Markus 7 - Etestemente Epe ✠ 1951

ONTOPORUA 7. Eemukaro zaajuda tadi popiua.

¹ Aafariseji naanongo jomambo jamue, mba ja zi ku Jerusalem, oji igongere pu Jesus,

² Nde je uete aarongua je jamue taa kuata iikurja neenjara inadi jera, kutja inadi koshua tango, jo taa tshi ganda.

³ Oshoka aafariseji naajuda ajeshe kaa rja, ng’inanj’ikosha unene eenjara, nokudiginina ngiino eemukaro eemukuru.

⁴ Tsh’otsho uo kaa rja, nge taa zi kotshirandero, ng’inaa kosha tango orutu. Noku neemukaro odindji di iri, je di peua kaakuru, je di diginine, ngashi tsha tja: okukosha omahoro niitenga neembiga nuuriri.

⁵ Otsho aafariseji naanongo jomambo taa mu pura: Otshike nduno aarongua johe kaa diginina eemukaro eemukuru, nde taa ri iikurja jauo neenjara inadi koshoka?

⁶ Nde he ta jamukura: Notshiri Isaias okua shunganekere eehapu da tsa ne, ooneruado, ngashi kua tshangua: Otshiguana shika otatshi simaneke ndje ouara neemurungu, ndere eemuenjo dauo odi ri kokure na ngaje.

⁷ Taa karere ndje ouara, oshoka otaa rong’ike omarongo neempango daantu.

⁸ Oshoka manka tamu dini otshipango tsha Karunga, otamu diginine eemukaro, di mua cigurura kaantu, ngashi da tja: okukosha omahoro, iitenga nojindji ja fa mbika, tamu ji rongo.

⁹ He ta ti ku jo: Otshipango tsha Karunga otamu tshiua okutsheeca, opo mu diginine eemukaro deni.

¹⁰ Moses okua tire: Simaneka sho na njoko, na ngu ta njana she nenge hina, na se.

¹¹ Ndere ne amu ti: Omuntu, ngu ta rombuere she nenge hina: Korban, nokutja egano rjejapuro orjo ajishe, mbi u nokupeua ku ngaje.

¹² Nena inamu ara ue, a rongere she na hina.

¹³ Nokutja: otamu dimi po ompango ha Karunga neemukaro, di mua cigurura. Tsh’otsho tamu ningi ojindji ja fa mbika.

¹⁴ H’oti icana itshee aantu je engene ko, nde ta ti ku jo: Puakeneni amushe, ne mu uvite ko naua!

¹⁵ Kakuna tsha kombanda homuntu, shi tatshi mu nigirike, nge tatshi hi mu he, aaue, ndere shi tatshi zi mo momuntu, otsho tatshi nigirike omuntu.

¹⁶ Ngu e nomakutsi gokuuva, nu uve ko.

¹⁷ Sho a zi po paantu, nde ta hi megumbo, aarongua je je mu pura ejere ndika.

¹⁸ Nde ta ti ku jo: Na ne kamu nuunongo nani? Kamu uvite ko nani, nokutja ajishe mbi taji zi kondje, nde tahi hi momuntu, itaji vuru okumunigirika?

¹⁹ Oshoka itaji hi momutima gue, aaue, mepunda tuu, jo taji piti mompito ha tshitua, ndji hahi keke iikurja ajishe.

²⁰ He ta ti itshee ku jo: Shi tatshi zi mo momuntu, otsho tatshi nigirike omuntu.

²¹ Oshoka meni, momutima guomuntu tamu zi omadiradiro omiineji, omaagero, uuharu uuineji, omadipagacano.

²² Uufuci, oruisho, joshoni, omajekacano, efupa, omatshekero, uuntsa nuuraji.

²³ Uuineji aushe mbuka ohau zi meni, ouo hau nigirike omuntu.

Jesus Nomukurukadi Omupagani.

²⁴ Okuza hoka okua hi motshirongo tsha Tirus na Sidon, nde ta hi megumbo rimue, h’ina ara, aantu je mu uve, ndere okua njengua okukara mofuci.

²⁵ Mpoka mpo oku uvika komukurukadi, ngu e nomona omukadona, a kuatua kombepo ombuineji, naanzija ta hi, nde ti ishata keempadi de.

²⁶ Omukiintu ngu okua ri omupagani, a varua mu Sirofonitsa. H’ote mu indire a tide mo momona gue ombepo ombuineji.

²⁷ Nde he ta ti: Eca uunona u kuta tango, oshoka inatshu uka okukuca omboroto haanona nokuhuumbira eembua.

²⁸ H’ota jamukura: Eno, Muene uumbuagona ohau ri uo uupambu u’uunona koshi hotshiriro.

²⁹ Nde ta ti ku he: Omoru ohapu ndjika inda, ombepo ombuineji oha za mo momumuohe.

³⁰ Sho e ja megumbo rje, okua ada omukadona a rara mokariri, nd’ombepo ombuineji ha tidua mo mu he.

Omuntu a sit’eui nomakutsi.

³¹ H’okua zi ko itshee keemukunda za Tirus, nde ta hi kefuta rja Galilea nokupitira mu Sidon no motshirongo tsheemukunda omurongo.

³² Mpoka aantu oje eta ku he omuntu a sit’eui nomakutsi, taa mu indire, e mu tenteke eke rje.

³³ H’ote mu kuca maantu, ta tura eemunue de momakutsi ge, ta njenge eraka rje nomate.

³⁴ Ta rigamenica omesho ge keguru, ta keme, nde ta ti ku he: Efeta, kutja, cituruka.

³⁵ Nopo mpo omakutsi ge oga cituruka neraka rje rja manguruka, nde ta popi naua nduno.

³⁶ H’ote ja rombuere, kaa tshe epururire nand’omuntu. Ndere nande e ja kumagida nokuganda, jo taa tsho okorora nokuri.

³⁷ Jo ja kumua ko unenenene, taa ti: Ajishe okue ji ronga naua; mba ja sit’omakutsi, ote ja ningi ju uve ko, na mba ja sit’omaui, ja popje.