Mateus 1 - Etestemente Epe ✠ 1951

ONTOPORUA 1.

¹ Embo rjezimo rja Jesus Kristus, Omumua David, ngu omumua Abraham.

² Abraham okua vara Isaak, Isaak ta vara Jakob, nde Jakob ta vara Judas naamuahina.

³ Judas ta vara Fares na Zara omu Tamar, nde Fares ta vara Esron, nde Esron ta vara Aram.

⁴ Aram ta vara Aminadab, Aminadab ta vara Nason, nde Nason ta vara Salmon.

⁵ Salmon ta vara Booz omu Rahab, Booz ta vara Obed omu Rut, Obed ta vara Jesse, nde Jesse ta vara David omukuaniirua.

⁶ David omukuaniirua ta vara Salmon omomukiintu gua Urias.

⁷ Salmon ta vara Roboam, Roboam ta vara Abias, nde Abias ta vara Asa.

⁸ Asa ta vara Josafat, Josafat ta vara Joram, nde Joram ta vara Ozias.

⁹ Ozias ta vara Johatam, Johatam ta vara Akaz, nde Akaz ta vara Ezekias.

¹⁰ Ezekias ta vara Manases, Manases ta vara Amon, nde Amon ta vara Josias.

¹¹ Josias ta vara Jekonias naamuahina perara rjetembukiro ku Babilon.

¹² Konima hetembukiro ku Babilon Jekonias ta vara Salatiel, nde Salatiel ta vara Zorobabel.

¹³ Zorobabel ta vara Abiud, Abiud ta vara Eliakim, nde Eliakim ta vara Azor.

¹⁴ Azor ta vara Sadok, Sadok ta vara Akim, nde Akim ta vara Eliud.

¹⁵ Eliud ta vara Eleazar, Eleazar ta vara Matan, nde Matan ta vara Jakob.

¹⁶ Jakob ta vara Josef, ngu omurumentu gua Maria, ngu a vara Jesus, ti icanua Kristus.

¹⁷ Ano omazimo ageshe okuza ku Abraham sigo David ogo omazimo omurongo na gane; okuza ku David sigo etembukiro ku Babilon omurongo na gane; okuza ketembukiro sigo Kristus omurongo na gane.

Okuvarua kua Jesus

¹⁸ Okuvarua kua Jesus okue epururua ngii: Hina he Maria, sho a ri a henderua ku Josef, okua dimbururua, manka inaa ha puamue, nokutja ohe omusimba nare kOmbepo Ondjapuki.

¹⁹ Ndere Josef, omurumentu gue, morua shi a ri h’u uuka, h’ina ara a popirue neji, ota diradira e mu rareke mofuci.

²⁰ Nde manka ta diradira ngii, tara, omujengeli gua Muene okue mu orokere mondjodi, ta ti: Josef, omumua David, ino tira okueta Maria, omukiintu guohe ku ngueje, oshoka shi tsha tshitirua mu he, otsha za kOmbepo Ondjapuki.

²¹ He ota ka vara okamati, nde nguee to mu ruku edina Jesus, oshoka ota ka kurira orudi rue keendjo daruo.

²² Ajishe mbi oja ningua, opo tshi guanicue po, shi tsha popiua ku Muene momuprofeti, ta ti:

²³ Tara, omukadona ota ka tuumba, he ta ka vara omona omumati, otaa mu ruku edina rje Emanuel, nokutja Karunga puamue na sse.

²⁴ Josef ano, sho a penduka meemposi, okua ninga ngashi omujengeli gua Muene e mu rombuera, nde te eta omukiintu gue maandje.

²⁵ Ndere ine mu dimburura, manka ina vara omona otsheeri tshe. H’ote mu ruku edina Jesus.