Markus 16 - Etestemente Epe ✠ 1951

ONTOPORUA 16. Ejumuko nerondo.

¹ Esiku rjesabata sho rja piti, Maria Magdalena na Maria, hina ha Jakobus, na Salome ja randa iizimba, ja he je mu guajeke.

² Naangura onene hesiku rjotango rjotshiuike jo taa hi kombira, etango rja pita katshona.

³ Nde taa kundacana: Ore te tu kandurire po emanja, ri ze po potsheero tshombira?

⁴ Ndere sho ja tara ko, oje uete emanja rja kandurua po, rjo rja ri enene nokuri.

⁵ Sho ja hi mombira, oja mono omumati a kaatumba korurjo, a zara onguuo ontokere, nde taa haruka.

⁶ Ndere nguija te ja popica: Inamu tira! Otamu kongo Jesus omunazareta, h’omuarerua komutshigakano. Okua jumuka, ke mo ue mu, tareni eshara, mpo je mu rangekere mo.

⁷ Indeni, nde tamu ka rombuera aarongua je na Petrus, nokutja h’ote mu tetekerere, ta hi ku Galilea, oko tamu ke mu mona, ngashi e mu rombuerere.

⁸ Jo taa zi mo mombira, taa hi nzija, oshoka uumbanda netiro orje ja kuata. Ndere inaa popja tsha nand’onomuntu, oshoka oja tiririra.

⁹ Nde ngu a jumuka mesiku riotango riotshiuike, he ti ihororere tango Maria Magdalena, ngu a tidirue eembepo eembuineji.

¹⁰ He ta hi, e ke tshe epururire ajeshe, mba ja ri na he nokuponga nokurira.

¹¹ Ndere sho ju uvu, nokutja oku nomuenjo, a monikua ku he, inaa ara okumuiteera.

¹² Te ja ti ihororere jaari jo mu jo mondjira okuha komukunda morupe ru iri.

¹³ Na mbono taa hi, je tshi rombuere ojakuauo, ndere inaa ji iteera uo.

¹⁴ Naashugunina ti ihororere mbeja omurongo na gumue, sho ja kaatumba kotshiriro, te ja gandere uukukutu uauo mehiteero no meemuenjo, oshoka inaa hiteera mbeja, mba je mu mona a jumuka.

¹⁵ Nde ta ti ku jo: Indeni muujuni aushe, mu uvicire aantu ajeshe evangelium.

¹⁶ Ngu ti iteere, h’a hara okutshatshua, otu upicua. Ndere ngu ini iteera, ota ke ekeruashi.

¹⁷ Ndere mbono, mba ji iteera, oja randurua kiirongankondo iinene mbi: Otaa ka tida mo eembepo eembuineji medina rjandje, jo taa popi momaraka omape.

¹⁸ Taa ka jambura po omajoka; nge ja ka nua uuzigo, itau ja nigirika. Otaa ka tenteke aavu omake, nde taa heruka.

¹⁹ Muene Jesus sho a popja na jo, okua tuumbua meguru, mo ta kaatumba korurjo rua Karunga.

²⁰ Jo taa hi, taa huvica apeshe, nde Muene ta rongo puamue na jo, he ta koreke ohapu niironga iinene taji randura ko.