Markus 6 - Etestemente Epe ✠ 1951

ONTOPORUA 6. Jesus ta tarere po Nazaret.

¹ Okuza mpoka okue ja motshirongo tshaandjauo. Aarongua je taa mu randura.

² Esiku rjesabata sho rja ciki, okua shimbike okuronga moosinagoga. Ojendji mba je mu uvu, oja kuminua erongo rje, nde taa ti: Ajishe mbi otaji mu zire peni? Uunongo mbu a peua, u cike peni? Niironga iikumici ja tja ngiino, mbi taji rongua komake ge?

³ Ke shi nani omurongi guiiplanki? Omumua Maria? Omumuahina gua Jakobus na Josef na Judas na Simon? Naamuahina aakiintu kaa shi uo mbeja pu sse? Jo ji its’ondumbo na he.

⁴ Jesus ta ti ku jo: Kapena mpoka omuprofeti ta kara ta simanekua, ndere motshirongo tshaandjauo no megumbo rje no mokati kaakuauo nandookuri.

⁵ Mpaka ina pondora okuronga iironga iikumici; aavu aatshon’ike a tenteke omake, nde te ja panga.

⁶ Okua kuminua uukukutu uauo, oshoka kaa nehiteero nande. Ano ta hi meemukunda do muutshiinda a ka ronge.

Jesus ta tumu aapostoli.

⁷ Nde ti icana mbeja omurongo na jaari, ta shimbike okujatuma, jaari na jaari he te ja p’eenkondo dokupangera eembepo eembuineji.

⁸ Te ja rombuere uo, kaa he na tsha mondjira, noroondje rumuike. Ha nompunda, ha notshikuira nenge iimariua mondjato.

⁹ Ndere ja zare keempadi eengaku diipa jouara, ndere inaa zara eehema mbaari.

¹⁰ Nde ta ti ku jo: Apeshe mpo tamu hi megumbo, opo tamu kara sigo tamu engene ko komesho.

¹¹ Ngu ite mu tuumba nenge ite mu uvu: zii po pu he, ne mu pupure ontsi keempadi deni. Tsho tshi ninge otshidimburukico tshauo.

¹² Otsho nduno ja hi, taa huvica nokutja aantu naji itedurure.

¹³ Taa tida mo uo eembepo eembuineji odindji, jo taa guajeke aavu nomaholi, nde taa ja panga.

Okusa kua Johannes taku epururua.

¹⁴ Perara ndika omukuaniirua Herodes okue mu uvu, oshoka edina rje orja ri momakana gaantu ajeshe, nde ta ti: Johannes omutshatshi okua jumuka ando kuusi, tsh’otsho eenkondo eenkumici tadi rongo mu he.

¹⁵ Ndere jamue ja ti: Ohe Elias, nitshee jamue: ohe gumue guaaprofeti.

¹⁶ Ndere Herodes, sho e tshu uvu, okua ti ike: Johannes ngu nde mu kekecire omutse, ohe ngu, okua jumuka kuusi.

¹⁷ He muene, ngu Herodes okua tumine, Johannes a kuatue, a mangue, a hedirue modorongo morua Herodias, omukiintu gua mumuahina Filipus, oshoka okua ri e mu okana.

¹⁸ Johannes okua ha rombuere Herodes: Ito pitikua nande u kare nomukiintu gua mumuanjoko.

¹⁹ Herodes ine tshi mu diminina, h’a hara okumudipaga, ndere okua njengua.

²⁰ Oshoka Herodes okua tira Johannes, he kue mu dimburura, nokutja h’omuntu e nehuko nuujapuki, otsho e mu gamene, norundji nge e mu puakene, okui iteere, na he muene okua ara okumuuva.

²¹ Ndere esiku rimue-oku uete rjo opara-esiku rjokudimburukua okuvarua kue-Herodes okua pakere po omarenga nookapitija jaakuiita naakuruntu jo mu Galilea otshituci.

²² Omuna omukadona gua Herodias okue ja mo ta dana. Herodes na ajeshe potshituci tshe je mu panda. Omukuaniirua ta rombuere omukadona: Indira ku ngaje shi ua ara, otii tshi ku pe.

²³ He ta gana uo: Atshishe shi to indire ku ngaje, otii tshi ku pe, nando to indire ndi topore otshirongo pokati na nguee.

²⁴ Ngu ta zi mo, ta pura hina: Nandi indire tshe? Hina ta jamukura: Omutse gua Johannes omutshatshi.

²⁵ Naanzija ta tshuna, nde te ke tshi shata momukuaniirua: Nda ara u pe ndje naangashiingika motsijasha omutse gua Johannes omutshatshi.

²⁶ Omukuaniirua h’okua nik’uupongo, ndere morua shi a gana no moru aahenda, sho je ri po, ina ara okutshimutindira.

²⁷ Nde ta tumu omumbara gumue, te mu rombuere a hete omutse gue motshijasha. Ngu ta hi modorongo, nde ta keke omutse gue.

²⁸ Te gu eta motshijasha, nde te gu p’omukadona, ndere omukadona te gu pe hina.

²⁹ Aarongua sho ju uvu shi, oje ja, nde ta kuca po omudimba, taa gu fumbike mombira.

Aapostoli taa tshuna.

³⁰ Aapostoli oji igongere pu Jesus, nde taa hepurura atshishe shi ja ninga na shi jo onga.

³¹ Ndere he ta ti ku jo: Ireni, tu ikarere pu iri, ne mu vururukue katshona, oshoka mba je ja na mba ja hi, oja ri ojendji, jo inaa mona ecimbo rjokurja.

³² Taa rondo ano mosikepa, nde taa hi pu iri ji ikarere.

³³ Nd’aantu je uete taa hi, jo taa dimburura shi ja ara. Ano taa henderere puukukutu, aantu jeemukunda adishe, jo je mu tetekerera.

³⁴ Ano Jesus sho ta zi mo mosikepa, oku uete ongundu onene haantu, he te ja sir’oshenda, oshoka oja ri ja f’eenzi kadi nomusita, nde ta shimbike okujaronga eehapu odindji.

³⁵ Sho kua toko unene, aarongua je je engene ku Jesus, taa ti: Eshara ndika orja f’ombuga, nesiku rja pita.

³⁶ Rareka ano aantu ja he meemukunda no miihende, ji irandere iikurja.

³⁷ Ndere he ta jamukura, ta ti ku jo: One ja peni iikurja. Jo otaa ti: Natu he nduno, tu ka rande eemboroto neendenari omacere gaari, tu ja p’okurja?

³⁸ H’ota ti ku jo: Omu neemboroto ngapi? Indeni, mu tare. Jo taa hi, taa pura, nde taa ti: Odi ri ntano neeshi mbaari.

³⁹ Te ja rombuere, ajeshe ja kaatumbe momuidi omutarara, eengundu neengundu.

⁴⁰ Tsh’otsho taa kaatumba meengundu decere no deemurongo ntano.

⁴¹ H’ota kuca eemboroto di ntano neeshi mbaari, ta rigamene keguru, te di jambeke ta topora eemboroto, te di p’aarongua je, je di gandje. Tsh’otsho tuu eeshi mbaari te di toporere ajeshe.

⁴² Ajeshe taa ri, jo taa kuta.

⁴³ Jo otaa toora uupambu, mbu u upa ko, iimbare omurongo niijari ju uda, nuupambu ueeshi.

Jesus te ende mefuta.

⁴⁵ Naangashiingika Jesus tu undura aarongua je, ja ronde mosikepa, je mu tetekerere okutaaguruka haandijaka ku Betsaida. He ta rareke manka aantu.

⁴⁶ Sho e ja rareke, he muene okua rondo kondundu a ka garikane.

⁴⁷ Sho kua ruuda, osikepa hi ri mokati kefuta, ndere he muene puukukutu, ohike.

⁴⁸ Nde ta mono nokutja oje nuudigu mokushinga osikepa, oshoka ombepo he ja denge momesho, nde ta hi ku jo pouiri ontiine, te ende kombanda homeja gefuta, nde ta hi a fa a hara okupita po.

⁴⁹ Jo je mu uete te ende kombanda homeja, nde ja ruka otshiruru tshi ri po, jo taa higida pombanda.

⁵⁰ Oshoka ajeshe oje mu uete ngaa, nde taa tira. Naangashiingika ote ja popica, ta ti ku jo: Ikorereni, ongaje ngu, inamu tira.

⁵¹ H’ota hi ku jo mosikepa, nd’ombepo tahi muena. Ojo ja rurirua meemuenjo dauo.

⁵² Oshoka inaa pukururua natango peemboroto dijaka, eemuenjo dauo natango oda ri meemurema.

⁵³ Sho ja taaguruka nduno, oje ja motshirongo tsha Genesaret, taa hi komukunkuro.

⁵⁴ Taa zi mo mosikepa, naanzija aantu oje mu dimburura.

⁵⁵ Taa henderere okuha meemukunda, nde taa heta aavu muuriri mpoka, mpo je mu uva e ri.

⁵⁶ Napeshe mpo e ja, meemukunda no miirongo no momagumbo, apeshe oja rangere aavu meendjira, taa mu indire a pitike, ja njenge ouara omutse guonguuo he. Najeshe mba je mu njenge, oje eruka.