Mateus 14 - Etestemente Epe ✠ 1951

ONTOPORUA 14. Okusa kua Johannes omutshatshi

¹ Petango ndi Herodes, erenga rjotshitiine tshotshirongo, oku uvu omurombo, ngu tagu tirua Jesus.

² H’ota ti kaapija je: Ngoka tshiri oJohannes, okua jumuka kuusi, eenkondo eenene tadi rongo mu he.

³ Herodes okua ri a kuata Johannes, e mu manga nokue mu fara modorongo morua Herodias, omukiintu guomumuahina Filippus.

⁴ Oshoka Johannes okua he mu rombuere: Oui indikua okukara na he.

⁵ Nand’a arere okumudipaga, ndere okua tira aantu, oshoka oje mu ruku omuprofeti.

⁶ Mesiku rjokudimburukua okuvarua kua Herodes omona omukadona gua Herodias okua dana uudano mokati kaantu aahenda, nde Herodes okue mu panda unene.

⁷ H’ote mu rombuere, ta gana: ta ti: keshe shi te mu indire, ote mu pe nokuri.

⁸ H’ota peua omurombo ku hina, ta ti: Pe ndje ngashiingika motshijasha shi omutse gua Johannes omutshatshi.

⁹ Omukuaniirua h’ota pongo, ndere morua shi a gana no moru aahenda, mba ja kaatumba puamue na he potshiriro, ti iteere.

¹⁰ Ta tumu ja keke ko omutse gua Johannes modorongo.

¹¹ Omutse gue ogue etua motshijasha, nd’omukadona te gu peua, h’ote gu fara ku hina.

¹² Aarongua je oje ja, taa kuca omudimba, nde taa gu fumbike, jo taa hi, je ke tshe epururire Jesus.

Jesus ta kutica aantu 5000 mombuga

¹³ Jesus ano, sho e tshu uvu, okua taaguruka mosikepa, a huke keshara ri ri ouara a ki ikarere na jo. Ndere aantu sho je tshi mono, oje mu randura korupadi, ja zi keemukunda.

¹⁴ Sho e ja komutunda, okua mono aantu ojendji, h’e ju uvitire oshenda, nde ta panga aavu jauo.

¹⁵ Etango tari ningine manka. Aarongua jo otaa hi ku he, taa ti: Eshara ndika orja f’ouara ombuga, esiku orja pita, ano rareka aantu ja he meemukunda ja rande iikurja jauo.

¹⁶ Ndere Jesus ta ti ku jo: Aaue, inaa pumbua okuha, one ja peni okurja.

¹⁷ Jo taa mu rombuere: Ssesse otu na po ike eemboroto ntano neeshi mbaari.

¹⁸ He ta ti ku jo: De eteni hu!

¹⁹ H’ota rombuere aantu ja kaatumbe momuidi, ta kuca eemboroto ntano di neeshi mbaari, ta rigamene keguru, te di jambeke, te di pambura, h’ote di pe aarongua, nd’ aarongua taa di toporere aantu.

²⁰ Jo otaa ri, nde taa kuta. Taa gongere uupambu, mbu u upa ko, iimbare omurongo niijaari ju uda.

²¹ Omujaru gua mba ja rja, ogu cike p’aarumentu omajovi gatano, aakiintu naanona inaa jarurua.

Jesus te ende mefuta

²² Ngashiingika Jesus oku undura aarongua je ja ronde mosikepa, jo je mu tetekerere okutaaguruka haandijaka, manka ta rareke aantu.

²³ Sho a rareke aantu, okua rondo kondundu a ki ikarere a ka garikane. Etango rja ningina. Oh’ike a kara mpoka.

²⁴ Osikepa ohi ri mokati kefuta, ho otahi tengenja komakucikuci. Okua ri ku nombepo onene, he ja denge m’ iipara.

²⁵ Pokati kuusiku okue ja ku jo, te ende kombanda hefuta.

²⁶ Aarongua sho ja mono, te ende kombanda, oja tira, nde taa ti: Otshiruru ooshoka! jo otaa kugu muumbanda.

²⁷ Naanzija Jesus te ja popica, ta ti: Kareni nehinekero, ongaje ngu. Inamu tira!

²⁸ Petrus ta jamukura: Muene, ng’ongueje, icana ndje ndi je ku ngueje, andi ende kombanda homeja.

²⁹ He ta ti: Ira nduno! Petrus ota zi mosikepa, he ta hi kombanda homeja a he ku Jesus.

³⁰ Ndere sho a huvu ombepo onene, okua tira, nde ta tameke okuningina, h’oti igida, ta ti: Muene, hupica ndje.

³¹ Naanzija Jesus ota tenteke eke rje, te mu kuata, nde ta ti ku he: Omumbanda nguee mehiteero, otshike ua rimbirirua?

³² Sho ja rondo mosikepa, ombepo ha rota.

³³ Ndere mba ja ri mosikepa, oje ja je mu injongamene keempadi de, taa ti: Tshiri, ongueje Omumua Karunga.

³⁴ Sho ja taaguruka haandijaka, oje ja motshirongo tshaagenesar.

³⁵ Aantu jo motshirongo tshika, sho je mu dimburura, oja tumu momukunda agushe, jo taj’eta uo ku he aavu ajeshe.

³⁶ Jo je mu indire, a hiteere, ja njenge ouara omutse guonguuo he. Jo ajeshe, mba je gu njenge, oje eruka.