Markus 9 - Etestemente Epe ✠ 1951

ONTOPORUA 9. Jesus ta adimicua.

¹ Omasiku kanekamue sho ga piti po, Jesus okua kuca Petrus na Jakobus na Johannes, nde ta hi na jo oj’ike kondundu onde, ji ikarere. H’ota tshituka momesho gauo.

² Eenguuo de oda jererere, do da toka da f’omeegerekapen’omujerici komband’evi, ngu ta vuru okujerica ngii.

³ Mpo opo oroka Elias na Moses, taa kunducana na Jesus.

⁴ Nde Petrus ta shimbike okupopja, ta ti ku Jesus: Muene, mpaka op’uuhanaua mpa. Tua ara tu tunge eendunda ndatu, himue hohe, himue ha Moses, onkuauo ha Elias.

⁵ Ndere he okua ri ke tshi shi ta popi, oshoka oja ri ja fa taa handuka.

⁶ Otshikogo otshe ja, tashi ja ningire omudire, nde motshikogo tamu uvika mo eui, tari ti: Nguka Omumuandje omuorike unene. Mu uveni.

⁷ Naangashiingika sho ja regarega, inaa mona tsha ue, Jesus oh’ike puamue na jo.

⁸ Mokurondoroka ko kondundu, Jesus h’ote ja rombuere, kaa rombuere nando omuntu shi ja mono, sigo Omuna guOmuntu a jumuka kuusi.

⁹ Jo otaa pungura ohapu ndjika meemuenjo dauo, nde taa puracana: Okutja ngiini, sho ta ti: sigo okua jumuka kuusi?

¹⁰ Jo otaa mu pura, taa ti: Otshike nduno aafariseji naanongo jomambo taa ti: Elias one ja tango?

¹¹ H’ota jamukura: Tshiri, Elias one ja tango a ka tungurure ajishe, ngashi pua tsangerua uo Omuna guOmuntu, kutja he ta ke epekua unene, he ta tondiua.

¹² Ndere ngaje otii mu rombuere: Elias okui ire uo, ndere oje mu ningire shi ja arere, ngashi a tshangerua.

Aapostoli ja njengua okueruda.

¹³ Sho kue ja kaarongua je, okua mono aantu ojendji pu jo, naanongo jomambo uo, taa patacana.

¹⁴ Ndere aantu ajeshe, sho ja mono Jesus, oja kumua ko, ja tira, nde taa hi ku he je mu popice.

¹⁵ H’ote ja pura: Otamu patacana tshike?

¹⁶ Nde gumue mokati kaantu ta jamukura, ta ti: Muongi, onde eta mumuandje ku nguee, oku nombepo ombuineji ha mutika.

¹⁷ Apeshe mpo tahi mu kuata, ho tahi mu shata po uo; etutu tari piti mokana, ti ikokoto omeego, he ta kukuta. Onda rombuere aarongua johe, je hi tide mo, ndere oja njengua.

¹⁸ H’ota jamukura, ta ti ku jo: Rudi karu nehiteero, sigo uunake nandi kare pu ne, sigo uunake tii mu tar’onteni? Mu eteni hu ku ngaje.

¹⁹ Jo oje mu eta po. Nd’ombepo ombuineji sho ha mono omumati, ohe mu shiragura, ngu ti ishata poshi, nde ta garangata, etutu tari zi mokana.

²⁰ H’ota pura she: Okua ninga omasika gangapi, sho tshe mu ada po? He ta ti: Okuza kuunona ue.

²¹ Orundji okui ihumbire momuriro no momeja. Nge to vuru tsha, tu kuaca ngueje u tu siroshenda.

²² Nde Jesus ta ti ku he: To ti: nge to vuru tsha. Ng’otu iteere, ito njengua ku tsha.

²³ Nopo mpo she homumati ti igida, ta ti nomoodi momesho: Ondi iteera, Muene, kuaca okuhahiteera kuandje.

²⁴ Nde Jesus sho a mono, aantu taa ja taa ningi ojendji, okua ganda ombepo ombuineji, nde ta ti ku ho: Mbepo ngueje egoua ndji ha mutika, otii ku rombuere, za mo mu he, ngueje ino ha mo ue mu he nandoodiro.

²⁵ H’otahi igida, tahi mu shiragura neenkondo, nde tahi zi mo mu he, nde omumati ta ningi a fa a sa, notsho ojendji ja ti: okua sa.

²⁶ Jesus h’ote mu kuata keke, te mu jeruca, h’ota cikama.

²⁷ Sho a ciki kegumbo, aarongua je je mu pura, sho ja ri po oj’ike: Otshike matsa sse tua njengua okuhitida mo?

²⁸ He ta ti ku jo: Orudi nduka otaru tidua mo ike momagarikano nehidiriko rjiikurja.

Jesus ta shunganeke itshee omeepeko.

²⁹ Jo otaa zi ko hoka, nde taa pitire mu Galilea, he ina ara aantu je tshu uve.

³⁰ He ta rongo aarongua je, ta ti ku jo: Omuna guOmuntu ona gandjua miikasha jaantu, jo taa mu dipaga, nde ta jumuka konima homasiku gatatu.

Aarongua taa patacanene omashara.

³¹ Nde kaa huvite ko ohapu ndjika, ndere oja tira okumupura.

³² Jo oje ja mu Kafarnaum. Sho ja ri megumbo, h’ote ja pura: Omua kundacana tshike mondjira?

³³ Jo otaa muena, oshoka mondjira oja patacana, nokutja ore e vure mukuauo mokati kauo.

³⁴ Ta kaatumba, ti icana mbeja omurongo na jaari, nde ta ti ku jo: Ngu a hara a ninge guotango, na ninge omushugunini, oh’omupija guajeshe.

³⁵ H’ota kuca omunona, te mu cikameke mokati kauo, te mu uukata momooko ge, nde ta ti ku jo:

³⁶ Ngu ta tuumba gumue guaanona mbo medina rjandje, h’ota tuumba ndje, nde ngu ta tuumba ndje, ita tuumba ngaje muene, aaue, ohe tuu ngu a tuma ndje.

³⁷ Naangashiingika Johannes ta ti: Muongi, otua mono omuntu, ta tida mo ondemoni medina rjohe, nde sse otue tshi mu indike, oshoka ine tu randura.

³⁸ Nde Jesus ta ti: Aaue, inamu mu kerera, oshoka kakuna nand’ogumue ta rongo otshirongankondo medina rjandje, nde ta hi a popje ndje neji.

³⁹ Oshoka ngu ke nondumbo na sse, oku ri uo puamue na sse.

⁴⁰ Ngu te mu pe okapamba komeja gokunua moru edina rjandje, oshoka one ja Kristus, tshiri, andi mu rombuere, ita ka kara ouara, ina peua ondjambi he.

Uudigu uepukico.

⁴¹ Ndere ngu ta rengica kamue ka mbu uutshona, mbu tau iteere ndje, ngeno oshuepo, ng’okuaje ngu ta mangerua omumanja kocingo he, nde te ekerua mefuta.

⁴² Eke rjohe nge tari ku rengica, ri keka ko, oshoka okuha momuenjo guarushe otshitimbu otshe ku oparera tshi vure okuumbirua moheri, momuriro kagu dima u nomake gaari.

⁴³ Moka ezinjo itari si, go omuriro kagu dima.

⁴⁴ Ompadi hohe nge tahi ku rengica, hi keka ko, oshoka okuha momuenjo guarushe otshirema otshe ku oparera tshi vure okuumbirua moheri, momuriro guarushe u neempadi mbaari.

⁴⁵ Moka ezinjo itari si, go omuriro kagu dima.

⁴⁶ Esho rjohe nge tari ku rengica, ri tsipura mo, oshoka okuha motshirongo tsha Karunga u nesho rimuike otshe ku oparera tshi vure okuumbirua momuriro guoheri u nomesho gaari.

⁴⁷ Moka ezinjo itari si, go omuriro kagu dima.

⁴⁸ Oshoka keshe tuu omuntu ota toua nomuriro, ngashi keshe tuu egano otari toua nomuongua.

⁴⁹ Omuongua omuanaua, ndere omuongua nge tagu z’uururu uago, otamu gu touorora na tshike: Kareni mu nomuongua mu ne, ne mu kare uo mu nombiri mokati keni.