Mateus 13 - Etestemente Epe ✠ 1951

ONTOPORUA 13. Omeere ga Jesus

¹ Esiku ndija Jesus okua zi mo megumbo, nde ta hi, ta ka kaatumba pefuta.

² Aantu ojendji oja gongara pu he; h’ota hi mosikepa, ta kaatumba mo. Aantu ajeshe oja cikama komutunda.

³ Nde te ja rombuere unene eehapu domeere. H’ota ti: Omukuni okua pita mo a ka kune eembuto de.

⁴ Mokukuna dimue adi guire mondjira, do eedira do mombanda tadi ja, nde tadi di tshomona mo.

⁵ Dimue adi guire puukukutu, mpo kapu nevi orindji, tadi piti ngaa nzija, oshoka inadi ha muure mevi.

⁶ Ndere etango sho rja tsu, odu uvu omutenja, do tadi ganj’ike, sho eemudi inadi ha moshi.

⁷ Dimue adi guire momano, go omano taga koko, go ge di cinaneka.

⁸ Dimue adi guire mevi euanaua, do otadi vara iihimati, dimue pecere, dimue peemurongo kanekamue, dimue peemurongo ndatu.

⁹ Ngu e nomakutsi, nu uve ko.

¹⁰ Nde aarongua oje ja po, taa mu pura: Otshike nduno to popi na jo meehapu domeere?

¹¹ He ta jamukura, ta ti: Oshoka ne omua peua okutshiua iihorekua jotshirongo tsheguru, ndere mbejaka aaue, inaa tshi peua.

¹² Ngu e na, he ta guederua ko, ota ka kara a hudirira. Ngu ke na, he ta kucua uo shi e na.

¹³ Ano ote popi na jo momeere, oshoka nand’otaa mono, kaa uete ko, nand’otaa pupu, kaa huva ko, jo kaa huvite ko uo.

¹⁴ Otatshi guanicirua mu jo, shi tsha shunganekerue ku Isaias, ta ti: Nomakutsi otamu pupu, ndere kamu uvite ko, nomesho otamu mono, ndere kamu uete ko.

¹⁵ Oshoka eemuenjo daantu mboka oda kukuta, go omakutsi gauo ga fa ga sita, jo ja cicikirica omesho gauo kaa uete nand’onomesho, inaa hara okuuva nomakutsi nokuiteera meemutima dauo, kaji itedurure, ngaje kandi je erukice.

¹⁶ Omesho geni oge nerago, oshoka oge uete, go omakutsi geni uo, oshoka otagu uvu ko.

¹⁷ Tshiri, otii mu rombuere: Aaprofeti ojendji naajuki oja jeerukirirue okumona shi mua mona, ndere inaa tshi mona, nokuuva shi mu uva, ndere inaa tshu uva.

¹⁸ Ano uveni ejere rjomukuni!

¹⁹ Omuntu nge tu uvu ohapu hotshirongo, ndere he ke hu uvite, nena omutondi ote ja a rue po shi tsha kuninue momuenjo gue. Ohe te erekua na ndji ha kunua pondjira.

²⁰ Ndji ha kunua puukukutu uomamanja, ohe tuu omuntu, ngu tu uvu ohapu, he te hi jakura nzija nenjanju.

²¹ Ndere ke neemudi mu he, ano he ina dama; nge ta mono uudigu netidaguro moru ohapu, he ita arura okuinjeka po.

²² Ndji ha kunua mokati komano, ohe tuu ngu tu uvu ohapu, ndere iisho juujuni niiherere juujamba otaji pondo ohapu mu he, nde itahi tiriganeke iihimati nandookuri.

²³ Shugunina ndji ha kunua mevi euanaua, ohe omuntu, ngu tu uvu ohapu, h’oku hi uvite, nde ti imike iihimati pecere nenge peemurongo kanekamue nenge peemurongo ndatu.

²⁴ H’ote ja e ja rombuere itshee ejere rimue, ta ti: Otshirongo tsheguru otsha f’omuntu a kuna ombuto ombuanaua mepja rje.

²⁵ Aantu manka ja koca, omutondi okue ja ta kunununa mo omau mokati kiirja, nde ta hi.

²⁶ Eemuma sho da piti mo, nde tadi vara, go omau ogu uruka ko uo.

²⁷ Nena aapija ja muene guepja oje ja, taa pura: Muene, ino kuna ombuto ombuanaua ike mepja rjohe nani? Ano omau ngeja oja zi peni?

²⁸ H’ote ja jamukura: Shoka omutondi e tshi ninga. Aapija taa pura: Oua ara nduno tu he tu gu tude mo?

²⁹ He ta ti: Aaje, otamu tuda mo omau mumue niirja, nge tamu ga tude mo.

³⁰ Je eceni ji koke ajishe sigo oketejo. Etejo nge rja ciki, one rombuere nduno aateji: Gongereni tango omau, nde tamu ga manga iipandi ga ka fikue po, ndere iirja otamu je eta momashisha gandje.

³¹ Nejere ri iri okue ja jerekere, ta ti: Otshirongo tsheguru otsha f’omuma hotshinjapi, omuntu e hi kucire, nde te ke hi kuna mepja rje.

³² Oho ontshuutshu mokati keemuma adishe, ndere sho ha mene, oha pitirire iiganga ajishe, nde tahi ningi omuti omunene, nde eedira do mombanda otadi ja, nde adi ka rumba miitaji jago.

³³ Te ja rombuere itshee ejere ta ti: Otshirongo tsheguru otsha f’ontaku, omukurukadi e hi kucire, nde te hi rungu nuusira iiherekico iitatu, sigo otahi pi ahishe.

³⁴ Ajishe mbika Jesus okue ji rombuere aantu momeere, h’ina popja na jo neehapu kadi shi domeere.

³⁵ Opo tshi ningue shi tsha popiua komuprofeti, ta ti: Onda ara okujeruca okana kuandje momeere, nde tandi uvica shi tsha ri tsho orekua okuza koshimbi huujuni.

³⁶ Nena Jesus okua rareka aantu, nde ta hi megumbo. Aarongua je oje ja ku he, taa ti: Tu fatururira ejere rjomau mepja!

³⁷ He ta jamukura, ta ti: Ngu a kuna ombuto ombuanaua, okutja Omuna guOmuntu.

³⁸ Epja okutja uujuni. Eembuto eembuanaua okutja aana jotshirongo, omau okutja aana juuineji.

³⁹ Ndere omutondi, ngu a kuna, osatana. Etejo okutja eshuriro rjuujuni. Aateji okutja aajengeli.

⁴⁰ Ngashi ngaa omau haga gongerua, go haga fikua po momuriro, otsho ngaa uo ngii napu kara keshuriro rjuujuni.

⁴¹ Omuna guOmuntu ona ka tuma aajengeli je ja gongere motshirongo tshe aapukici najeshe mba taa rongo shi inatshu uka.

⁴² Jo otaa ju umbire meziko rjomuriro, mpa napu kara eriragano nehikokoto rjomeego.

⁴³ Ndere mba ju uka, onaa ka adima ja f’etango muukuaniirua ua She. Ngu e nomakutsi gokuuva, nu uve ko.

⁴⁴ Otshirongo tsheguru otsha f’eriko rjo orama mepja. Omuntu te ri mono, h’ota kara na rjo muufuci, nokurinjanjukirua ta hi, ta randica atshishe shi e na, rj’epja ndio te ri randa.

⁴⁵ Otshirongo tsheguru otsha fa uo omurandi ta kongo omaue omaanaua.

⁴⁶ Sho a ka mona nduno eue ehanaua ri nondiro, h’ota hi, nde ta randica po atshishe shi e na, nde eue ndio te ri randa.

⁴⁷ Otshirongo tsheguru otsha f’itshee otshijurico, shi tatshu umbirua mefuta, nde tatshi kuata eeshi di ri opendji.

⁴⁸ Sho tshu uda, jo taa tshi shirire komutunda, taa kaatumba jo ogorore mo eembuanaua miijuma, nde eembuineji tade ekeruashi.

⁴⁹ Ano otsho uo ngaa ngii natshi kara po keshuriro rjuujuni. Aajengeli onaa ja, taa joorora mo aauineji mu mba ju uka.

⁵⁰ Ja ke ju umbire meziko rjomuriro, mu namu kara eriragano nehikokoto rjomeego.

⁵¹ Mu uvite ko tuu adishe doka? Jo taa ti: Ee.

⁵² He ta ti: Ano keshe tuu omunongo guomambo, ngu a nongonokerua otshirongo tsheguru, okua fa muene guegumbo, ngu ta kuca meriko rje otshipe notshikuru.

Jesus mu Nazaret

⁵³ Nde opua ningi, Jesus sho a mana okupopja omeere ngaka, ta zi po mpoka.

⁵⁴ H’ote ja motshirongo tshaandjauo, nde ta rongo aantu meesinagoga dauo. Jo ja ri nduno ja kumua ko keehapu de, taa ti: Uunongo ua tja ngiino neenkondo do miironga iikumisi oda zi peni?

⁵⁵ Ke shi nani omuna guomurongi guiiplanki? Hina ke shi Maria? Naamuahina kaa shi Jakobus na Josef na Simon na Judas?

⁵⁶ Naamuahina aakiintu ha jo mbeja pu sse? Ajishe mbika oje mu zira peni?

⁵⁷ Jo ja ts’ondumbo na he. Jesus h’ota ti: Omuprofeti ke na mpo ta simanekua unene, ndere motshirongo tshaandjauo no megumbo rje nande tshidira.

⁵⁸ Mpoka ano ina ronga iirongankondo ojindji, oshoka kaa nehiteero nande.