Mateus 11 - Etestemente Epe ✠ 1951

ONTOPORUA 11. Jesus na Johannes omutshatshi

¹ Opua ningi, Jesus sho a mana omarongo gaarongua je omurongo na jaari, okua zi po mpoka a ku uvice meemukunda nomiihende jado nokudironga nehuvico.

² Ndere Johannes, sho tu uvu meemango iironga ja Kristus, h’ota tumu ko jaari jo maarongua je je mu pure:

³ Ja tje: Onguee tuu onakuja nenge natu tegerere natango gumue a hiri?

⁴ Jesus te ja jamukura: Indeni ano mu ke epururire Johannes, shi mu uva na shi mua mona.

⁵ Aaposi oje uete ko, iirema otaa hende, mba jotshirundu otaa jere, mba ja sit’omakutsi, oje uvite ko, aasi otaa jumuka, eehepere otadi uvicirua evangelium.

⁶ Omunerago ongu ina ts’eembata na ngaje.

⁷ Manka taa hi, Jesus h’oto okororere aantu Johannes, ta ti: Ne omu ire nani mombuga mu ka tare tshee? Onenge ndji tahi dunguadungua kombepo?

⁸ Nenge omu ire okumona tshike? Ngiik’omuntu a zara eenguuo eenenguni? Nde tareni ano, mba je neenguuo eenenguni, oje ri momagumbo gaakuaniirua.

⁹ Nenge omui ire mu ka tare omuprofeti? Ee, andi mu rombuere kutja ngu e vure nomuprofeti.

¹⁰ Oshoka nguka ohe ngu a tshangererua, taku ti: Tara, otii tumu omujengeli guandje komesho gohe, ngu te ku parere ondjira hohe.

¹¹ Tshiri, andi mu rombuere, mokati kaantu, mba ja varua kaakiintu, inamu za gumue e vure Johannes omutshatshi; ndere nduno, omutshutshu guo motshirongo tsha Karunga ohe e mu vure.

¹² Ndere okuza komasiku ga Johannes sigo onena otshirongo tsheguru otsha kondjerua, jo mba taa kondjo, ojo taa tshi shirire ku jo.

¹³ Oshoka aaprofeti ajeshe nomambo sigo mu Johannes oje tshi shunganek’ike.

¹⁴ Na ne, nge mua ara mu tshi iteere: ohe muene oElias, ngu e nokuja.

¹⁵ Ngu e nomakutsi gokupuakena, na puakene.

¹⁶ Orudi nduka nani orua fa re? Otaru erekua tuu naanona ja kaatumba potshirandero, taa kundacana na jakuauo muudano, taa ti:

¹⁷ Otue mu shikira eembendo, ndere inamu dana, tua rira eenkari, ndere inamu rira uo.

¹⁸ Johannes okue ja, h’ina rja, h’ina nua, ndere taa ti: oku nondemoni.

¹⁹ Omuna guOmuntu okue ja, he ta ri, he ta nu, ndere taa ti: tareni, ohe ha diragura, he ha korua komavinju, he okuume kaafenderi no kaarunde: Miironga jauo uunongo otau dimbururua anuua ouotshiri.

²⁰ Tsh’otsho a shimbike okuganda eemukunda, di da ningirua iirongankondo ojindjijindji, ndere do inadi idirurura.

²¹ Ojeeje, nguee Korozain, jeeje nguee Betsaida, ngeno kua iirongankondo ja ningirua Tirus na Sidon, mbi mua ningirua ne, ando ji idirurura nare noshako nomutoko.

²² Andi mu rombuere nduno: Tirus na Sidon otaji ka mona egeero kari shi edigu nga ndika rjeni mesiku rjepanguro.

²³ Na nguee, Kafarnaum, ino jerucua nani sigo okeguru? Sigo oomuija moheri to ningirua. Oshoka ngeno kua iironga iikumisi ja ningirua Sodoma, mbi ua ningirua ngueje, ando ja mo ja kara naua sigo okesiku rjonena.

²⁴ Andi mu rombuere nduno: Otshirongo tsha Sodoma itatshi ka mona egeero edigu nga ndika rjohe mesiku rjepanguro.

²⁵ Petango ndika Jesus okua ti: Otii ku amberere, Tate, Muene gueguru nevi, oshoka aanongo neenkurungu oue tshi jo orekera, ndere ue tsho ororera mba aashupi.

²⁶ Eno, Tate, otsho tsha ri tshu uka pu nguee.

²⁷ Ajishe nda peua ku Tate: kapuna ngu e tshi Omona, Tate oh’ike tuu, na kapena ngu e tshi Tate, Omona oh’ike, na nguka Omona a hara nduno e tshi mu okororere.

²⁸ Ireni ku ngaje amushe, mbo mua pjakidirua, ne mu umbatekua uudigu, nde ngaje otii mu tarareke.

²⁹ Itsikeni ondjoko handje, ne mu orere ndje, oshoka ondi nombiri nomutima gui itshonopeka. Tamu ka mona evururuko rjeemenjo deni.

³⁰ Oshoka ondjoko handje ombuanaua, gu’omutenge guandje omupu.