Markus 4 - Etestemente Epe ✠ 1951

ONTOPORUA 4. Omeere gamue.

¹ H’okua shimbike itshee okuronga aantu pefuta. Ongundu onene ohi igongere po. Ano ta rondo mosikepa. Manka a kaatumba muka mefuta, aantu oja kaatumba komunkunkuro guefuta.

² H’ote ja rongo ojindji momeere, nde te ja rombuere, merongo rje:

³ Puakeneni! Omukuni okua hi a ka kune eembuto.

⁴ Mokukuna dimue adi guire mondjira, nd’eedira do pombanda tadi ja, do tadi di tshomona po.

⁵ Dimue adi guire puukutu, mpa kapu nevi orindji, do tadi piti ngaa nzija ndere kadi nevi ere.

⁶ Etango sho rja pita, odu uva omutenja, na shoka kadi neemudi, oda ganj’ike.

⁷ Dimue adi guire momano, nd’omano taga koko, go ge di ceteka, otsho itadi vara.

⁸ Dimue adi guire mevi euanaua, tadi piti, tadi mene, do tadi vara iihimati, dimue peemurongo ndatu, dimue peemurongo kanekamue, dimue pecere.

⁹ H’ota ti: Ngu e nomakutsi gokuuva, nu uve ko.

¹⁰ Sho a ri po ohike, aarongua mba ja ri na he na mbeja omurongo na jaari oje mu pura ejere ndika.

¹¹ H’ote ja jamukura: Ne omua peua okutshiua ejere rjotshirongo tsha Karunga, ndere mbejaka je ri pondje, otaa rombuerua ajishe momeere ike.

¹² Opo je tshi tare oura nomesho, ndere kaa tshu uete, jo ju uve nomakutsi, ndere kaa tshu uvite, opo kaa hitedurure, jo kaa mone ediminopo ando.

¹³ Nde ta ti ku jo: Nge kamu uvite ko ejere ndika, mua ara ngiini, mu uve ko omeere ageshe.

¹⁴ Omukuni ta kunu ohapu.

¹⁵ Do dija mondjira, odo ajeshe, mba taa huvu ngaa ohapu, nge tahi kunua, ndere satana ote ja nzija, nde ta kuca ohapu ndji ha kuninue meemutima dauo.

¹⁶ Tsh’otsho uo di da kunua puukukutu oombeja mba taa huvu ohapu, jo otaa hi tuumba nzija nenjanju.

¹⁷ Ndere kaa neemudi mu jojene, jo je neharo enenguni: nge taa adikua kuudigu netidagano moru ohapu, otaa rimbirirua.

¹⁸ Dija di da kunua momano, odo ajeshe, mba taa huvu ngaa ohapu.

¹⁹ Ndere iisho juujuni niiherere juujamba neharu miinima iikuauo otaji ke ja mo, jo otaji ceteke ohapu; otsho tapu kara ouara kapu niihimati.

²⁰ Ndere di da kunua mevi euanaua, odo ajeshe, mba taa huvu ohapu, je hu uvite uo, jo otaji imica iihimati, gumue peemurongo ndatu, gumue peemurongo kanekamue, gumue pecere.

²¹ H’ota ti itshee: Omuntu ote eta ando onjeka, opo hi turue mesinguriro nenge koshi hokariri? Ndi tshi, opo hi turue kombanda hongudi, hi minikire.

²² Kakuna tsha, shi tsho orekua, nd’itatshi ko oroka uo. Kakuna tsha, shi tashi ningua mofuci, nd’itatshi monikua uo.

²³ Ngu e nomakutsi gokuuva, nu uve ko.

²⁴ H’ota ti ku jo: Diginineni shi tamu uvu. Oshoka notsheerekico, shi tamu ereke na tsho, na ne uo otsho tamu erekerua, eno, kombanda ha tsho tamu guederua ko, nge tamu puakene ko.

²⁵ Oshoka ngu e na, ota peua, ndere ngu ke na, ota kucua uo shi e na.

²⁶ H’ota ti uo: Otshirongo tsha Karunga otsha f’omuntu, ngu ta kunu eembuto mevi.

²⁷ Nand’a koca nenge ta rangere uusiku nomutenja, ndere ombuto tahi mene ho tahi koko, nd’ita mono shi tatshi ningua po.

²⁸ Oshoka evi orjojene tari eta iirja, tango omuno, konima otshunga, shugunina eemuma.

²⁹ Eemuma diirja nge da kora, he ota kuca ombere, oshoka etejo orja cika.

³⁰ Ta ti: Otshirongo tsha Karunga natu tshe ereke na tshee, nenge nejere ri ini natu tshi faturure?

³¹ Tsho otsha f’omuma hotshinjapi, ho ontshuutshu mokati keemuma adishe muujuni, nge tahi kunua mevi.

³² Ndere nge ha kunua, tahi mene, tahi koko, tahi pitirire iiganga ajishe, nde tahi zi iitaji iire, needira do mombanda di tshiue okurumba momudire gajo.

³³ No momeere ogendji ga tja ngaaka okue ja ronga ohapu, opandunge dauo dokupuakena.

³⁴ Ndere meehapu, di kadi shi omeere, ine ja ronga. Ndere okue ga fatururira aarongua uuna ji ikarera.

Iikunguru taji muenicua.

³⁵ Esiku ndija, onguroshi, okue ja rombuere: Tu taagurukeni haandijaka.

³⁶ Jo otaa rareke aantu, nde taa zi ko na he, sho a hi mosikepa. Uusikepa uu iri oue ja randura.

³⁷ Otshinkunguru otshinene otsha tukuka, tsho tatshu umbire omakucikuci mosikepa, nde tahu uda omeja.

³⁸ Ndere he okua ri monima hosikepa, a kocera potshiguirico. Jo otaa mu pendura, nde taa higida: Muene, ku na na sse, sho tatu ningine mo?

³⁹ H’ota penduka, ta ganda ombepo, nde ta ti kefuta: Muena, nguee rota. Ombepo oha rota, nde tahi muena.

⁴⁰ Nde ta ti ku jo: Otshee mua mbandara? Natango kamu nehiteero nani?

⁴¹ Ndere oja tira unene, nde taa kundacana: Omuntu nguka okua ti ngiini, sho ngaa eembepo tadi muena nefuta tuu?