Markus 15 - Etestemente Epe ✠ 1951

ONTOPORUA 15. Jesus pu Pilatus.

¹ Ongura sho kua tshi, otshingongi tshaapristeri aakuruntu tsha kundacana naakuruntukuruntu naanongo jomambo notshingongi tshaakuruntu, taa tumu Jesus a mangue, jo taa mu fara ku Pilatus.

² Nde Pilatus te mu pura: Ongueje omukuaniirua gu’aajuda? H’ota jamukura, ta ti ku he: Ngashi to ti.

³ Aapristeri aakuruntu taa mu popi omatamaneko ogendji.

⁴ Pilatus h’ote mu pura itshee: Ito jamukura nande? Puakena, otaa popi iinima ji cike peni mu nguee.

⁵ Ndere Jesus ina jamukura ue, notsho Pilatus okua kumua ko.

⁶ Opua ri omukaro a diturire aantu potshituci otshinene gumue mo meemango, ngu ja ara.

⁷ Esiku ndija okua ri gumue, edina rje Barabas, a ri a kuatua puamue naantu, mba ja ninga edunguuko, nde mevundakano ja dipaga omuntu.

⁸ Aantu sho je ja po, oje mu indire a ninge ngashi e ja ningire arushe.

⁹ He Pilatus ta jamukura: Omua ara nduno ndi mu mangururire Omukuaniirua guaajuda?

¹⁰ Oshoka okua ri e tshi naua, nokutja aapristeri aakuruntu oje mu eta mepanguro moru ondumbo.

¹¹ Nde aapristeri aakuruntu taa popi maantu, e ja mangururire Barabas.

¹² Pilatus h’ote ja pura itshee: Omua ara nduno ndi ninge ngiini nomukuaniirua guaajuda?

¹³ Jo taa higida: Na arerue komutshigakano!

¹⁴ Nde Pilatus ta ti ku jo: Okua ninga tshike otshineji? Ndere taa higida neenkondo: Na arerue komutshigakano!

¹⁵ Pilatus sho a hara okupangura keharo rjauo, te ja pe Barabas a mangururue, nde Jesus te mu gandja a arerue, sho e mu dengica neengoro.

Jesus ta dingirua omano komutse.

¹⁶ Aapija aasoldati taa mu fara motshoto tshondjugo hokupangurira, nde taa hicana ko uo ojakuauo.

¹⁷ Jo taa mu zareke eruakani etirigane, taa tungu otshingongo tshomakegua, nde taa tshi tura komutse gue.

¹⁸ Tsh’otsho taa shimbike okumupopica: Kundua, mukuaniirua guaajuda.

¹⁹ Jo ta denge omutse gue nonenge, taa mu sijir’omate, taa ts’eengoro, nde taa mu injongamene.

²⁰ Sho ja dimbuka okumutsheka, oje mu shura eruakani etirigane, taa mu zareke nonguuo he muene, nde taa mu piica momukunda, je mu arere komutshigakano.

Jesus komutshigakano.

²¹ Jo taa ciminike omuntu, te ende nondjira a zi mepja, Simon omukereni, she ha Alexander na Rufus, i itsike omutshigakano gue.

²² Nde taa mu fara keshara rja Golgata, kutja: eshara rjeenkue deemutse.

²³ Jo taa mu pe omavinju ga vundakanicua nomeja omaruru okunua. Ndere ine ga tuumba.

²⁴ Sho je mu arera komutshigakano, jo ji itoporere eenguuo de nokudoogororica, keshe tuu gumue a peue he.

²⁵ Otundi sho je mu arera, oha ri ontitatu.

²⁶ Notshikoro tshokusa kue otsha tshangerua ko: Omukuaniirua guaajuda.

²⁷ Jo taa arere puamue na he aakorokoshi jaari, gumue korurjo, mukuauo korumosho.

²⁸ Otsho ohapu homambo oha guanicua: Okua ri a jarurirua maakorokoshi.

²⁹ Ajeshe, mba taa hende po, taa mu tsheke, jo taa puku eemutse dauo, taa ti: Hee, nguee ngu to kumuna po ontempeli ha Karunga, ngueje u hi tungurure momasiku gatatu:

³⁰ Ikuaca ko muene, za ko komutsigakano!

³¹ Tsh’otsho uo aapristeri aakuruntu naanongo jomambo je mu tsheke, taa kundacana: Okua kuacerere jakuauo, nd’ita vuru okuikuca muene.

³² Kristus, Mukuaniirua guaahisrael, za ko nduno komutshigakano, opo tu mone, sse tu iteere. Na mba ja arerua puamue na he, oje mu njanene.

³³ Ndere otundi ontikanekamue sho ha ciki, eemurema eemunene oda siikire otshirongo atshishe sigo okotundi ontimugoji.

³⁴ Nde potundi ontimugoji Jesus okui igida neui enene: Eloi, Eloi, lama sabaktani, atshi ti: Karunga kandje, Karunga kandje, otshike ue eca ndje?

³⁵ Jamue, mba ja cikama mpoka, je tshu uvite, otaa ti: Tara, nguka ti icana Elias.

³⁶ Nde gumue te enderere, ta kuca otshicekurico, te tshu uda omeja omaruru, te tshi tura kotsheenguti, nde te mu pe okunua, ta ti: Mueneni manka, tu tare, shira Elias ote ja, e mu kuce ko.

³⁷ Nde Jesus ti igida neui enene, he ta si.

³⁸ Omurapi omunene, ngu hagu edire ontempeli, guo otagu tatuka pokati pombanda sigo oposhi.

³⁹ Erenga rjaakuiita, ndi rja cikama rja taarera Jesus, sho rja mono, ta si nokuigida pombanda, rja ti: Otshiri-tshiri, nguka okua ri Omumua Karunga.

⁴⁰ Ngaahuii okua ri ku na uo aakiintu ja tara, ja cikama kokure. Mu jo mua ri Maria Magdalena na Maria, hina ha Jakobus omumati no ha Josef, na Salome.

⁴¹ Oja ri je mu cindikira, je mu karere, sho a ri mu Galilea, nojendji, mba ja hi puamue na he ku Jerusalem.

Jesus ta turua mombira.

⁴² Rokonguroshi hesiku rjerongikidiro, orjo esiku, ndi tari tetekerere esabata.

⁴³ Josef ho ku Arimatea, omukuruntu guotshirongo a simana, ngu a tegerera uo otshirongo tsha Karunga, okue ja ku Pilatus, ke nuumbanda, nde ti indire omudimba gua Jesus.

⁴⁴ Pilatus, okua kumua ko, sho a huvu, nokutja Jesus a sa nare. H’oti icana erenga, nde te ri pura, nokutja okua sa tshiri?

⁴⁵ Sho e tshu uvu kerenga, h’ota gandja omudimba ku Josef.

⁴⁶ Nde Josef ta randa erapi rja jera sheke, te gu kuca, te gu dingire merapi, nde te gu rangeke mombira, ndji ha ri ho okua memanja enene, he ta garangatica po emanja potsheero tshombira.

⁴⁷ Maria Magdalena na Maria hina ha Josef taa tara naua, mpo tagu rangekua.