Mateus 10 - Etestemente Epe ✠ 1951

ONTOPORUA 10. Etumo rjaapostoli

¹ H’okua gongere aarongua je omurongo na jaari, te ja pe eenkondo ja tide mo eembepo eembuineji, jo ja pange uuvu niigombo ji iri.

² Omadina ga mba omurongo na jaari ogo ngaa: Gotango oSimon, ngu a rukirue edina Petrus, nomumuahina Andreas.

³ Jakobus na Zebedeus nomumuahina Johannes, Filipus na Bartolomeus, Tomas na Mateus omufenderi, Jakobus na Alfeus na Tadeus.

⁴ Simon omukananeji na Judas Iskariot, ngu e mu orora.

⁵ Oomboka omurongo na jaari Jesus e ja tumu, he te ja rombuere: Inamu ha mondjira haapagani, n’inamu ha meemukunda daasamarita.

⁶ Ndere indeni keenzi di da kana maandjaa Israel.

⁷ Nge tamu hi ko, uviceni mu tje: Otshirongo tsheguru otsha ada popepi.

⁸ Pangeni aavu, jumudeni aasi, jerekeni mba je notshirundu, ne mu tide mo eembepo eembuineji; omue tshi peua otshari, ano na ne uo gandjeni otshari.

⁹ Inamu kara mu niingoldi niisilveri niimariua ji iri meendjepera deni.

¹⁰ Inamu ha uo nompunda mondjira neenguuo mbaari neengaku nokoondje, oshoka otshu uka, omurongi a peue iiparuca je.

¹¹ Mpo tamu hi, nand’omeemukunda nenge omiihende, omu idunga ngu e ri mo a simana, opo mu ka kare sigo otamu engene ko komesho.

¹² Nge tamu hi megumbo rimue, popjeni ekundo ndika Ombiri nahi kare megumbo ndika.

¹³ Egumbo ndioka ng’orje h’oparera, ombiri heni otahi ri nambere ngaa; ndere ng’inari h’oparera, ombiri heni otahi tshuna ngaa ku ne.

¹⁴ Keshe tuu ngu ine mu tuumba, he itu uvu eehapu deni: zii mo megumbo rje nenge momukunda, ne mu ipupure ontsi keempadi deni.

¹⁵ Tshiri, otii mu rombuere: Otshirongo tshaasodomiita no tshaagoromiita itatshi mono egeero edigu mesiku rjepanguro ngashi otshirongo tshika.

¹⁶ Tareni, andi mu tumu mua f’eenzi mokati komambungu. Ano kareni eenkurungu mua f’omajoka, ne mu kare nekoto mua f’eenguti.

¹⁷ Ndere angareni aantu, oshoka otaa ke mu gandja kiingongi jepanguro, jo otaa ke mu denga neengora meesinagoga dauo.

¹⁸ Tamu ka farua komarenga no kaakuaniirua morua ndje, mu epurure ku jo no kaapagani.

¹⁹ Ndere nge taa mu pangura, inamu mbandara shi tamu ka jamukura na shi tamu ka popja, oshoka petango ndika otamu ka rombuerua ngaa shi tamu popi.

²⁰ Ha ne mba tamu popi mpoka aaue, Ombepo ha Sho tuu, ngu ta ka popja mu ne.

²¹ Taku ningi, omumuahina ta gandja mumuahina a se, he she ta ka gandja omona, jo aanona otaa ka kondjica aakuruntu je ja dipage.

²² Ne otamu ka tonderua ku ajeshe edina rjandje; ndere ngu ti ididimike sigo okusa, ohe ta ku upicua.

²³ Nge taa mu tidagura momukunda nguka, indeni ondapo mu ngu gu iri. Tshiri, otii mu rombuere: itamu shurica okutara eemukunda adishe daaisrael, sigo Omuna guOmuntu te ke ja.

²⁴ Omurongua ke vure omurongi, h’omupija ke vure muene gue.

²⁵ Omurongua okua guanica, nge e ri ngashi omurongi, tsh’otsho omupija ku muene gue. Muene guegumbo, nge a tiua oBelzebub, matsa ng’aantu ja mo nduno and’ongiini?

²⁶ Ano inamu ja tira, oshoka inapu orekua tsha, shi itatshi ko oroka uo, itapu ningua tsha muuii, shi itatshi ka tshiuika uo.

²⁷ Shi tandi mu rombuere meemurema, tshi popjeni muujerere; shi tamu pupu nomakutsi, tshu uviceni meendundu.

²⁸ Inamu tira mbeja, mba taa dipaga orutu, jo itaa vuru okudipaga omuenjo, ndere tireni ngoka ta vuru okuumbira orutu nomuenjo miishuna jomuriro.

²⁹ Nani omandjua gaari itaga randua nepeni rimuike, ndere itaku guire poshi nando rimuike po, Sho ng’ine tsha ara.

³⁰ Nomafufu go meemutse deni ageshe oga jarurua.

³¹ Ano inamu tira; ne omu vure omandjua ogendji.

³² Keshe ngu ta ko okorora ndje paantu, na ngaje uo onda ara ndi mu okorore pu Tate, ngu e ri meguru.

³³ Ndere ngu ta ki idimbikira ndje paantu, na ngaje uo onandi mu idimbikira pu Tate, ngu e ri meguru.

³⁴ Inamu tja, ngaje onde ja ndi etere uujuni ombiri, aaue, inandi ja ndi ete ombiri, aaue, matsa egongamuere tuu.

³⁵ Oshoka onde ja okueta ondumbo pokati komumati na she, pokati komukadona na hina, pokati kotshitenja na hinamueno.

³⁶ Jo aantu jo megumbo otaa ningi aatondi ja muene guegumbo.

³⁷ Ngok’e hore she na hina komesho gandje, he ino oparera ndje; h’otsho ino oparera ndje, ngu e hore omona omumati nenge omukadona komesho gandje.

³⁸ Ngok’iti itsike omutshigakano gue, he ina randura ndje uo, ohe ino oparera ndje.

³⁹ Ngu a hara i irikorere omuenjo gue, ote ke gu kanica po; ngu ta kanica omuenjo gue morua ndje, ohe te ke gu mona.

⁴⁰ Ngu te mu jakura, ngaje ohe ta jakura ndje; ngu a jakura ndje, ohe ta jakura nguija, ngu a tuma ndje.

⁴¹ Ngu ta jakura omuprofeti moru uuprofeti ue, ota ka peua ondjambi homuprofeti; ngu ta jakura omujapuki moru ehuko rje, ota ka peua ondjambi homujapuki.

⁴² Ngu ta p’omunuunuka gumue mu mboka nando okapamba komeja omatarara gokunua moru edina rjomurongua, tshiri, otii mu rombuere, he ita ka kara ouara ina peua ondjambi he.