je eceni, ojo aaposi naatetekereri jaaposi. Ndere omuposi, nge ta tetekerere omuposi, ajeshe jo jaari otaa guire motshirambo.

¹⁵ Petrus h’ota jamukura: Tu ororera ejere ndika.

¹⁶ He ta ti: Na ne kamu neendunge nani?

¹⁷ Kamu uete nani, kutja ajishe, mbi taji hi mokana, otaji hi uo mepunda, jo taji zire mo uo mompito ha tshitua.

¹⁸ Ndere ajishe, mbi taji zi mokana, otaji zi momutima uo, mbika otaji nigirikica nduno omuntu.

¹⁹ Oshoka mbi taji zi momutima, ojo mbi: omadiradiro omiineji, omadipagano, omaagero, joshoni, uufuci, omarundiracano, omatsheko.

²⁰ Ojo mbi taji nigirikica omuntu. Ndere okurja neenjara inadi koshua, itaku nigirikica omuntu.

Omukiintu omukananeji.

²¹ Jesus okua zi po mpo, nde ta hi motshirongo tsha Sidon na Tirus.

²² Nde tara, omukiintu omukananeji okua zi keemukunda dija depora, ti igida, ta ti ku he: Sa ndje oshenda. Muene, Mumua David, omumuandje omukadona ota monicua iishuna kombepo ombuineji.

²³ Ndere Jesus ine mu jamukura nand’ohapu. Aarongua oje ja ku he, taa mu indire: Rareka ngu a he ike, oshoka ota jogerere monima hetu.

²⁴ Ndere he ta ti: Onda tumu’ike keenzi di da kana maandja Israel.

²⁵ Omukiintu okue ja popepi, ti injongamene ku he, ta ti: Muene, kuaca ndje!

²⁶ He ta jamukura: Inatshu uka to kuc’okurja ku uunona, nde to ku umbire uumbuagona.

²⁷ Ndere he ta ti: Eno, Muene, uumbuagona ohau ri ike uupambu, mbu hau gu kiiriro joojene.

²⁸ Jesus ta jamukura: Mukiintu, ehiteero rjohe enene, ningirua ngashi ua ara. Okuza tuu mpoka omona okue eruka.

Itshee Jesus ta kutica aantu omajovi

²⁹ Mpa Jesus h’okua piti, ta hi kefuta rja Galilea, ta rondo kondundu, nde ta kaatumba.

³⁰ Aantu ojendji oje ja ku he, na mba ja sit’eui, aaposi, iirema, nojendji ja fa mboka, oje ja rangeke keempadi de, h’ote je erukica.

³¹ Aantu ja kumua ko, sho taa mono aasitamaui taa popi, iirema taje ende, aaposi taa mono ko; jo otaa amberere Karunga ka Israel.

³² Jesus h’oti icana aarongua je, ta ti ku jo: Ondu uvitire aantu oshenda, oshoka omasiku gatatu ja kara pu ngaje, ndere inaa rja tsha. Inandi ara okujarareka ja he, inaa rja tsha, kaa ka sire mondjira.

³³ Ndere aarongua taa ti: Otatu kuca peni muka mombuga eemboroto okukutica aantu je cike mpoka?

³⁴ Jesus h’ote ja pura: Mu neemboroto ngapi? Jo taa ti: Uunuaari neeshi eentshona.

³⁵ H’ota rombuere aantu ja kaatumbe poshi.

³⁶ Nde ta kuc’eemboroto di uunuaari neeshi tuu, ta amberere, te di pambura, h’ote di p’aarongua, je di toporere aantu.

³⁷ Jo ajeshe oja rja, nde taa kuta. Iihupe oje ji gongere, iimbare uunuaari ju uda.

³⁸ Mba ja rja, oja ri aarumentu omajovi gane, aakiintu naanona inaa jarurua.

³⁹ H’ota rareke aantu, ta rondo mosikepa, nde ta hi motshirongo tshaamagedan.