Markus 8 - Etestemente Epe ✠ 1951

ONTOPORUA 8. Jesus ta kutica itshee aantu mombuga.

¹ Momasiku ngaka aantu ojendji oja gongara itshee, nde kaa na shi taa ri. H’oti icana aarongua je ku he, nde ta ti ku jo:

² Aantu mbono onde ju uvitire esiroshenda, oshoka omasiku gatatu oja kara pu ngaje, ndere inaa rja tsha.

³ Nge tandi ja rareke, ja he komagumbo gauo inaa rja tsha, otaa ka sa kondjara mondjira, oshoka jamue oja za kokure.

⁴ Aarongua je taa mu jamukura: Openi tapu monikua muka mombuga omboroto okujakutica?

⁵ H’ote ja pura: Omu neemboroto ngapi? Jo taa ti: Uunuaari.

⁶ H’ota rombuere, aantu ja kaatumbe poshi. Nde ta kuca eemboroto uunuaari di, ta pandura, te di pambura, te di pe aarongua je, je di gandje. Oje di pa aantu.

⁷ Oja ri uo nuushi uutshona, he te u jambeke uo, je u ja toporere.

⁸ Jo otaa ri, taa kuta, taa toora uupambu mbu u upa ko, iimbare uunuaari.

⁹ Mba ja rja, oja ri pomajovi gane, nde te ja rareke.

Jesus ta ganda aafariseji.

¹⁰ Naanzija mpo okua ta rondo mosikepa puamue naarongua je, nde ta hi motshirongo tashaadalmanuta.

¹¹ Aafariseji oje ja, taa tameka okuts’ondumbo na he nokukonga edidiriko tari zi keguru, opo je mu makere.

¹² Nde he ta jemata komuenjo, ta ti: Otshike orudi nduka taru kongo edidiriko? Tshiri, andi mu rombuere: Orudi nduka itaru peua edidiriko nandookuri.

¹³ H’ote ja cigi po, ta rondo mosikepa, nde ta taaguruka haandijaka.

¹⁴ Ndere oja dimbua okuha neemboroto, jo ja ri ike nomboroto himuike mosikepa.

¹⁵ H’ote ja kumagida, ta ti: Tareni, ne mu angare ontaku haafariseji nontaku ha Herodes.

¹⁶ Jo otaa diradira, taa kundacana: Otsho ta popi, oshoka katu neemboroto.

¹⁷ Nde Jesus ta dimburura shi, he ta ti ku jo: Otshike tamu idiradira shi, sho kamu neemboroto? Nanena inamu kotoka, ne kamu neendunge natango? Natango eemuenjo deni oda kukuta?

¹⁸ Ndi tshi, omesho omu ga na, ndere kamu uete ko, nomakutsi omu ga na, ndere kamu uviteko? Ne inamu dimburukua ue nani,

¹⁹ Sho nda pamburira aantu omajovi gatano eemboroto ntano; ndere omua toora iimbare iingapi ju uda uupambu? Jo taa ti: Omurongo niijari.

²⁰ Na sho nda pamburira aantu omajovi gane eemboroto uunuaari, omua toora iimbare iingapi ju uda uupambu? Taa ti: Uunuaari.

²¹ H’ota ti ku jo: Ongiini, nanena inamu dimburukua?

Omuposi omubetsaida.

²² Jo je ja ku Betsaida. Aantu oje eta omuposi ku he, taa mu indire, e mu njenge.

²³ H’ota kuata omuposi keke, te mu endica posha homukunda, ta cete omesho ge nomate, te mu tenteke omake ge, nde te mu pura: Ou uete tsha?

²⁴ H’ota rigamene ko nde ta ti: Ondi uete aantu taa hende ja fa eemuti.

²⁵ Ta tura itshee omake komesho ge, naangasiingika okua shimbike okutara naua, nde te eruka, oku uete ajishe.

²⁶ He te mu tumu a he kaandje, ta ti: Ino ha momukunda.

Ehokororo rja Petrus.

²⁷ Jesus h’ota hi puamue naarongua je meemukunda do pu Tsesarea Filipi. Mokuenda ta pura aarongua je, ta ti: Ngaje aantu otaa ti ndje re?

²⁸ Jo otaa jamukura: Onguee Johannes omutshatshi anuua, jamue po ongueje Elias, nde jamue po anuua onguee gumue maaprofeti.

²⁹ Nde ta ti ku jo: Ne amu ti ndje re? Petrus te mu jamukura: Onguee Kristus.

³⁰ Ndere okue ji indike nokuganda, kaa tshi popje nand’okomuntu.

Jesus ta popi omeepeko.

³¹ Nopo tuu mpoka h’okua shimbike okujaronga, nokutja Omuna guOmuntu e nokumona iishuna ojindji nokuekereruashi kaakuruntukuruntu no kaapristeri aakuruntu no kaanongo jomambo nokudipagua nokujumuka konima homasiku gatatu.

³² Ta popi ohapu ndjika, he ina ara okuoreka tsha. Nde Petrus te mu kuca maantu, ta shimbike okumugandera shi.

³³ Ndere he ta piramene ko, ta tara kaarongua ta ganda Petrus, nde ta ti: Za po pu ngaje, oshoka ngueje ito diradira shi tsha Karunga, aaue, otshaantu ike.

³⁴ Mpoka mpo ti icana aantu naarongua je engene ku he, nde ta ti ku jo: Ngu a hara a ninge omurongua guandje, ni itsike omutshigakano gue, he a randure ndje.

³⁵ Oshoka omuntu ngu a hara a hupice omuenjo gue, ote gu kanica, nde ngu ta kanica omuenjo gue morua ndje no moru evangelium, ote ke gu upica.

³⁶ Oshoka otatshi kuaca tshike omuntu, nge ti irikorere uujuni aushe, nde nani komuenjo gue ta mono iishuna.

³⁷ Nenge omuntu ota vuru okugandja tshike a rande omuenjo gue?

³⁸ Oshoka omuntu, ngu a s’oshoni morua ndje no moru eehapu dandje miipaci jorudi nduka rua nik’oruondero nuurunde, tshiri, nOmuna guOmuntu uo ota ka s’oshoni moru omuntu ngu, nge te ke ja mehadimo rja She puamue naajengeli naajapuki.

³⁹ Nde ta ti ku jo: Tshiri, otii mu rombuere, jamue ja mboka ja cikama mpaka, itaa ka makera okusa sigo otaa ka mona otshirongo tsha Karunga, nge tatshi ja neenkondo datsho.