Mateus 12 - Etestemente Epe ✠ 1951

ONTOPORUA 12. Esabata rjaajuda

¹ Esiku rimue, mesabata, Jesu okue ende momapja. Aarongua je oja ri ja s’ondjara, taa teja iirja, jo taa ji ri.

² Aafariseji sho je tshi mono, oje mu rombuere: Tara, aarongua johe taa ningi, shi inatshu uka okuninga mesabata.

³ Ndere he ta ti ku jo: Inamu resha nani, David shi a ningire, sho a s’ondjara na keshe ngu a ri na he?

⁴ Sho a hi montempeli ha Karunga, nde ta ri eemboroto eendjapuki, e di indikua okurja, he muene najeshe mba ja ri na he; aapristeri ojo ike taa di ri.

⁵ Nenge inamu resha mompango, aapristeri mesabata taa togo evururuko rjesabata montempeli, nde kaa nondjo?

⁶ Andi mu rombuere ano: Gumue e ri po, e vure ontempeli.

⁷ Ngeno kua mua dimburura, shi tsha tja: Onda ara esiroshenda, ha magano, ando inamu tokora aantu, mba kaa nondjo, tshivarerue.

⁸ Oshoka Omuna guOmuntu ohe muene guesabata.

⁹ Sho a zi po mpoka, okue ja mosinagoga hauo.

¹⁰ Nde tara, mpaka opua ri pu nomuntu e neke rja remana. Oje mu pura: Otshu uka tuu okupanga mesabata? opo ja tshiue okumupopa.

¹¹ Ndere he ta ti: Ore mokati keni e nonzi himuike, nde tahi guire momucima mesabata, ite hi kuata e hi shire mo ando?

¹² Nani omuntu ke vure unenenene po onzi? Ano otshu uka tuu okuronga uuanaua mesabata.

¹³ H’okua ti komuntu ngu: Ukiririca eke rjohe! H’ote rju ukiririca, rjo orje eruka nokuri rja f’ekuauo.

¹⁴ Aafariseji taa hi, jo taa kundacana, kutja, otaa mu dipaga ngiini.

¹⁵ Jesus okue tshi dimburura, he ta zi po mpoka, nde ojendji taa mu randura, he te je erukica ajeshe.

¹⁶ Nde te ja rombuere, kaa mu epurure.

¹⁷ Opo tshi ningue shi tsha popiua komuprofeti Isaias, ta ti:

¹⁸ Tara, mupija guandje, ngu nde mu ogorora, muorike guandje, ngu ta njanjuda omuenjo guandje. Nda ara ndi mu ture ombepo handje mu he, he ta ku uvicira aantu shi tshu uka.

¹⁹ Ita ku umana, h’ita ka jogerera, kapena ngu ta ku uva eui rje meendjira.

²⁰ Onenge, ndji ha shuanduka, ite hi teja po, nonjeka, ndji ha ara okudima, ite hi dimi po ciru, manka inu ukica ehuko kesindano.

²¹ Iirongo onaji inekere edina rje.

Aafariseji taa tsheke Jesus

²² Petango ndika okue eterua po omuntu, e nombepo ombuineji, ke uete ko, he a sit’eui; h’ote mu erukica a thiue okupopja nokumona ko.

²³ Aantu ajeshe jo ja rurirua unene, jo taa ti: Ngu ke shi nani omumua David?

²⁴ Aafariseji oje tshu uvu, nde taa ti: Ngu ota tidica mo eembepo eembuineji na Belsebub ike, erenga rjeembepo eembuineji.

²⁵ Jesus ta dimburura omadiradiro gauo, nde ta ti ku jo: Keshe tuu otshirongo tshi inena ondumbo tshojene, otatshi shanagurua, nomukunda negumbo tuu keshe ri inena ondumbo rjojene, itari kara po.

²⁶ Ano satana, nge ta tidica satana, nena oku nondumbo na he muene. Ano otshirongo tshe otatshi ka kara po ngiini?

²⁷ Ngaje ng’otandi tidica mo eembepo eembuineji ku Belzebub, nani aana jeni otaa di tidica mo ku re? Ojo ano taa ka ninga aapanguri jeni.

²⁸ Ndere ng’otandi tidica mo eembepo eembuineji nOmbepo ha Karunga, nena otshirongo tsha Karunga otshe ja ku ne.

²⁹ Nenge omuntu ota vuru ngiini okuha megumbo rjomunankondo a jake mo iinima ja mo, ng’ina manga tango omunankondo ngu? Te ja ta ru po egumbo rje.

³⁰ Ngu ke ri na ngaje, ota ts’ondumbo na ngaje; ngu ita gongere na ngaje, ota sharakanica po.

³¹ Ano otii mu rombuere: Uurunde netsheko arishe otari diminua po aantu, ndere etsheko rjo mOmbepo Ondjapuki itari diminua po, tshivarerue.

³² Omuntu ngu ta popi ohapu ha toga Omuna guOmuntu, ota ka diminua po, ndere ngu ta popi ohapu ha toga Ombepo Ondjapuki, ita diminua po nand’omuujuni uonena nenge mu mbuja tau ja.

³³ Oparekeni omuti mumue niihimati jago nenge nigirikeni omuti mumue niihimati jago, oshoka omuti otagu dimbururua kiihimati jago.

³⁴ Rudi ruomapiri ne, otamu vuru ngiini okupopja naua, manka ne mu ri aauineji? Oshoka okana otaku popi shi tshi ri momutima otshindji.

³⁵ Omuntu omuanua oha zica mo uuanaua muuindji uuanaua, ndere omuntu omuineji oha zica mo uuineji muuindji uuineji.

³⁶ Ano otii mu rombuere: Aantu otaa ka purirua mesiku rjepanguro keshe tuu ohapu, ndji ha popiua kahi notshironga.

³⁷ Oshoka omeehapu dohe to tokorua, ng’u uka anuua; tsh’otsho to tokorua meehapu dohe, ng’omusama.

³⁸ Aanongo jamue jomambo naafariseji oja ti ku he: Muhongi, otua ara tu mone edidiriko rimue ku nguee.

³⁹ Ndere he ta jamukura ta ti: Orudi oruineji rua nik’ehondero, otaru kongo edidiriko, ndere itari ru ningirua, shira edidiriko ndija rja Jona omuprofeti.

⁴⁰ Ngashi Jona a ninga omasiku gatatu, uusiku nomutenja mepunda rjoshi, otsho uo Omuna guOmuntu ta ka kara meni rjevi omasiku gatatu.

⁴¹ Aarumentu jo mu Ninive otaa ka cikama mepanguro norudi nduka, jo je ru tokore, oshoka oji idirurura omeehapu da Jona. Ndere tara, mpaka opena gumue e vure Jona.

⁴² Omukuaniirua omukiintu guo kuumbugaantu ote ke ja norudi nduka mepanguro, e ru tokorere ondjo; okua za keesha duujuni okupuakena uunongo ua Salomon; ndere tara, mpaka opena gumue e vure Salomon.

⁴³ Ombepo ombuineji, nge ha tidua mo momuntu, ho otahi endagur’ike nduno meembuga, hi konge evururuko, ndere itahi ri mono.

⁴⁴ Nena otahi ti: Onda ara ndi tshune metsari rjandje, mu nda zire. Ho otahi ja, nde tahi ri ada ri ri ouara, rja jerekua notshikombe, rjo rjo oparekua.

⁴⁵ Nde tahi hi, ho otahi icana eembepo eembuineji uunuaari di iri, di hi vure, do otadi hi mo nokukara mo, nde iinima joshugunina jomuntu ngu otaji ningi iihineji ji vure po mbijaka jotango. Otsho tatshi ningirua orudi nduka oruineji.

Aakuauo ja Jesus

⁴⁶ Manka ta popi naantu, tara, hina naamuahina oja ri ja cikama pondje, jo ja ara je mu kunde.

⁴⁷ Gumue ano te mu rombuere: Tara, njoko naamuanjoko oja cikama pondje, jo otaa ku kongo.

⁴⁸ Ndere he ta jamukura, ta ti ku ngu te tshi mu rombuere: ore meme n’ore mumuameme?

⁴⁹ H’otu ukiririca eke rje kaarongua, nde ta ti: Tareni po meme naamuameme mpo.

⁵⁰ Oshoka keshe tuu ngu ta rongo eharo rja Tate ngu e ri meguru, ohe mumuameme omurumentu nomukiintu na meme.